Дэлхийн хамгийн нэр хүнд бүхий шинжлэх ухааны шагналыг хүртсэн 10 хүнд хүндэтгэл үзүүлэх Нобелийн баяр ёслолын долоо хоног Шведийн нийслэл Стокгольм хотод эхэлсэн талаар ТАСС агентлаг уламжилжээ. 2015 оны Нобелийн шагналыг 11 хүн хүртэх бөгөөд шагнал гардуулах ёслолын ажиллагаа энэ сарын 10-нд Стокгольмын филармонид болох аж. Харин Альфред Нобелийн гэрээслэл ёсоор Энх тайвны шагналыг Осло хотод гардуулах юм байна. Энэ удаад уг шагналыг Тунисын эрх баригчид болон сөрөг хүчин хоорондын хэлэлцээнд зуучлагч бүлэг болох Тунисын үндэсний яриа хэлцээний дөрвөл хүртэх ажээ.
1901 оноос хойш уг шагналыг нийтдээ 573 удаа олгосон бөгөөд 870 хүн, 32 байгууллага хүртжээ. Энэ жил АНУ-ын анагаах ухааны салбарын 85 настай профессор Уильям Кэмпбелл, Хятадын эрдэмтэн Ту Юю нар хамгийн өндөр настай шагналтан болсон бол хамгийн залуу шагналтан нь 56 настай физикч Такааки Казита болжээ. Энэ жилийн Нобелийн шагналтнууд маш шахуу хөтөлбөртэй юм байна. Тэд ярилцлага өгч, хэвлэлийн бага хурал хийж, оюутнуудтай уулзаж, концерт үзэж, мөн баяр ёслолын долоо хоногийн оргил болох хүндэтгэлийн зоог барих аж.