НҮБ-ын Хүний эрхийн зөвлөл дэх ОХУ-ын гишүүнчлэлийг түдгэлзүүлэв DNN.mn

НҮБ-ын Ерөнхий ассамблейн 11 дэх удаагийн тусгай чуулганаар ОХУ-ыг Украинд хүний эрхийг системтэйгээр зөрчсөн, Олон улсын хүмүүнлэгийн хуулийг зөрчсөн зэрэг үндэслэлээр Хүний эрхийн зөвлөлийн гишүүнчлэлээс түдгэлзүүлэх тухай тогтоолыг баталлаа.

Ингэснээр ОХУ хүний эрхийн асуудлаарх шийдвэр гаргах түвшинд санал өгөх эрхгүй болсон ч, зөвлөлийн хуралд оролцох эрх нь нээлттэй, нөгөө талдаа энэ нь хүний эрхийн чиглэлээр хүлээсэн үүргээсээ чөлөөлөгдөх үндэс болохгүй гэсэн үг юм.

2006 онд байгуулагдсан НҮБ-ын Хүний эрхийн зөвлөлд байнгын гишүүний статус байдаггүй. Иймд энэ тогтоол нь зөвхөн одоогийн ОХУ-ын гишүүнчлэлд нөлөөлөх юм байна. Өөрөөр хэлбэл, 2023 онд ОХУ-ын НҮБ дахь гишүүчлэлийн хугацаа дуусгавар болно. Үүний дараа Орос улс Хүний эрхийн зөвлөлийн гишүүнээр элсэх хүсэлтээ дахин гаргах боломжтой юм байна.

Швейцарын Женев хотноо төвтэй, 47 гишүүн орноос бүрддэг НҮБ-ын Хүний эрхийн зөвлөлийн дүрэмд хүний эрхийг системтэйгээр зөрчсөн тохиолдолд гишүүний статусыг хүчингүй болгох тухай заасан байдаг юм байна.

Мөн НҮБ-ын дүрмийн дагуу Хүний эрхийн зөвлөлийн гишүүнчлэлийг түдгэлзүүлэх тухай тогтоолыг Ерөнхий ассамблейн гишүүн 193 орны гуравны хоёрын саналаар батлах ёстой. Энэ удаагийн санал хураалтад 93 гишүүн дэмжиж, 24 гишүүн эсэргүүцсэн бол 58 гишүүн түдгэлзсэн санал өглөө.

Энэ удаагийн санал хураалтаар 58 гишүүн түдгэлзсэн санал өгсөн нь Ази болон Африкийн олон орон дотооддоо хүний эрхийн зөрчилтэй байгаатай холбоотой болов уу гэж олон улсын ажиглагч, шинжээчид дүгнэж байна.

ОХУ НҮБ-ын Хүний эрхийн зөвлөлөөс хасагдсан хоёр дахь улс болж байна. Үүнээс өмнө 2011 онд Муаммар Каддафигийн дэглэм иргэдийнхээ эсэргүүцлийн жагсаалыг хүч хэрэглэн дарсан, энэ нь хүний эрхийг зөрчсөн үйлдэл гэж үзэж Ливи улсын гишүүнчлэлийг түдгэлзүүлж байжээ.