Баянгол дүүрэгт “Уранган” худалдааны төв ашиглалтад орж, албан ёсоор нээлтээ хийлээ. Нээлтийн үйл ажиллагаанд Баянгол дүүргийн Засаг дарга С.Одонтуяа, “Уранган” ХХК-ийн захирал Б.Лхагвасүрэн, Баянгол дүүргийн гуравдугаар хорооны Засаг дарга Ц.Энхчимэг болон бусад албаныхан оролцлоо.
Тус худалдааны төв ашиглалтад орсноор 500 гаруй ажлын байр шинээр бий болж, худалдаа эрхлэгчдийн өрхийн амжиргаа дээшлэх нөхцөл бүрдэж байгаад Баянгол дүүргийн Засаг дарга С.Одонтуяа талархал илэрхийллээ.
Тус худалдааны төвд бүх төрлийн барилгын материал, гэр ахуйн өргөн хэрэглээний бараа, авто машин худалдаа, авто сэлбэг худалдаа зэргээс гадна банк бус санхүүгийн байгууллага, зочид буудал, авто засварын төв, оффис, агуулах түрээсүүд ажиллах юм. Мөн үйлчлүүлэгчдэд зориулсан хоёр давхар авто машины зогсоолтой.
“Уранган” ХХК нь замын ачааллыг бууруулах зорилгоор 19-р хорооллын хойд замаас “Уранган” барилгын зах руу болон нарны хороолол руу нэвтрэх шинэ гүүр барих бүтээн байгуулалтын ажлыг эхлүүлжээ. Гүүр ашиглалтад орсноор “Уранган” худалдааны төвөөр үйлчлүүлэх хэрэглэгч, худалдан авагчид саадгүй зорчихоос гадна тухайн орчны замын хөдөлгөөний түгжрэлийг бууруулахад чухал нөлөө үзүүлэх юм.