“Үндэсний шигшээ багийн ахлах дасгалжуулагчийг сонгон шалгаруулах журам”-ын дагуу бокс, жүдо чөлөөт бөхийн шигшээ багийн дасгалжуулагч, ахлах дасгалжуулагчдын сонгон шалгаруулалт явагдаж байна.
Өнгөрсөн ням гаригт явуулсан Жүдо бөхийн шигшээгийн дасгалжуулагчдын сонгон шалгаруулалтын дүнг өчигдөр Биеийн тамир, спортын газрын харьяа Шигшээ багийн албанд танилцуулжээ.
Нийт есөн хүн оролцсон уг шалгаруулалтад дасгалжуулагч О.Балжинням хамгийн өндөр оноо авсан байна. Х.Эрдэнэт-Од, Х.Цагаанбаатар, Д.Баттулга, Г.Дашдаваа нар оноогоор удаалжээ.
Жүдо бөхийн холбоо эдгээр дасгалжуулагчдын авсан оноо, холбооны байр суурийг нэгтгэн, Шигшээ багт танилцуулсан тул удахгүй жүдо бөхийн залуучуудын болон насанд хүрэгчдийн шигшээ багийн дасгалжуулагчдын нэрс албан ёсоор тодорно.