Өнгөрсөн хавраас намар хүртэл Их газрын чулууны байгалийн цогцолборт газрын хамгаалалтын захиргаа шувууны үүрлэлт болон үржлийн судалгаа хийжээ. Энэ нь Их газрын чулууны бүс нутаг дахь шувууны төрөл зүйл, тоо толгойг тогтооход чиглэсэн анхны судалгаа болсон байна. Судалгааг ирэх жил мөн үргэлжлүүлэх ажээ.
Тус судалгааны явцад хон хэрээний 3, начин шонхорын 2, нөмрөг тас шувууны 37, хээрийн бүргэдийн 1 үүрийг тэмдэглэж, ажиглалт хийжээ. Ажиглалтын хугацаанд шувууны үхэл хорогдол гараагүй, үүрлэлтийн амжилт 100 хувьтай буюу ангаахайнууд нь бүгд ниссэн байна. Цаашид нөмрөг тас шувуу өсөх хандлагатай байгааг тогтоожээ.
Шувууны ихэнх тоо толгойг нөмрөг тас эзэлж байгаа бөгөөд цогцолборт газрын бүс нутаг дахь тархалтыг нь ажиглахад Баян зүрх, Баруунсайхан уул, Их газрын чулууны ууланд голлон нутагшсан байна.
Их газрын чулууны хамгаалалтын захиргааны судлаач Ш.Намсрайжав хэлэхдээ “Хэд хэдэн удаагийн судалгаа хийж, харьцуулсаны үндсэн дээр байнга нутагшсан болон нүүдэллэн ирдэг шувууны тоо толгой, төрөл зүйлийн өсөлтийг нарийвчлан гаргах боломжтой болно” гэжээ.