Өнгөрсөн долдугаар сарын 30-ны өдрийн 16:30 цагт тарваган тахал өвчний сэжиг бүхий тохиолдол гарсан тухай мэдээлэл Баянхонгор аймгийн Онцгой байдлын газарт бүртгэгджээ. Тодруулбал, 24 настай, Баянхонгор сумын иргэн Ц өндөр халуурч, бөөлжилт, суулгалт, хордлогын шинж тэмдэгтэйгээр Баянхонгор аймгийн Нэгдсэн эмнэлэгт хүргэгдэн очсон байна.
Эмч нарын үзлэг, өвчтөний өгсөн мэдээлэл зэрэгт үндэслэн түүнийг тарваган тахал өвчнөөр өвчилсөн байх магадлалтай хэмээн үзэж, Халдвартын тасагтаа хэвтүүлэн, нэгдүгээр хавьтлын хүмүүсийг нь тусгаарлажээ.
Иргэн Ц амралт зугаалгаар Баянцагаан суманд очсон үедээ тарваганы мах идсэн бөгөөд түүнээс хойш дээрх өвчний шинж тэмдгүүд илэрчээ. ХӨСҮТ-д өвчтөний шинжилгээг нарийвчлан шалгаж, тарваган тахал өвчин биш болохыг тогтоосон байна.