“Гэртээ ганцаараа” бол инээдмийн киноны түүхэнд хамгийн өндөр орлого авчирсан бүтээл юм. Жил бүрийн шинэ жилийн баярын суваг болгоноор гардаг ч хэзээ ч уйдамгүй байдаг нь ямар сайн бүтээл болсныг илтгэдэг. Уншигчдадаа энэхүү киноны тухай үзэгчдийн тэр бүр мэддэггүй 14 сонирхолтой баримтыг дэлгэе.
1. Маколей Калкины тоглосон анхны кино болох “Авга ах Бак”-ийн ганц л үзэгдлээс “Гэртээ ганцаараа” киноны ерөнхий санааг авчээ. “Авга ах Бак” кинонд Калкин хаалган дахь шуудангийн завсраар хүүхэд асрагчийг шалгаадаг хэсэг гардаг бол “Гэртээ ганцаараа”-д яг энэ үзэгдлийг хуулбарлан авч, жүжигчин Дэниэл Стернээр орлуулжээ.
2. Дэниэл Стерний нүүрэн дээрх аалзтай хэсгийг авахад тэрбээр үнэндээ хашгираагүй ажээ. Хэрвээ хашгирсан бол аалз үргэж мэдэх байсан тул орилж буй царай гаргаж дараа нь дуу оруулсан байна. Жүжигчний хувьд түүн шиг нүүрэн дээрээ аалз тавиулах хүн ховор бөгөөд энэ хэсгийг бүтээхийн тулд ганц л дубль авчээ.
3. Жүжигчин Жон Кэндигийн тоглосон бүх үзэгдлийн зургийг тасралтгүй 23 цагийн турш нэг хоногт багтаан авчээ.
4. Кевиний ах Баззын найз охины зургийг “царай муутай” болгохын тулд ерөнхий зураачийн хүүд хиймэл үс зүүн эмэгтэй болгон авчээ. Хэрвээ эмэгтэй хүүхдийн зургийг ашиглавал өсвөр насны охидыг доромжилсон хэрэг болно гэж найруулагч үзсэн байна.
5. Хулгайчийг киноны дуугаар айлгадаг үзэгдэлд 1938 онд хийгдсэн “Бузар царайтай сахиусан тэнгэрүүд” хэмээх киноны хэсгийг ашиглах гэсэн боловч хуурцаг зардаг дэлгүүрүүдээр хайгаад огт олдоогүй тул уран бүтээлчид нь зориуд “Гэртээ ганцаараа”-д зориулж “Хүн чанаргүй сахиусан тэнгэрүүд” хэмээх киног хийсэн байна.
6. “Гэртээ ганцаараа” кино 1990 оны арваннэгдүгээр сард нээлтээ хийснээсээ хойш олон сарын турш дэлгэцнээ гарчээ. Өөрөөр хэлбэл зарим кино театруудаар дараа оныхоо тав, зургаадугаар сар хүртэл гарч 12 долоо хоногийн турш “Box office”-ийг тэргүүлсэн байна. Мөн инээдмийн киноны төрөлдөө хамгийн өндөр буюу 533 сая ам.долларын ашиг олж, Гиннесийн номонд бичигджээ.
7. Кевин том ах Баззынхаа “Playboy” сэтгүүлийн 1989 оны долоодугаар сарын дугаарыг үзэж буй хэсэг гардаг. Тухайн үед сэтгүүлд плэймэйт буюу “Playboy”-ын модель, жүжигчин Эрика Элениакийн зураг нийтлэгдсэн байжээ.
8. Киноны постерийг алдарт зураач Эдвард Мункийн “Хашгираан” хэмээх бүтээлээс сэдэвлэн хийжээ.
9. Кинонд гардаг Маккалистерийн гэр бүлийн Чикаго хотын захад орших байшин нь үнэндээ 1920-иод онд Иллинойс мужийн Виннетка хэмээх газар баригдсан 395 метр кв. талбай бүхий, таван унтлагын өрөөтэй гурван давхар байшин юм байна. Кино гарснаас жилийн дараа 1.5 сая ам.доллараар зарагджээ.
10. Хадаасан дээр гишгэдэг хэсгийг авахад Дэниэл Стерн хөлөө резинэн улавчаар хамгаалжээ.
- “Аймшигт” Марли өвөөгийн тухай анх кино зохиолд бичигдээгүй байлаа. Гэвч зураглаач Крис Коламбус сэтгэл хөдөлгөсөн хэсэг оруулах ёстой гэсэн санаа гаргасны үндсэн дээр Кевин болон хөрш өвөө хоёрын дотно яриа өрнүүлдэг үзэгдлийг кинондоо оруулжээ.
- “Box Office”-т өндөр амжилт гаргаснаас гадна тус киногоор гурван видео тоглоом, ширээний тоглоом болон энэ сэдвээр нийт дөрвөн кино бүтээжээ. Тодруулбал, 1990 оны “Гэртээ ганцаараа”, 1992 оны “Гэртээ ганцаараа 2:Нью-Йокт төөрсөн нь”, 1997 оны “Гэртээ ганцаараа 3” болон 2002 оны телевизэд зориулсан “Гэртээ ганцаараа 4” кинонууд юм.
- Кино зохиол дахь Кевин Маккалистерийн үзэгдлүүдийг продюсер Жон Хьюз зөвхөн Маколэй Калкинд зориулж бичсэн ч найруулагч Крис Колумбус Калкиныг хамгийн тохирох хүүхэд гэдэгт эргэлзээгүй болохын тулд 100 гаруй хөвгүүдийн дунд шалгаруулалт явуулж байжээ.
- Кевины зохиосон тулааны төлөвлөгөөг Маколей Калкин өөрөө зуржээ.