Архангай аймгийн Цэнхэр сумын Орхон багийн нутаг “Будант тээл” гэдэг газарт гар аргаар олборлолт хийж байгаад осолдсон хоёр иргэний цогцсыг энэ сарын 29-ний өдөр гаргалаа.
Тус газар хоёр иргэн гар аргаар алт олборлож байх үед нь ухсан нүхний ханаар хиймэл нуурын ус задарч нүхийг усаар дүүргэж, дотор нь байсан хоёр иргэн гарч ирээгүй тухай дуудлага 2017 оны 01 дүгээр сарын 13-ны өдөр тус аймгийн Онцгой байдлын газарт ирсэн. Цогцсыг гарагж чадаагүй учир хохирогчдын ар гэрийнхний хүсэлтээр эрэн, хайх аврах ажиллагааг энэ сарын 22-ны өдрөөс түр зогсоогоод байсан юм.
Тус газарт алт олборлогч “Улз гол” ХХК-тай зөвшилцөж эрлийн ажлыг энэ сарын 27-ны өдөр дахин эхлүүлж тус компанийн ажилтнууд, Онцгой байдлын газрын болон Цагдаагийн албан хаагчид, нийт 30 хүн, 5 техник хэрэгсэлтэйгээр нуурын мөсийг хагалж 156 тэвш мөс зөөвөрлөж, энэ сарын 29-ний өдөр иргэн Э /26 настай/, Т /28 настай/ нарын цогцсыг олж Цагдаагийн байгууллагад шилжүүлсэн байна.