Нийслэлийн Цагдаагийн газар, Монголын сурагчдын холбоо, НИТХ, Нийслэлийн Боловсролын газар хамтран эцэг эхийн эргүүлийг энэ жил есдүгээр сарын 1-нээс эхлэн гаргахаар төлөвлөн ажиллаж байгаа гэнэ.
Монголын Сурагчдын Холбооны дарга н.Сэргэлэн “Есдүгээр сарын 1-нд эцэг эхийн эргүүлийг гаргаагүй сургуулиудад хуулийн дагуу хариуцлага тооцож, олон нийтэд зарлана. Урд жилүүдэд зарим сургуулиуд гаргахгүй хайнга хандах тохиолдлууд гарч байсан. Эцэг эхийн эргүүлүүд энэ жил шүгэлтэй байна. Урд нь шүгэлгүй дохио өгдөг байсан. Мөн эцэг эхийн эргүүлүүд зам тээврийн осол, эндэгдлээс сэргийлж ажиллана. Эцэг эхчүүд эргүүлд гарахаасаа өмнө заавал 5-6 минутын бичлэг үзэж байж гаргахаар болсон. Өнгөрсөн жилийн хувьд өдөрт 1,400 гаруй эцэг эхийн эргүүл ажиллаж байсан. Эцэг эхийн эргүүл гарсанаараа сургуулийн ойр орчимд болох дээрэм, гэмт хэргүүдээс урьдчилан сэргийлдэг. Энэ жил бага насны хүүхдүүд замаар гарахаасаа өмнө баруун гараа өргөж, хөдөлгөөнд оролцох гэж байна гэдгээ жолоочид мэдэгдэх тал дээр бид төлөвлөгөө гарган ажиллаж байна. Эцэг эхийн эргүүлүүд та бүхэн хүүхдийн амь нас, эрүүл мэндийг хамгаалахын зэрэгцээ иргэний үүргээ гүйцэтгэж байгаа юм шүү” гэж байлаа.