Технологи, биотехнологийн үсрэнгүй хөгжлийн эрин үед хүн төрөлхтөн амьтдыг хувилан үржүүлэх боломжтой болсон. Өөрөөр хэлбэл, сайн үүлдрийн амьтад төрүүлэхийн тулд өндөр үнээр худалдаж авдаг, олон жил маллагаа арчилгаа хийдэг, хээлтүүлдэг ажил ард хоцрох нь.
Тухайлбал, Хятадын Тяньжин хотод дэлхийн хамгийн том амьтан хувилах клонийн үйлдвэр барих төслийг хэрэгжүүлэхээр болсон тухай өнгөрсөн мягмар гаригт мэдээлжээ. Хамгийн том клонийн үйлдвэрийг Хятад, Өмнөд Солонгос улс хамт барихаар болсон юм. Тодруулбал, Хятадын био эмчилгээ, биотехнологиор мэргэшсэн “Boyalife Group” хувьцаат компани болон Өмнөд Солонгосын биотехнологын “Sooam” компанийн хувь нийлүүлсэн охин компани болох “Sinica” барилгын ажлыг гардан гүйцэтгэх аж.
Амьтдын клонийн үйлдвэрт жилд ойролцоогоор сая гаруй махны зориулалттай үхрийг үйлдвэрлэх аж. Мөн үнэрч ноход болон ховор үүлдрийн гэрийн тэжээвэр ноход, уралдааны морьд зэргийг ихээр гарган авна. “Синьхуа” агентлагийн мэдээлснээр Тяньжиний Эдийн засаг, технологийн хөгжлийн газраас хэрэгжүүлж буй тус үйлдвэрийн барилга байгууламжид нийт 200 сая юань зарцуулах юм. Дотроо судалгааны лаборатори, клоноор хувилах төв, амьтдын генийн банк, үзэсгэлэнгийн танхим зэрэг цогц төв байх гэнэ.
Үйлдвэрийн барилгын ажил аль хэдийнэ эхэлсэн бөгөөд ирэх оны зургадугаар сард ашиглалтад оруулахаар төлөвлөжээ. Ийм үйлдвэр барих нь олон талын ашигтай гэдгийг хоёр орны эрдэмтэд холбогдох албаны хүмүүс онцолж байна. Үхрийн сайн чанарын махны хэрэгцээг хангах, худалдаа үйлчилгээг сайжруулах, ховор амьтдын үүлдэр угсаа, чанар чансааг сайжруулж, хамгаалахаас гадна үргэлж маргаан дагуулж байдаг биотехнологийн шинжлэх ухааны хөгжлийг хүлээн зөвшөөрүүлэх хамгийн том алхам байх болно хэмээн “Boyalife Group” компанийнхан үзэж байгаа юм.
Хоёр орны эрдэмтэд, биотехнологичид эсийн нөхөн төлжих чадвар, үүдлийн тал дээр анагаах ухааны суурьтай судалгаа хийж эхэлжээ.
“Boyalife” группийн ерөнхийлөгч Сюй Сяочуний мэдэгдсэнээр, үйлдвэрлэл жилд үхрийн 100 мянган эмбрион өсгөх хүчин чадалтай учир дотоодын зах зээл дээр энэ төрлийн махны дутагдлыг нөхөж чадах гэнэ.
Хятадын эрдэмтэд 2000 оноос хойш клонийн аргаар хонь, үхэр, гахай гарган авч байжээ.Түүнчлэн анхны албан ёсны клонийн компани болох “Sinica”-г 2014 онд Шаньдун мужид нээсэн бөгөөд тухайн үедээ цэвэр цусны гурван Түвд банхрын гөлөг гарган авсан байна. Тус компани нь Хятадын “ Boyalife” болон Өмнөд Солонгосын биотехнологийн “Sooam” корпорацийн хамтарсан хөрөнгө оруулалттай компани юм.
“Sinica” компани нээгдсэнээс хойш нисэх онгоцны буудал, цагдаагийн албан газар, үйлчилгээний байгууллагуудад ажиллах 550 гаруй мөрч нохойг үйлдвэрлэн гаргаж байжээ. Харин Өмнөд Солонгост 2008 онд гаалийн албанд Канадын лабрадор-ретривер үүлдрийн эрэлч нохойноос гарган авсан долоон гөлгийг сургаж дадлагажуулж байсан аж.
Амьд организмыг клонийн буюу эсийн аргаар хувилан үржүүлэх судалгаа шинжилгээний ажил 1990-ээд оноос эхэлж байсан бөгөөд 1996 онд энэ аргаар Шотландад Долли нэртэй хонь “төрүүлэн” өсгөж байсан билээ. Үүний дараахан хулгана, ямаа, гахай, үхэр зэрэг сүүн тэжээлт амьтдыг амжилттай хувилан үржүүлж эхэлсэн. Гэвч Европ болон барууны ихэнх орнуудад амьтдыг клонийн аргаар олшруулан хувилахыг хуулиар хориглосон юм. Харин анагаах ухаан, эмчилгээний хүрээнд хүний эд эрхтнийг генийн аргаар гарган авч, өмнө нь эмчлэх боломжгүй байсан өвчнийг эмчлэх болсон билээ.