Энэ сарын 22-23-нд шилжих шөнө Сэлэнгэ аймгийн Сайхан сум Хөтөл тосгоноос цогцос олдсон талаар хэвлэлүүд мэдээлсэн. Цагдаагийн байгууллагийн мэдээлснээр талийгаачийн хүзүүг нь хоёр удаа хурц иртэй зүйлээр зүссэн байсан гэнэ. Хэргийн газар дээр Сэлэнгэ аймгийн Цагдаагийн газрын дарга, цагдаагийн хурандаа Д.Энхбаяраар ахлуулсан шуурхай ажлын хэсэг ажиллаж, сэжигтнүүдийг өчигдөр 14 цагийн орчимд илрүүлсэн байна. Сэжигтнийг Хөтөл тосгоны Овоотоос баривчилсан аж. Сэжигтэн Б, талийгаач Н нарт хийсэн үзлэгээр аль аль нь согтууруулах ундааны зүйл хэрэглэсэн байжээ. Урьдчилсан байдлаар хэргийг өш хонзонгийн сэдэлтээр үйлдсэн байж болзошгүй гэнэ.