Пакистаны Бахавалпур хотод шатахуун түгээх машин осолдсоны улмаас шатах үеэр хамгийн багаар бодоход 123 хүн амь үрэгдэж хэдэн арван хүн гэмтэж бэртжээ. Түүнээс гадна зургаан машин, 12 мотоцикл шатсан гэнэ. Гэрчүүдийн ярьснаар машин осолдсон газар очсон хүмүүс тамхи татсанаас түймэр гарсан байж магадгүй хэмээн ярьсан байна. Хамгийн сүүлд авсан мэдээллээр гал сөнөөгчид түймрийг унтраажээ. Пакистаны хэвлэлээр түймэрт шатаж амь үрэгдсэн хүмүүсийн цогцос болон машинуудын зургийг нийтэлсэн байна.
Шатахуун түгээх машин хэт хурдан явснаас осолдсон гэсэн урьдчилсан дүгнэлт гарчээ. Түймэр гарсан газар цэргийн нисдэг тэргүүд яаралтай очиж гэмтэж бэртсэн хүмүүсийг эмнэлэгт хүргэсэн байна.
