Ерөнхийлөгч, Ерөнхий сайд, УИХ-ын дарга нар маань хоёр тийшээ харж суучихаад түнжин муутай байгааг түмэн олон харж байна. Монгол төрийн түүхэнд Төрийн гурван өндөрлөг ингэж толхилцож байсан удаагүй. Бие биеэ унагаах угсраа мэхийг сөргүүлэн хийцгээж байна. Төрийн ордон дотроо орон даяар шууд цацаж байгаа телевизийн камерийн өмнө, ширээний наана, цаанаас нэгнийгээ доромжлон, тохуурхцгаах боллоо. “Хулгайч”, “Худалч”, “Луйварчин”, “Ард түмнийхээ хөрөнгийг шаадаг” гэж хэрэлдэж байсныг санахгүй юм. Сүүлийн хэдэн хоног, өдөр бүр Төрийн гурван удирдлагынхаа гаргаж байгаа авир, ааш аягийг харж байх нь ээ “Одоо яах бол” гэж өмнөөс нь яс хавталзаж, ичдэг болов.
Засгийн газрыг огцруулах асуудлыг Төрийн байгуулалтын байнгын хороо дэмжчихсэн. Тэгэхээр энэ асуудал өнөө, маргаашгүй чуулганы нэгдсэн хуралдаанаар орно. Хэлэлцэх хуулийн хугацаа нь энэ долоо хоногоор дуусч байгаа. У.Хүрэлсүхийн танхимын хувь заяа чуулганаар шийдэгдэнэ. Энэ үеэр бид үзээгүй юмаа их үзэж, дуулаагүй сонин хачинаа сонсох байх даа.
Ерөнхий сайд нь огцрохгүйн тулд яаж дөвчигнөж, донгосох бол. Өөдөөс нь УИХ-ын дарга М.Энхболд нь ямар, ямар баримтууд гаргаж тавих бол. Ерөнхийлөгч маань У.Хүрэлсүхээ өмөөрч орж ирээд юу, юу гэх бол. Эрх ашгийнхаа төлөө тэмцэлдэж буй олигархуудын ээлжит жүжгийг эндээс л үзнэ дээ. Одоо бид тэднийг юу ч гэж хэлсэн тоохооргүй болсон. Бүгд тавилттай үзүүлбэр гэдгийг мэддэг боллоо.
Ард түмэнд хандаж ганц захих юм нь энэ гурвын зохион байгуулсан үймээн самуунд л битгий автаарай. “Монголчууд үүнийг л хүсч байна” гээд өөрсдийнхөө зорилгыг биелүүлэхийн тулд та, бидний нэрийг барьж нийгмийг өдөөн турхирч мэднэ. Энэ бүгд зохион байгуулалттай жүжиг. Эцэст нь ард түмэн хохирно шүү.
Монгол Улс парламентын засаглалтай, тэрийгээ иргэд, сонгогчдынхоо саналаар шийдчихдэг сонгуультай байхад юм, юмны учир олдоно. Тэр үед энэ гурваас салахаа ард түмэн мэднэ ээ.