Дэлхийн “Автомашингүй өдөр”-ийг энэ сарын 22-нд буюу Бямба гаригт зохиох тухай хэвлэлийн хурлыг хийлээ.
Энэ талаар Нийслэлийн эрүүл мэндийн газрын нийгмийн эрүүл мэндийн хэлтсийндарга О.Энхзаяагаас тодрууллаа.
-Автомашингүй өдрийг зохион байгуулахын ач холбогдол юу вэ?
НҮБ-ын 64-р Ассамблейн “Дэлхийн замын аюулгүй байдлыг сайжруулах тухай ” тогтоолыг хэргжүүлэх, Alternative mobility буюу автомашинаас бусад сонголтыг иргэдэд олгох уриан дор автомашины хэрэглээг хязгаарлаж, нийтийн тээвэр, унадаг дугуй зэрэг бусад тээврийн хэрэгслийн хэрэглээ, явган алхалтыг дэмжих, автомашины түгжрэлээс үүдэлтэй хүн амын дунд бухимдал, цаг алдалт, дуу чимээг багасгах, агаар утааны бохирдлыг бууруулах, эрүүл аж төрөх, орчин нөхцөлийг бүрдүүлэн идэвхтэй хөдөлгөөнийг дэмжих замаар иргэдэд халдварт бус өвчнөөс урьдчилан сэргийлэх, мэдлэг олгох, эрүүл зан үйл төлөвшүүлэхэд энэхүү арга хэмжээний ач холбогдол, зорилго оршино.
-Энэ өдрийг яагаад зохион байгуулахаар болсон бэ?
-Манай орны осол гэмтлээс шалтгаалсан өвчлөл нас баралтын тохиолдол хүн амын өвчлөл, нас баралтын тэргүүлэх таван шалтгаанд орсоор байна. Улсын хэмжээнд 2017 онд бүртгэгдсэнээс 115321 осол гэмтлийн шинэ өвчлөл, 2626 гадны шалтгаант нас баралт бүртгэгдснийг өмнөх оны статистик үзүүлэлттэй харьцуулахад өвчлөл 7.2 хувиар, нас баралт 7.7 хувиар ту тус өссөн үзүүлэлттэй гарсан.Осол гэмтэл гадны шалтгаанаар гэмтсэн тохиолдлын 79.2 хувь нь нийслэлд бүртгэгдсэн. Энэ нь 10000 хүн амд ногдох тохиолдлын түвшинг орон нутгаар тандан судлахад нийслэлд 4.4 хувиар өссөн үзүүлэлттэй байгаагаас өсвөр насы хүүхдийн осол гэмтлийн шалтгаант нас баралт 14.6 хувийг эзэлж байна. 2017 оны эрүүл мэндийн салбарт бүртгэгдсэнээр зам тээврийн ослоор 17601 хүн гэмтэж, 542 хүн нас барсан байна.Иймээс нийслэлийн иргэд, тэр дундаа хүүхдийн замын хөдөлгөөний аюулгүй байдлыг хангах, орчинг сайжруулах, хөдөлгөөний аюулгүй байдлын талаар мэдлэг, хандлага, дадлыг олгох, зөв зан үйлийг төлөвшүүлэх мэдээлэл сурталчилгаа хийх, ажлыг зохион байгуулах шаардлагатай гэж үзсэн.
– Автомашингүй өдрийг хэзээнээс эхлэн тэмдэглэдэг болсон бэ?
Дэлхий даяар жил бүрийн есдүгээр сарын 22-ны өдрийг автомашингүй өдөр болгон тэмдэглэдэг уламжлал тогтсон. Манай орон 2009 оноос хойш хүрээлэн буй орчин болоод нийгэмд автомашины хэрэглээнээс үүдэн учирч буй сөрөг нөлөөг багасгахад олон нийтийн анхаарлыг хандуулах зорилгоор “Автомашингүй өдөр”-ийг тэмдэглэх гэж байна.
-Энэ өдрөөр ямар тэмцээн уралдаан зохион байгуулах вэ?
-Жил бүрийн автомашингүй өдрийг хаврын улиралд тэмдэглэдэг байсан бол энэ жил дэлхийн өдрөөр буюу Есдүгээр сарын 22-ны Бямба гарагт Улаанбаатар хотын төв хэсгийн замыг 08:00-17:00 цагийн хооронд түр хугацаагаар хязгаарлаж, томоохон зах , худалдааны төвүүдийг хааж, иргэд олон нийтэд зориулсан урлаг, спортын олон арга хэмжээг зохион байгуулахаар төлөвлөсөн байгаа. Тухайлбалбал,тус өдөрлөгт оролцож байгаа иргэд баг болж тэмцээн уралдаанд оролцоод тусгай даалгаваруудыг гүйцэтгэх боломжтой. UBike дугуй түрээсийн зүгээс иргэдэд зориулж дугуйтай гэр бүл нэртэй тэмцээн зохиох гэж байна. Үүнд иргэд оролцох боломжтой.
-Автомашингүй өдрөөрямар ямар чиглэлийн замыг хязгаарлах вэ?
Авто машингүй өдөр”-ийг зохион байгуулах үйл ажиллагааны хүрээнд Бага тойруу, Энхтайвны өргөн чөлөөний Баруун дөрвөн замын уулзвараас Зүүн дөрвөн зам хүртэлх авто зам, Сөүлийн гудамж, Бээжингийн гудамж, Анкарагийн гудамж, Сүхбаатарын гудамж, Их сургуулийн гудамж, Элчингийн гудамж, Партизаны гудамж, Олимпын гудамж Самбуугийн гудамжны автозамын хөдөлгөөнийг хязгаарлах тул эдгээр гудамж, замаар үйлчилгээ үзүүлдэг нийтийн тээврийн 40 чиглэлийн 340 тээврийн хэрэгслийн чиглэл, замд өөрчлөлт орно. Хотын төвийн буюу Их тойруу доторх гол гудамж, замууд хаагдах үед нийтийн зорчигч тээврийн үйлчилгээний чиглэлүүд хойгуураа Их тойруугийн гудамж, урдуур Нарны зам, Намъяанжүгийн гудамжаар явна. Хойноос урагш болон урдаас хойш явдаг босоо чиглэлүүд Баруун дөрвөн зам, Нарны гүүр, Зүүн дөрвөн зам, Намъянжүгийн гудамжаар үйлчилнэ.
Б.ОЮУНЖАРГАЛ