Байгаль орчин ногоон хөгжил, аялал жуулчлалын сайдын дэмжлэгээр “Эко жаал” гэр хороололдоо Сэлбэ голын дагуу жижигхэн хүүхдийн тоглоомын талбайг байгуулахаар болжээ.
2015 оны 2 дугаар сард “Эко жаал”-ыг Байгаль орчин, ногоон хөгжил, аялал жуулчлалын сайд Д.Оюунхорол хүлээн авч уулзсан билээ. Нийслэлийн 117 дугаар сургуулийн 7б ангийн сурагч З.Буянхишиг Чингэлтэй дүүргийн 19 хорооны нутаг дэвсгэрт Сэлбэ голын дагуу хүүхдийн тоглоомын талбай байгуулж, тойруулж мод тарих хүсэлтэй байгаагаа уламжилсан юм.
Энэхүү санаачлагыг сайд Д.Оюунхорол дэмжиж хамтарч ажиллана гэдгээ илэрхийлсэний дагуу “Эко жаал”-ын боловсруулсан төслийг дэмжсэн нь өнөөдөр ажил хэрэг болон эхэлж байна.
Чингэлтэй дүүргийн 19 хорооны нутаг дэвсгэрт Сэлбэ голын дагуу 336м2 бүхий талбайд хүүхдийн тоглоомын талбай байгуулах бөгөөд талбайгаа тойруулж хайлаас, бургас, агч, голт бор зэрэг моддыг тарина. Хүүхдийн тоглоомын талбайдаа сандал, саравч, савлуур, хогийн сав, самбар зэргийг байрлуулна.
“Эко жаал” маань ирэх есдүгээр сард байгуулсан хүүхдийн тоглоомын талбайгаа хүлээлгэн өгөх юм байна. Чингэлтэй дүүргийн 19 дүгээр хорооны Сэлбэ голын дагуу 2015 оны тавдугаар сарын 27-ны өдрийн 15.00 цагт Эко жаал модоо тарьж эхлэхээр болжээ.