УИХ-ын гишүүн Н.Номтойбаярын бүрэн эрхийг түдгэлзүүлэх эсэх асуудлыг Халдашгүй байдлын дэд хороогоор хэлэлцэж дууслаа. Гадаадад томилолтоор явж буй хоёр гишүүн Ч.Улаан, Д.Лүндээжанцан нарыг ирсний дараа хуралдаж, шийдвэр гаргахаар болсон байна. Уг нь Ерөнхий прокуророос ирүүлсэн саналыг 48 цагийн дотор УИХ-аар шийдэх хуультай. Тус дэд хорооны дарга, УИХ-ын гишүүн Ц.Нямдорж, “Энэ асуудал яалт ч үгүй хууль зөрчихөөр боллоо. УИХ-ын гишүүний халдашгүй байдлын дэд хорооны хуралд Н.Номтойбаярыг оролцуулна. Түүний хүсэлтээр дэд хорооны хуралдааныг нээлттэй явуулах боломжгүй. Учир нь УЕП-оос асуудлыг нууцын зэрэглэлтэйгээр оруулж ирсэн” гэжээ. Харин Ерөнхий прокурор Б.Жаргалсайхан “Би зөвхөн санал өгсөн. Халдашгүй байдлын дэд хороо шийдвэрээ гаргаагүй байна. Тиймээс би үндэслэлийг одоо хэлэх боломж алга” хэмээжээ.