Манай хөлбөмбөгийн үндэсний шигшээ баг “AFC Solidarity Cup” тэмцээний эхний тоглолтоо өчигдөр Макаогийн багтай хийж 2:1-ээр хожигдлоо.
Манай багийн хувьд дахин хоёр тоглолт байгаа. Азийн хөлбөмбөгийн холбооноос чансаа бага, зэрэглэл доогуур багуудыг байнгын бэлтгэлтэй байлгахын тулд “AFC Solidarity Cup” /Эв нэгдлийн цом/ тэмцээнийг зохион байгуулдаг. Энэ жил анх удаа Малайзын нийслэл Куала Лумпур хотноо болж буй тус тэмцээнд Бруней, Макао, Монгол, Балба, Лаос, Шри Ланка, Зүүн Тимор улс оролцож байна.
Өчигдөр “В” хэсгийн тоглолтууд эхэлсэн. Монгол, Макаогийн тоглолтын эхний үеийн 45 минут 1:1 оноогоор өндөрлөж хоёр дахь үед манай хаалгачийн гаргасан алдааг Николас Таррао сайтар ашиглаж, хожлын гоолыг орууллаа. Манай цорын ганц гоолыг М.Төгөлдөр 29 дэх минутанд оруулжээ.
Манай баг энэ сарын 6-нд Шри Ланка, 9-нд Лаостой тоглох юм. Хэсгийн шатанд эхний хоёрт орсон баг хагас шигшээд өрсөлдөх эрх авна.