-ТОВЧХОН-
Энэтхэг улсад сүүлийн гурван сарын турш коронавируст цар тахал оргил үед хүрч, саяхнаас буурсан. Дэгдэлт намжсантай холбоотойгоор тус улс хорио цээрийн дэглэмээ сулруулах болсон. Гэвч Энэтхэгт цар тахлын давлагаа дахин эхэлж болзошгүйг эрдэмтэд анхааруулж байна. Тэдний таамаглаж буйгаар “Гурав дахь давлагаа”-г 12-16 долоо хоног үргэлжилнэ гэж тооцоолж буй юм. Мөн сүүлийн үед газар аваад буй “Delta plus” хувилбар нь вакцины үйлчилгээг сулруулж магадгүйг сэрэмжлүүлжээ. Өнөөдрийн байдлаар Энэтхэгт хоногт илрэх шинэ тохиолдлын тоо 50 000 болж буурсан байна.
l l l
Дэлхийн эрүүл мэндийн байгууллага коронавирусийн халдварын эсрэг дархлаажуулалтын талаарх зөвлөмжөө шинэчилсэн байна. Энэ талаар тус байгууллагын мэргэжилтний мэдээлснээр хүүхэд, өсвөр настнууд хөнгөн хэлбэрээр өвчилж байна. Тиймээс ковидын халдварын хүнд хэлбэрээр өвчлөх эрсдэлтэй бүлэгт ороогүй хүүхэд, өсвөр настнуудыг вакцинжуулалтад хамруулах гэж яарах шаардлагагүй гэжээ. Ингэхдээ ковидын эсрэг төрөл бүрийн вакцин хүүхдүүдэд хэрхэн үйлчилж байгаа талаарх нэмэлт мэдээлэл шаардлагатай хэмээн онцолсон байна. Түүнчлэн ДЭМБ-аас Пфайзер вакцин нь 12-оос дээш насны хүүхдүүдэд тохиромжтой гэж дүгнэжээ.
l l l
Умард Солонгос АНУ-тай харилцаа тогтоох нь ашиггүй. Энэ тал дээр манай улс ямар нэг төлөвлөгөөгүй байгаа, энэ харилцаа ямар ч үр дүнгүй, үнэтэй цагийг л үрнэ хэмээн БНАСАУ-ын Гадаад хэргийн сайд Ри Сон Гвон мэдэгдсэн байна. Тус улсын удирдагч Ким Жөн Ун урьд нь “БНАСАУ АНУ-ын шинэ захиргаатай хэлэлцэх, сөргөлдөхийн аль алинд нь бэлэн байх ёстой” гэж мэдэгдсэн удаатай. АНУ-ын ерөнхийлөгчийн аюулгүй байдлын зөвлөх Жейк Салливан уг мэдэгдлийг “Сонирхолтой дохио” гэж тодорхойлсон бол БНАСАУ-ын асуудал эрхэлсэн АНУ-ын тусгай төлөөлөгч үүнийг хоёр орны харилцаа нааштайгаар хөгжих үндэслэл гэж тайлбарлаж байв.
Д.ЦЭРЭНДОЛГОР