НИТХ-ын Тэргүүлэгчдийн өнөөдөр хуралдаанаараа нийслэлийн дагуул Налайх хотын Захирагчийн сонгуулийн Нэгдсэн хороог байгуулах тухай асуудлыг хэлэлцэн баталлаа. Тодруулбал, тус хотын Захирагчийн сонгуульд нэр дэвшигчдийг энэ 19-25-ны өдрүүдэд бүртгэх гэнэ. Нэр дэвшигчийг нэгдсэн хороо бүртгэж, үнэмлэх олгох бөгөөд бүртгэхдээ баримт бичиг үнэн зөв, гүйцэд эсэх, нэр дэвшүүлэх үйл ажиллагаа хууль тогтоомжийн дагуу явагдсан эсэхийг нягтлан шалгаж, бүртгэх юм байна. Ингээд бүртгэснээс хойш гурав хоногийн дотор оршин суугчдад мэдэгдэх юм байна. Ингээд Захирагчийг сонгон шалгаруулах өдрийг тусгайлан товлох гэнэ.
НИТХ-аас нийслэлийн эдийн засгийн дэд бүтцийг тэнцвэртэй хөгжүүлэх, хүн амын хэт төвлөрөл болон хотын хангамж, үйлчилгээ, аж ахуйн үйл ажиллагааг зохицуулах, оршин суугчдын нийгмийн асуудлыг шийдвэрлэх, байгаль орчны зохистой харьцааг хадгалах зорилгоор ийнхүү дагуул хот байгуулахаар болсон. Өөрөөр хэлбэл нийслэлийн дагуул- Багануур хотыг Багануур дүүрэгт, нийслэлийн дагуул-Налайх хотыг Налайх дүүрэгт байгуулахаар төлөвлөж буй юм. Ийнхүү эхний ээлжинд дагуул хотын захирагчийг шалгаруулснаар дараа дараагийн төлөвлөгөө, ажлыг боловсруулах төлөвлөх боломжтой болно гэж хотын удирдлагууд үзэж байна.