БНСУ-ын Пёнчан хотод өвлийн олимп нээлтээ хийхэд 36 хоногийн хугацаа үлдлээ. Өвлийн олимпын хувьд цагаан хуудас болон нэмэлт эрхээр оролцох боломжгүй байдаг. Одоогоор гүйлтийн цанын тамирчин ОУХМ Б.Ачбадрах, Ч.Отгонцэцэг нарын тамирчид цагийн үзүүлэлтээр эрхийн болзол хангаж, олимпын наадамд уралдана. Гэхдээ гүйлтийн цанаар дахин нэмэлт эрх авах боломжтой бөгөөд энэ сарын 22-д эцсийн байдлаар тамирчдын нэрс тодрох аж.
Тэшүүрийн тамирчид олимпын эрх олгох тэмцээнүүдэд оролцсон ч хараахан цагийн болзол биелүүлж чадаагүй байна. Харин биатлоны шигшээ багийн тамирчид Европт зохиогдож буй цуврал тэмцээнүүдэд оролцож буй бөгөөд нэг эрх авах боломж байгаа аж. Мөн пара цаначин Б.Ганболд эрхээ авсан бөгөөд түүний хувьд хоёр дахь удаагаа өвлийн олимпт хүрч сорих гэж байна.