Хан-Уул дүүргийн нутагт шинээр баригдаж байсан барилгаас өнөөдөр хоёр хүн унаж, нэг хүн амиа алджээ.
Хэргийн тухай Цагдаагийн байгууллагаас тодруулахад “Хан-Уул Дүүрэг 17 дугаар хороо Маршал таун хотхон дотор барилгын өргүүр унасны улмаас хоёр хүн унасан, нэг нь нас барсан гэх дуудлагыг өнөөдөр 16:00 цагт хүлээн авч, мөрдөн шалгах ажиллагааг явуулж байна.
Шалгалтаар тус дүүргийн 17 дугаар хороо Маршал таун хотхоны хашаан дотор урд хэсэгт шинээр баригдаж байгаа барилгын зургаан давхарт гадна шилэн фасад хийж байсан ажилтан 35 болон 37 настай хоёр эрэгтэй доош унаж, нэг эрэгтэй нас барж, нэг хүн нь Яаралтай түргэн тусламжаар эмнэлэгт хүргэгдсэн байна.
Тус хэргийн шалгалтын ажиллагааг Хан-Уул дүүрэг дэх цагдаагийн нэгдүгээр хэлтэс үргэлжлүүлэн явуулж байна” гэлээ.
Сануулахад, өчигдөр мөн тус дүүргийн 18 дугаар хороонд баригдаж байсан барилгын кран унасны улмаас ажиллаж байсан хоёр хүн амиа алдаж, нэг хүн хүнд гэмтээд байгаа юм. Тухайн хэргүүдтэй холбоотойгоор ЦЕГ-ын Мөрдөн байцаах албанаас ажлын хэсэг гаран шалгаж эхэлсэн байна.