Гадаад харилцааны яамны удирдлагууд өнөөдөр хэвлэл мэдээллийнхэнтэй уулзах үеэрээ “Мянганы сорилтын корпорацийн II компакт гэрээний шалгаруулалтад манай улс тэнцэх эсэх шийдвэр өнөөдөртөө багтаж гарна” хэмээн мэдээллээ.
Америк-Ойрхи Дорнод Африкийн газрын захирал Д.Гансүх энэ тухайд, “Хоёр орны ГХЯ-д хоорондын 11 дүгээр улстөрийн зөвлөлдөх уулзалт энэ сарын 1-нд Вашингтон хотноо амжилттай болж өнгөрлөө. Мянганы сорилтын корпорацийн II компакт гэрээ байгуулахаар манай улс сүүлийн 2-3 жил ажиллаж буй. Манай улсад өмнө нь АНУ-ын Мянганы сорилтын корпорацийн I компакт гэрээ амжилттай хэрэгжиж дууссан. Манай улс МСК-тай уг гэрээ байгуулах боломжтой улсаар дахин шалгарах эсэх асуудлын шийдвэр өнөөдөр гарна. Мянганы сорилтын сангийн хоёр дахь компакт гэрээний шалгаруулалт өнөөдөр болно. Үр дүн нь тэр тухайдаа сайт дээр нь мэдээлэгдэнэ. Мөн АНУ-ын талаас тодорхой түвшинд мэдээлнэ. Шалгаруулалтад тэнцсэн тохиолдолд төслийнхөө техник эдийн засгийн үндэслэлийг гаргахад бэлэн байна. Бэлтгэлээ хийгээд явж байна. 2017 оны 9 сар гэхэд гарын үсэг зурах хуваарьтай” гэв.