Өмнөд Солонгосын прокурорын газраас өнөөдөр тус улсын Ерөнхийлөгч асан Пак Гын Хэг баривчлах шийдвэр гаргажээ.
Пак Гын Хэг авлига авсан, албан тушаалаа урвуулан ашигласан, улсын нууц задруулсан гэх мэт 13 хэрэгт буруутгаж байна. Эдгээр хэрэгтэй Пак Гын Хэ холбоотой болох нь нотлогдвол тэрбээр хамгийн багадаа 30 жилийн хорих ял авах аж.
Тэрбээр өнгөрсөн долоо хоногт өөрийн хүсэлтээр прокуроруудад байцаалт өгсөн билээ. Ерөнхийлөгч асан өөрийнх нь нэр холбогдоод буй дээрх хэргүүдтэй ямар ч холбоогүй гэдгээ илэрхийлсэн юм. Мөн найзынхаа нэр хүндийг ашиглаж, томоохон компаниудаас авлига авсан Чой Сун Шилийн талаар Пак Гын Хэ “Энэ эмэгтэй ямар ч буруугүй. Тэр зүгээр л надад хувийн зөвлөгөө өгдөг байсан” гэж мэдэгдсээр байна.