1970 оноос хойш дэлхийн зэрлэг амьтдын тоо толгой 58 хувиар цөөрсөн гэж Лондоны амьтан судлалын нийгэмлэг мэдээлжээ. Энэ талаар Дэлхийн байгаль хамгаалах сантай хамтран хийсэн тайланд дурьдсан байна.
Хэрэв зэрлэг амьтдын тоо толгой буурсан хэвээр байвал 2020 он гэхэд дэлхийн сээр нуруутан амьтдын гуравны хоёр нь бүрмөсөн устаж алга болох аюул нүүрлэжээ.
Судлаачдын дүгнэлтээр бол устаж буй амьтдын олонхи нь нуур, гол мөрөн, ус намгархаг газар амьдардаг бөгөөд хүний буруутай үйл ажиллагаанаас болж ус, мөрөн ширгэж буйгаас эдгээр амьтад амьдрах орчингүй болж байгаа ажээ. Дэлхийн байгаль хамгаалах сангийн судлаач, доктор Майк Барэт “Зэрлэг амьтдын тоо толгой буурах үндсэн шалтгаан нь бизнес, хууль бус агнуур, худалдааны ашиг сонирхол байж ирсэн. Үүнтэй зэрэгцээд уур амьсгалын өөрчлөлт, хотжилт, зэрэг хүний нийгмийн аюул занал зэрлэг амьтдыг устгасаар байна” гэжээ.