Энэ сарын 17-ны өдөр 3105 дугаартай ачааны галт тэрэг Бага-нуураас нүүрс ачаад ирж явахдаа 406-гийн гарам буюу Замын цагдаагийн урд талын призертэй авто гарам хүрэх гэж явахад зам түгжирч төмөр замын хаалт автоматаар бууж машинууд гацжээ. Хэдийгээр гармын жижүүр Н.Уянга замын хөдөлгөөн зохицуулж байсан цагдаа руу хашгирч машинуудыг явуулахыг хүссэн боловч тэрээр дуу чимээ ихтэйгээс болоод сонсоогүй байна. Ингээд тэрээр машинист руу цаг алдалгүй утасдаж “Зогс” гэдэг дохио өгчээ. Ингээд 70 км хурдтай явж байсан галт тэргийг машинист Т.Золбоо тооромсолж автомашинуудад метр хүрэхгүй зайнд ирэхэд нь галт тэргийг бүрэн зогсоож чадсан байна. Тэрээр “Ийм зүйл өмнө нь хэд хэд гарч байсан гэж ахмад машинистууд ярьж байсан, гэхдээ хүсэх юм биш байна лээ” хэмээн манай сонинд ярилцлага өгчээ.
Тухайн үед галт тэрэг 4533 тонн ачаатай, 208 голтой, 52 вагонтой байсан байна. Уг нь бол гарам руу машин орох ёсгүй, хаалт автоматаар буух ёстой юм байна. Энэ хэргийн талаар мөрдөн байцаалт үргэлжилж байгаа аж.
Өнөөдөр Улаанбаатар төмөр зам хувь нийлүүлсэн нийгэмлэгийн үр дүнгийн хурал болж машинист Т.Золбоог “Төмөр замчны алдар”, туслах машинист Э.Батсуурийг “Тэргүүний төмөр замчин” цол тэмдгээр шагнажээ.
О.ӨНӨР