“Хангарьд” клубын тамирчин Б.Батхүү БНХАУ-ын Гуанжоу хотноо болсон “Гуанжоу 2014” олон улсын нээлттэй тэмцээний хүнд сэлэмний төрөлд АЛТАН МЕДАЛЬ хүртлээ. Ийнхүү Монгол Улсын туялзуур сэлэмчид олон улсын тэмцээнээс анхны медалиа, тэр дундаа алтан медаль хүртэв. Мөн Э.Энхтулга, Т.Анарсайхан (Хоёул УБ Фенсинг клуб) нар мөнгө, хүрэл медаль энгэртээ зүүж, арвин ургац хураалаа. Түүнчлэн тэмцээний хоёр дахь өдөр болсон хүнд сэлэмний багийн төрөлд манай баг (Б.Батхүү, Э.Бат-Эрдэнэ, Э.Энхтулга, Т.Анарсайхан) Хонконгийн багийг ялж АЛТАН медаль хүртжээ. Харин өсвөрийн төрөлд хүч үзсэн Б.Амарболд шагналт байрт шалгарсан байна.
Тус тэмцээн нь “Гуанжоу 2010” Азийн наадмаас хойш жил бүр, тус наадам болсон ордонд зохиогдож байгаа бөгөөд энэ жилийн тэмцээнд БНХАУ, БНСУ, Хонконг, Тайланд, Макао, Монгол улсын 500 гаруй тамирчин 3 сэлэмний төрөлд, насанд хүрэгчид, өсвөрийн ангилалд явагджээ.
Монгол Улсаас дасгалжуулагч Александр Ровнягин, Д.Ганбаатар нараар удирдуулсан 5 тамирчин оролцсон юм. Тэд тэмцээний өмнө 2 долоо хоногийн турш Гуанжоу хотноо олон улсын хамтарсан бэлтгэлд оролцжээ.
