Бөхийн чөлөөт барилдааны залуучуудын ДАШТ Бразил улсын Сальвадор-да-Бахиа хотноо үргэлжилж байна. Дэлхийн 52 орны 400 гаруй бөх хүч үзэж буй энэхүү тэмцээнд Монгол Улсын зургаан бөх барилдана.
Өчигдөр эмэгтэйчүүдийн 44 кг, 51 кг, 59 кг, 67 кг-ын жингийн барилдаан болж, 51 кг-ын жинд Б.Мөнхтуяа барилдаж, 11 дүгээр байрт бичигджээ. Өнөөдөр эмэгтэй 48 кг, 55 кг, 63 кг, 72 кг-ын жингийн барилдаан болно. 48 кг-ын жинд “Алдар” спорт хорооны тамирчин Г.Отгонжаргал хүч үзнэ.
Монгол Улсын тамирчдын багийн ахлагчаар МЧБХ-ны дэд ерөнхийлөгч, “Хүчит чулуут” компанийн захирал Б.Батзаяа ажиллаж, өсвөр, залуучуудын шигшээ багийн ахлах дасгалжуулагч, “Алдар” спорт хорооны дасгалжуулагч, Гавьяат дасгалжуулагч Ц.Хосбаяр, Дархан-Уул аймаг, “Хасу-Мегастарс” клубын дасгалжуулагч Ё.Батдархан, Орхон аймгийн “Ирээдүйн одод” спортын дунд сургуулийн багш Б.Идэрсайхан нарын удирдлагад дөрвөн эрэгтэй, хоёр эмэгтэй бөх энэ тэмцээнд оролцож байна.