Сүхбаатар, Архангайн багууд аваргын төлөө тоглоно

-Үндэсний лигийн Тэргүүн хэсгээс Сүхбаатар-Архангай, Дэд хэсгээс Ховд-Хэнтий аймгийн багууд аваргын төлөө тоглохоор шалгарлаа-

Монголын Үндэсний сагсан бөмбөгийн холбооноос 21 аймгийн дунд Үндэсний лигийг өнгөрсөн онд анх удаа зохион байгуулсан билээ. Энэ жил хоёр дахь удаагаа болж буй Үндэсний лигийг тэргүүн, дэд гэсэн хоёр зэрэглэлд хуваасан. Тэргүүн хэсэгт Архангай, Дархан, Орхон, Төв, Увс, Сүхбаатар, Хөвсгөл, Өмнөговь, Дэд хэсэгт Баянхонгор, Сэлэнгэ, Ховд, Хэнтий, Өвөрхангай, Дорноговь, Завхан аймгийн багууд багтсан. Тэгвэл дөрөвдүгээр сарын 23-ны өдөр эхэлсэн Үндэсний лигийн тэргүүн болон дэд хэсгийн медалийн төлөөх өрсөлдөх багууд тодорлоо.

Өчигдөр хагас шигшээ тоглолтын шийдвэрлэх гурав дахь тоглолтууд болж Тэргүүн хэсгээс Сүхбаатар-Архангай, Дэд хэсгээс Ховд, Хэнтий аймгийн багууд аваргын төлөө тоглох эрхийг авлаа.

Түрүүлж хоёр хожсон нь аваргын төлөө тоглох эрхийг авах байсан бөгөөд багуудын хожлын харьцаа 1:1 болоод байсан. Ингээд өчигдөр шийдвэрлэх гурав дахь тоглолт болсон юм.

ТЭРГҮҮН ХЭСЭГ:

• Алтан медаль: Сүхбаатар – Архангай
• Хүрэл медаль: Орхон – Увс

ДЭД хэсэг:

• Алтан медаль: Ховд – Хэнтий
• Хүрэл медаль: Баянхонгор – Сэлэнгэ

Медалийн төлөөх цуврал өнөөдрөөс Спортын төв ордонд эхэлнэ. Алтан медалийг түрүүлж хоёр хожсон нь хүртэх бол хүрлийн төлөө ганц тоглолт болох юм. Харин эмэгтэй багуудын хувьд алт, хүрлийн төлөө ганц тоглолт болно.

Өнгөрсөн онд Төв аймгийн багт шөвгийн наймд хожигдож байсан Архангайн сагсчид энэ жил мөнгөн медалийн болзол хангаж, аваргын төлөө тоглохоор шалгаран үлдлээ.

ХУВААРЬ: /Баасан, Бямба – VI.3-4/

Үндэсний эмэгтэй Лигийн Плей-оффийн тоглолтууд

• 16:00 Хэнтий Vs Архангай /Эмэгтэй/
• 17:30 Ховд Vs Дорноговь /Эмэгтэй/

• 19:00 Сүхбаатар Vs Архангай /Эрэгтэй/

Бямбад: /Энэ өдөр эрэгтэй Тэргүүн хэсгийн хүрэл, эмэгтэй багуудын мөн медалийн төлөөх ганц тоглолт болно/

• 11:00 Эмэгтэй хүрэл медалийн төлөө
• 12:30 Эмэгтэй Алтан медалийн төлөө
• 14:00 Сэлэнгэ VS Баянхонгор /ХҮРЭЛ/
• 15:30 Ховд VS Хэнтий /АЛТ – ЭХНИЙ ТОГЛОЛТ/
• 17:00 Орхон Vs Увс /ХҮРЭЛ/
• 18:30 Сүхбаатар Vs Архангай /АЛТ- II дахь тоглолт/

ТОГЛОЛТЫН ХАРЬЦАА:

Сүхбаатар – Орхон 2:1

• Сүхбаатар VS Орхон 61:47 /VI.02/
• Сүхбаатар VS Орхон – 78:73 /V.27/
• Сүхбаатар VS Орхон 76-75 /V.26/

Увс – Архангай 1:2

• Увс VS Архангай 74:84 /VI.02/
• Увс VS Архангай – 87:83 /V.27/
• Увс VS Архангай – 77:88 /V.26/

Сүхбаатар аймгийн баг Орхоныг 2:1-ээр хожиж, аваргын төлөө тоглохоор шалгаран үлдлээ. Орхон аймгийн баг өнгөрсөн онд Дарханы багт хожигдож, мөнгөн медаль хүртэж байсан бол сүхбаатарчууд хүрэл медаль дээр бууж байсан. Хоёр багийн хувьд өнгөрсөн жилийн хагас шигшээд учраа таарахад Орхон 72:63-аар хожиж байсан байна.

2015 оны анхдугаар тэмцээнд Сүхбаатар аймгийн баг хүрлийн төлөө Төв аймгийн багийг 72:65-аар хожиж байжээ. Тэд хагас шигшээд Орхонд 72:63-аар хожигдож байсан байна. Тэгвэл энэ жил 2:1-ээр хожсоноор аваргын төлөө тоглохоор шалгарлаа.

2015 оны Үндэсний лигийн мөнгөн медальт Орхоны баг энэ жил хүрлийн төлөө Увс аймгийн багтай тоглохоор боллоо. Тэд хагас шигшээд Сүхбаатарын багт 2:1-ээр хожигдсон юм.