Гадаад худалдааны 2021 оны гүйцэтгэлийг Гаалийн ерөнхий газраас танилцуулав.
Экспортын 258519, импортын 246012 гаалийн мэдүүлгийг болон бусад эх сурвалжийг үндэслэн дараах гүйцэтгэлийг гаргасан байна. Үүнээс тайлангийн хугацаанд нээгдэж ажилласан түр боомтоор нэвтрүүлсэн экспортын 12620, импортын 4093 мэдүүлэг байжээ.
2021 онд гадаад худалдааны нийт бараа эргэлт 16095.8 сая ам.доллар болж, 2020 оны мөн үеэс 3220.5 сая ам.доллар буюу 25 хувиар өсчээ.
Экспорт импортын дүнгээс 2398.5 сая ам.доллараар давж, гадаад худалдааны баланс эерэг гарлаа. Экспортод 9247.1 сая ам.долларын бараа, түүхий эд гаргасан нь өнгөрсөн оны мөн үетэй харьцуулахад 22 хувиар өссөн байна. Экспортын барааны 99 хувийг валютын төлбөртэй худалдаа эзэлж байна.
Экспортын барааны нийт дүнд
- Эрдэс бүтээгдэхүүн 7516.0 сая ам.доллар буюу 81 хувь;
- Ургамлын гаралтай бүтээгдэхүүн 89 сая ам. доллар буюу 1.0 хувь;
- Сувд, үнэт ба хагас үнэт чулуу, үнэт металл, гоёлын зүйлс 1025.4 сая ам. доллар буюу 11.1 хувь; Хүнсний бэлэн бүтээгдэхүүн 47 сая ам.доллар буюу 0.5 хувь;
Нэхмэлийн материал болон нэхмэл эдлэл 370.7 сая ам.доллар буюу 4.0 хувийг тус тус эзэлжээ. Эдгээр нь нийт экспортын дүнгийн 97 хувийг эзэлж байна.
2021 онд экспортолсон боловсруулаагүй нефть, төмрийн хүдэр, зэсийн баяжмал болон цайрын баяжмалыг 100 хувь, чулуун нүүрсний 92 хувийг БНХАУ-д; жоншны 72.6 хувийг БНХАУ-д, 27.4 хувийг ОХУ-д; үхэр адууны боловсруулаагүй ширний ихэнх хувийг БНХАУ-д; үхэр адууны боловсруулсан ширний 84.3 хувийг Италид, самнасан ноолуурын 70.0 хувийг Италид, 14.4 хувийг Их Британид; ямааны угаасан ноолуурыг 100.0 хувь БНХАУ-д, боловсруулаагүй буюу хагас боловсруулсан алт 15.4 хувийг БНСУ-д, 84.6 хувийг Швейцарт тус тус экспортолж дээрх нэрийн бараа нь экспортын нийт дүнгийн 92.0 хувийг эзэлж байна.
Монгол улс дэлхийн 64 оронд бараа экспортолсноос
БНХАУ-д 82.6 хувь,
Швейцарт 9.4 хувь,
Сингапурт 2.8 хувь,
БНСУ-д 2.4 хувь тус тус ногдож, нийт экспортын 97 хувийг дээрх орнууд эзэлжээ.