Монголын хөл бөмбөгийн холбооны Ерөнхийлөгч Б.Ганболдод “FIFA”-гаас таван жилийн хугацаатай хориг тавьжээ. Түүнийг авлига авсан хэмээн гадаад болон дотоодын хөлбөмбөгийн бүхий л үйл ажиллагаанд оролцох эрхийг нь хасаад буй. Тэгвэл уг асуудалтай холбогдуулан Монголын хөл бөмбөгийн холбооноос мэдээлэл хийнэ гэсэн ч сэтгүүлчдийг дотогш нэвтрүүлсэнгүй. Мөн тус холбооны гишүүдийг ч оруулахгүй байна. Яг одоо Монголын хөлбөмбөгийн холбооны байрны гадна тус холбооны гишүүд, дэмжигчид, тамирчид цуглаад байна. Тэд хөлбөмбөгийн холбооны дүрмийн дагуу их хурлыг хуралдуулах ёстой хэмээн үзэж, гишүүдээс гарын үсэг цуглуулж эхэлжээ. Гарын үсэг цуглуулах үйл ажиллагаа өнөөдөр 21.00 цагт хүртэл үргэлжилнэ гэдгийг гишүүд, дэмжигчид хэлж байна.