Дэлхийн шатрын 44 дүгээр олимпиадад Монголын баг, тамирчид оролцоно DNN.mn

Дэлхийн шатрын холбоо /ДШХ/ 2022 оны 7 дугаар сарын 26-наас 7 дугаар сарын 10-ны өдөр хүртэл 44 дүгээр Дэлхийн шатрын олимпиадыг Энэтхэг улсын Ченнай хотноо зохион байгуулна. Энэ удаагийн шатрын олимпиадад түүхэндээ хамгийн олон буюу ДШХ-нд бүртгэлтэй 200 орны гишүүн холбоод байдгаас 187 орны хамгийн шилдэг 343 баг, тамирчид эмэгтэй, эрэгтэй ангилалд ухаанаа уралдуулан өрсөлдөнө.

Коронавирусын халдварт цар тахлын үеэр Дэлхийн шатрын олимпиад нь цахим хэлбэрээр 2 удаа www.chess.com цахим сайт дээр зохион байгуулж байсан бөгөөд энэ жил Дэлхийн шатрын олимпиад нь 4 жилийн дараа уламжлалт танхимын зохион байгуулалттай явагдаж байгаа гэдгээрээ онцлогтой юм. Жил бүр Дэлхийн Шатрын олимпиадын үеэр эрэгтэй, эмэгтэй нэгдсэн дүнгээр улс бүрийг жагсааж дүн гарган “ГАПРИНДАШВИЛИ” цомыг гардуулдаг билээ.

Бид өнгөрсөн 2018 оны Дэлхийн шатрын олимпиадын эрэгтэй, эмэгтэй нэгдсэн дүнгээр Ази тивдээ эхний шилдэг 5-д шалгарсан өндөр амжилт үзүүлсэн. Мөн 2014 онд Монголын эмэгтэй баг “B“ категорид багийн дүнгээр тэргүүлж алтан медаль, 2018 онд эрэгтэй баг “C” категорид багийн дүнгээр 2 дугаар байрт шалгаран мөнгөн медаль хүртсэн түүхтэй.

Түүнчлэн Дэлхийн шатрын олимпиадад багаараа 25 удаа оролцохдоо ширээний дүнгээр 1960 онд Л.Мягмарсүрэн алт, 1964, 1970 онуудад Т.Yйтүмэн мөнгө, З.Бямбаа 2002 онд мөнгө, 2000 онд хүрэл, 2004 онд Б.Хатанбаатар, Т.Батцэцэг нар хүрэл медалиар энгэрээ мялааж байжээ.

Аймаг, нийслэлийн 2 үе шатны тэмцээнээс шалгарсан эмэгтэй, эрэгтэй 24 шилдэг шатарчид оролцсон 2022 оны Насанд хүрэгчдийн улсын аварга шалгаруулах тэмцээний эрэгтэйчүүдийн 60, эмэгтэйчүүдийн 52 дахь удаагийн тэмцээний шигшээ шатны тэмцээн Хэнтий аймгийн Чингис хотноо 5 дугаар сарын 12-23-ны өдрүүдэд амжилттай зохион байгуулж, УАШТ-ий ангилал тус бүрийн эхний таван байрт шалгарсан шилдэг шатарчид Дэлхийн шатрын 44 дүгээр олимпиадад Монгол Улсаа төлөөлөн оролцохоор болсон юм.

Эрэгтэй баг:

Багийн ахлагч: Үндэсний шигшээ багийн дасгалжуулагч, ОУШХ-ны дасгалжуулагч, ОУШХМ С.Ган-Од

1-р ширээ: ИМ Д.Батсүрэн

2-р ширээ: ОУШХМ Г.Амартүвшин

3-р ширээ: ИМ Б.Гүндаваа

4-р ширээ: ИМ С.Билгүүн

Нөөц тоглогч: ОУМ С.Ган-Эрдэнэ

Эмэгтэй баг:

Багийн ахлагч: МШХ-ны гүйцэтгэх захирал, ОУШХ-ны дасгалжуулагч, СМ Ц.Батсайхан

1-р ширээ: ЭИМ А.Энхтуул

2-р ширээ: ЭОУМ Б.Баярмаа

3-р ширээ: ЭОУМ Т.Мөнхзул

4-р ширээ: ЭОУШХДМ Б.Мөнгөнзул

Нөөц тоглогч: ЭОУШХМ Д.Мөнхзул

Түүхийн хуудсыг сөхвөл, Монгол Улс анх удаагаа 1956 онд 12 дугаар олимпиадад алтан Москвад болоход С.Тойвгоо ахлагчтай Ц.Жүгдэр, Б.Жамсран, С.Мөөмөө, П.Төмөрбаатар, Д.Цэрэндагва, Н.Намжил нарын баг оролцон 34 багаас 30 дугаар байр эзэлж байжээ. Тэр цагаас хойш 26 дэх удаагаа оролцох гэж байна. Өмнө нь 25 удаа оролцохдоо хэн хэн хэдэн удаа оролцсон болохыг та бүхэнд сонирхуулж байна.

1-2. ОУМ Л.Мягмарсүрэн, ИМ Б.Хатанбаатар нар 10 удаа

3. ФМ Ж.Лхагва 7 удаа

4-5. ОУМ Т.Үйтүмэн, ИМ Б.Гүндаваа, ИМ Ц.Батчулуун нар 6 удаа

6-7. ИМ Д.Шаравдорж, ОУМ Н.Баттулга нар 5 удаа

8-18. ФМ П.Төмөрбаатар, СМ Н.Намжил, СМ Г.Чалхаасүрэн, СМ Ш.Пүрэвжав, СМ Д.Зоригт, ОУМ П.Жигжидсүрэн, ФМ Ч.Хүрэлбаатар, ОУМ Ц.Лхагвасүрэн, ФМ Г.Алтан-Оч, ФМ З.Бямбаа, ИМ Г.Мөнхгал нар 4 удаа

19-23. СМ С.Мөөмөө, СДМ Г.Бадамгарав, СМ Т.Цагаан, ФМ Н.Төвсанаа нар 3 удаа

24-30. СМ Г.Гунгаабазар, ОУМ Н.Төмөрхуяг, ОУМ Т.Энхбат, ФМ Х.Сүрэндорж, ФМ Д.Эрхэмбаяр, ФМ М.Гүнбаяр, ФМ Б.Баярмандах, ИМ С.Билгүүн нар 2 удаа

31-42. СМ Ц.Жүгдэр, СМ Б.Жамсран, СМ Д.Цэрэндагва, СМ Х.Балдандорж, СМ Л.Нямдорж, СМ Ц.Энхбат, СМ О.Батзориг, ОУМ О.Ганболд, СМ Ч.Адъяатөмөр, ФМ Т.Оюунбаатар, ФМ Г.Эрдэнэ, ИМ У.Насанжаргал нар 1 удаа тус тус оролцжээ.

Харин эмэгтэйчүүд 1963 онд хуучнаар Югослав улсын /одоогийн Хорват/ Сплит хотноо болсон олимпиадад Олон улсын шүүгч Н.Намжил ахлагчтай ФМ Ж.Хулганаа, ОУМ С.Хандсүрэн нарын бүрэлдэхүүнтэй баг анх удаагаа оролцон 15 багаас 11 дүгээр байр эзэлсэн байдаг. Энэ удаад бид 19 дэх удаагаа оролцох бөгөөд өмнө нь 18 удаа оролцохдоо:

1. ОУМ, ИМЭ Б.Мөнгөнтуул 9 удаа

2. ОУМЭ Б.Анхчимэг 7 удаа

3. ОУМЭ Ц.Батцэцэг, ОУМ ИМЭ Т.Батчимэг, ОУМЭ Д.Янжиндулам нар 5 удаа

4-6. ОУМЭ Т.Батцэцэг 4 удаа

7-12. ФМЭ Ж.Хулганаа, СМЭ Б.Ундрахбуян, ФМЭ Д.Мажигсүрэн, ОУМЭ С.Отгонжаргал, ИМЭ А.Энхтуул, ОУМЭ У.Лхамсүрэн нар 3 удаа

13-15. ОУМЭ С.Хандсүрэн, ФМЭ Ш.Батцэнгэл, ФМЭ Н.Тунгалаг, ОУМ ИМЭ Д.Номин-Эрдэнэ нар 2 удаа

16-27. СМЭ Д.Бямбаа, СМЭ П.Бүжинлхам, СМЭ Ө.Гэрэлмаа, СМЭ Г.Баярмаа, СМЭ В.Сарангэрэл, ФМЭ Э.Энхжаргал, ФМЭ З.Баяраа, СМЭ Ө.Нямтуяа, ФМЭ Ц.Мөнхчулуун, ОУМЭ Б.Баярмаа, ИМЭ Ү.Үүрийнтуяа, ОУМЭ Т.Мөнхзул нар 1 удаа тус тус оролцжээ.