УОК-ын Шуурхай штабаас мэдээлэл хийлээ. ГХЯ-ны Консулын газрын дарга Л.Мөнхтүшиг тусгай үүргийн онгоцоор иргэдээ авчрах асуудлаар мэдээлэл хийлээ. Тэрбээр “IV сарын 2-нд Сөүл, 3-нд Токио руу тусгай үүргийн онгоц илгээн иргэдээ татан авах бэлтгэлээ хангаж байна. Энэ онгоцоор өмнө нь Элчин сайдын яаман дээр өөрийн биеэр очиж бүртгүүлсэн иргэдийг татан авна. Онгоцны тийзийг бичих явцад зарим иргэд нутаг буцахаа болих зэрэг асуудал гарч байна. Энэ тохиолдолд дараагийн иргэнд боломж олгоно. Энэ ажилд МИАТ, ЭСЯ-ны ажилчид авлига авсан асуудал байхгүй. IV сарын 3-нд ирэх иргэд өмнө нь бүртгүүлсэн байсан. Тухайн зорчигчидтой нэг бүрчлэн холбогдож билетийг нь баталгаажуулж байна.
Элчин сайдын яамд утсаа авахгүй байна гэсэн гомдол гарсан. Энэ бол ташаа мэдээлэл. Хилийн чанадад буй 44 Элчин сайдын яам, Консулын газрын ажилтнууд өндөржүүлсэн бэлэн байдалд ажиллаж байна. Бусад орноос ирэх иргэд яах вэ гэдэг гомдлыг хүлээн авч байна. Гомдол, саналыг нэгтгэж байна. Өнөөдрийн байдлаар 45 газар нутгаас 5600 иргэн ирэх хүсэлтээ гаргасан. Эдгээр иргэдийг газар газраас нь очоод авах боломж байхгүй гэдгийг Ерөнхий сайд хэлсэн. Хамгийн боломжит арга хэмжээг авч байна.