Рио-де- Жанейро хотноо удахгүй болох гэж буй зуны Паралимпын наадмыг санхүүжүүлэх хангалттай мөнгө босгож чадаагүй учир уг арга хэмжээний төсөв танагдахаас өөр аргагүй болж байна гэж зохион байгуулагчид нь мэдэгдлээ. Тодруулбал, Олон улсын Паралимпын хорооны Ерөнхийлөгч Филип Крэйвен сэтгүүлчдэд өчигдөр буюу наймдугаар сарын 20-нд мэдэгдэл хийхдээ “бидний тооцоолж байснаас хамаагүй бага мөнгө ивээн тэтгэгчдээс цугласан. Паралимп ирэх сард болно. Гэтэл тасалбарын ердөө 12-хон хувь нь борлуулагдаад байна” гэв.
Мөн тэрбээр “Паралипын холбоо Рио-де-Жанейро хотоос 47 сая долларын нэмэлт санхүүжилт авсан боловч Бразилын төв Засгийн газраас хангалттай дэмжлэг аваагүй” хэмээн онцоллоо.
Харин ОУПХ мэдэгдэхдээ “бид сайн дурынхан болон автобусны жолоочдын тоог цөөлнө” гэв. Гэсэн хэдий ч спортын 22 төрлийн тэмцээн төлөвлөгөөний дагуу болно гэж Олон Улсын Олимпийн хороо мэдэгдлээ.