Өмнөговь аймгийн Гурвантэс сумын Гоёот багийн харьяат иргэн, 26 настай, эрэгтэй С, 25 настай, эрэгтэй Б нар сумаас хойш 80 км зайд байх Хавцгайтын гол гэдэг газар хөдөө гэртээ очихоор арваннэгдүгээр сарын 30-ны өдрийн 17:00 цагт “Ланд-77” маркийн машинтай гараад сураггүй болжээ.
Энэ тухай дуудлагыг энэ сарын 01-ний өдрийн 21:35 цагт аймгийн ОБГ-т өгснөөр тус сумын Засаг даргын Тамгын газрын дарга С-ээр ахлуулсан найман хүн, нэг автомашин, хөдөө гэрээс нь 30 км-т байх “Агь манангийн торомхон” ХХК-ийн алтны уурхайн кемпээс дөрвөн хүн, нэг автомашин, нийт 12 хүн, хоёр техник хэрэгсэлтэйгээр энэ сарын 01-ний 22:00 цагаас эрэн хайх ажиллагааг зохион байгуулсан байна.
Эрлийн ажиллагаа өнөө өглөө буюу энэ сарын 2-ны 05:40 цагт дуусч, сураггүй болсон иргэдийг тус сумын Тост багийн нутаг “Алтан-Уул” гэдэг газраас эсэн мэнд олж ар гэрийнхэнд нь хүлээлгэн өгчээ.