“Хүйс толгойн бичээс 1420 жил” олон улсын эрдэм шинжилгээний цахим хурал энэ сарын 15-нд болж өндөрлөлөө.
Монгол Улсын Хэлний Бодлогын Үндэсний Зөвлөл, Шинжлэх ухааны академийн Археологийн хүрээлэн, Монгол Брахми бичгийн олон улсын нийгэмлэгээс хамтран зохион байгуулсан уг хуралд таван орны 12 эрдэмтэн илтгэл тавьж, 40 гаруй эрдэмтэн, судлаач сонсогчоор оролцлоо. Уг хурлыг Хэлний бодлогын үндэсний зөвлөлийн дарга, Шинжлэх ухааны доктор, профессор, ардын багш С.Дулам нээж үг хэлсэн бол ШУА-ийн Археологийн хүрээлэнгийн захирал, доктор, дэд профессор Г.Эрэгзэн хуралд оролцогчдод мэндчилгээ дэвшүүлэв.
Хурлын даргаар С.Дулам багш, чиглүүлэгчээр Хэлний бодлогын үндэсний зөвлөлийн Ажлын албаны гадаад харилцааны мэргэжилтэн, доктор А.Мөнхцэцэг нар тус тус ажиллалаа.
Доктор А.Мөнхцэцэгийн “ЮНЕСКО-гийн “Дэлхийн дурсамжийн олон улсын бүртгэл”-д “Хүйс толгойн бичээс-1″-ийг нэр дэвшүүлэх ажлын явц”, доктор, профессор С.Дуламын “Хүйс толгойн бичээст буй зарим үг хэллэгийн соёл бэлгэдлийн утгыг мөшгөх нь”, Монгол-брахми бичгийн олон улсын нийгэмлэгийн тэргүүн, доктор Солонгод Хурцбаатарын “Хүйс толгойн бичээсийн хэлзүйн судалгаа”, доктор, дэд профессор Ю.Болдбаатарын “Хүйс толгойг тайлга, тахилгын газар орноор сонгосон учир холбогдлын тухайд” зэрэг сонирхолтой илтгэл хэлэлцүүлэгдлээ.
Монгол-Брахми бичгийн судалгааны ажил хүчээ авч, судлаач, эрдэмтэд, төрийн бус байгууллагууд уг бичигт анхаарал хандуулж эхэлсэн нь хурлаас анзаарагдлаа. Одоогоор уг бичгийг Солонгод Хурцбаатар багш ойролцоогоор 80 гаруй эрдэмтэн, судлаач, хэлний багш нарт заасан бөгөөд энэ чиглэлээр цуврал найман ном, сурах бичиг хэвлүүлээд байгаа юм байна.
Судлаачид “Монголын бичиг үсгийн түүхийг урагшлуулсан монгол-брахми бичгийг бид нарийвчлан судалж, түгээх нь чухал болоод байна. Цаашлаад 2023 онд ЮНЕСКО-д бүртгүүлэхийн тулд энэ чиглэлээр ажилладаг хүн бүр идэвхийлэн ажиллах хэрэгтэй” гэж байлаа.
Одоогоор ЮНЕСКО-гийн “Дэлхийн дурсамж хөтөлбөр”-ийн өвийн жагсаалтад Монгол Улсаас “Лу алтан товч”, “Монгол шунхан Данжуур”, “Есөн эрдэнийн Ганжуур”, “Данжуурын гэрэлт хөшөө”, “Сахиусан Дара эх”, “Мэргэд гарахын орон нэр томъёоны толь бичгийн модон бар” гэсэн өвүүд бүртгэлтэй юм байна.