Энэ удаагийн парламентад бие дааж сонгогдсон гишүүд нам байгуулж ирэх сонгуульд бэлтгэж буйгаараа онцлог байна. Тухайлбал Хөдөлмөрийн Үндэсний нам буюу ХҮН-ын ард Г.Ганбаатар байгаа нь тодорхой болоод буй. Тэрээр үүнийгээ ч улаан цагаан үгүйсгэхгүй байгаа. Мөн түүнийг энэхүү намаа ашиглаж 2017 оны Ерөнхийлөгчийн сонгуульд нэр дэвшинэ гэлцэж буй.
Харин УИХ-ын сонгуулиар Чингэлтэй дүүрэгт нэр дэвшиж парламентад сонгогдсон Г.Уянга өнгөрсөн долоо хоногт Улсын дээд шүүхэд шинээр нам байгуулах хүсэлт гаргасан ч түүний намыг Дээд шүүх бүртгэхээс татгалзсан гэсэн мэдээлэл байна. МҮАН-ын гишүүн тэрээр сүүлийн үед эвсэж буй МАХН-ын дарга Н.Энхбаярыг “Албан тушаал наймаалцахаас өөр ажил хийдэггүй” гэж хатуухан шүүмжлэх болсон билээ. Түүний ийнхүү зоригтой дуугарах болсон шалтгаан нь өөрийн гэсэн улс төрийн нам байгуулж, туурга тусгаарлахаас шийдсэнтэй нь холбоотой бололтой.