Хэдхэн хоногийн өмнө болсон Үндэсний улсын аварга шалгаруулах үсчин гоо засалчдын уралдаанд Ражив Гандийн нэрэмжит Үйлдвэрлэл урлалын политехникийн коллежийн 14 оюутан амжилттай оролцсон байна. Энэ удаагийн уралдаанд аваргалж алтан медаль хүртсэн тус коллежийн Үс мастер технологичийн 2а ангийн оюутан Ж.Мөнгөнсувдтай ярилцлаа.
-Яагаад үсчин болохоор шийдэж энэ сургуулийг сонгосон талаар яриагаа эхлэх үү?
-Нэг эгч маань үсчин. Их мундаг үсчин л дээ. Түүнийг хэрхэн үс тайрч байгааг хараад би ч гэсэн үсчин болж чадах юм шиг санагддаг байсан. Гэхдээ Үйлдвэрлэл урлалын политехникийн коллежийг сонгох болсон шалтгаан нь гэвэл бас нэг эгч маань энэ сургуулийг төгссөн. Маш сайн сургууль, сургалт сайтай, төгссөн хүүхдүүд ч нэр хүндтэй байдаг гэж хэлснийг сонсоод л орохоор шийдсэн юм.
-Та оюутан боловч улсын хэмжээний тэмцээнд оролцож алтан медаль хүртлээ. Олон жил ажилласан туршлагатай үсчингүүдтэй өрсөлдсөн. Таныг түрүүлэхэд хэр хүлээн авав?
-Мундаг үсчингүүдээс урмын сайхан үг сонссон. Уралдааны үеэр засалтаа хийчихээд гарч ирэхэд таван удаа тивийн аварга болж байсан үсчин Алтаншагай ах надад “Мундаг байна, сайн хийсэн байна, баяр хүргэе” гэсэн. Ингэж хэлсний дараа хүмүүс надад “Чиний хийсэн засалтыг шүүгчид их хараад байна. Ер нь боломжийн хийсэн бололтой” гэж хэлсэн. Энэ тэмцээнд оролцоход сургуулийн маань дэмжлэг туслалцаа маш их хэрэгтэй байсан.
Намайг оюутан болж энэ сургуульд орж ирснээс хойш тэмцээн уралдаанд оролц гэж байнга шахаж шаарддаг байлаа. Багш нар маань “Чи оролцох ёстой, хичээ, хий, бэлд” гэж байнга хэлдэг. Үүний үр дүнд би энэ медалиудыг авсан гэж боддог.
-Оролцсон төрөл, хийсэн засалтынхаа талаар манай уншигчдад сонирхуулаач.
-Техникийн төрлөөр оролцсон. Эмэгтэй креатив засалт хийсэн. Ер нь бол нэлээн хүнд, тэр болгон үсчид хийгээд байдаггүй. Эмэгтэй, эрэгтэй креатив гэдэг маань дэлхийн хэмжээний тэмцээн дээр хийгддэг засалт.
-Та сая энэ бол нэлээд хүнд төрөл нь гэж хэллээ. Чухам юу нь хүнд байдаг юм бол?
-Энэ засалтыг хийхдээ сэнс, лак ашиглаад өөрийн төсөөлөлд байдаг зүйлээ үсээр илэрхийлнэ гэсэн үг. Үүнд маш олон төрлийн тайралт ордог, өнгөний уусалт, зохицолдоо гэх мэт. Орчин үеийн трендийг хүртэл тусгаж өгдөг маш нарийн ажиллагаатай. Хүн харахад хэлбэржүүлээд будаг тавьсан юм шиг санагдах боловч хийхэд маш нарийн ажиллагаа шаарддаг.
-Энэ тэмцээнд оролцохдоо ийм засалт хийнэ гэдгээ хэзээ шийдэж аль хэр удаан бэлдэв?
-Нэг их удаан бэлдээгүй. Багш нартайгаа ярилцаад олон улсын тэмцээнүүдийн засалтуудаас санаагаа авсан. Яагаад гэхээр сүүлийн үеийн чиг хандлагыг тусгаж өгсөн байх шаардлагатай гэж удирдамжинд заасан байлаа. Багш нартайгаа нийлж судалгаа хийж, өнгө зэргээ сонгосон. Монгол Улсын мастер үсчин Балжинням, Одгэрэл, Булгантуул багш нар маань намайг дасгалжуулж бүгд л дэмжсэн.
-Танай Үйлдвэрлэл урлалын политехникийн коллежийн зүгээс нэлээд дэмжлэг үзүүлсэн гэсэн. Энэ талаараа тодруулаач?
-Манай сургуулиас уг тэмцээнд оролцсон оюутнууддаа туслалцаа үзүүлж засалт хийдэг шинэ маникюр буюу толгой өгсөн байгаа. Тэр нь нэлээд үнэтэй л дээ. Түүнээс гадна тэмцээний бүртгэлийн хураамжийг төлснөөр том боломж олгосон.
-Мэргэжлийн өндөр түвшний үсчидтэй өрсөлдөж байхдаа ялна гэж бодож байсан уу?
-Ялахын төлөө хичээсэн. Яагаад гэхээр манай сургуулийн захирал бидэнтэй уулзалт хийхдээ “Аль болох хичээх хэрэгтэй шүү. Бид та нарт боломжоороо тусалж байна” гэсэн. Ийм өндөр зардал гаргаж тусалж байхад нь хичээх ёстой юм байна гэж бодсон. Тэмцээний өмнөх өдөр би таван минут ч унтаж чадаагүй. Нойргүй бэлдсэн.
-Дараагийн удаа ямар тэмцээнд оролцох юмсан гэж бодож байна?
-Дараагийн удаа дэлхийн хэмжээний тэмцээнд оролцохыг хүсч байгаа. Аль болох энэ мэргэжлээ хөгжүүлэхийг эрмэлздэг. Миний боддог ганц зүйл гэвэл дэлхийн хэмжээний үсчин болох. Тиймээс дараагийн удаа дэлхийн хэмжээний тэмцээнд оролцохын төлөө хичээх болно. Хамгийн гол нь энэ мэргэжлийг заалгасан сургуулийнхаа нэрийг, Монгол Улсаа авч явна гэж боддог.