Category: соёл-урлаг

Нийслэлийн Налайх дүүрэг дэх утга зохиолын нэгдэлийн 50 жилийн ойн арга хэмжээнд зориулан яруу найргийн “Гандан Уул-2014” наадмыг зохион байгуулах нь ээ. Эл наадам нь утга зохиолын “Шинэ эрэлхийлэл, шинэ санаа, тэмүүлэл, эрмэзлэл” уриан хүрээнд явагдах бөгөөд шилдэг залуу яруу найрагчийг тодруулахад оршиж байгаа гэнэ. Наадам арваннэгдүгээр сарын 21-ний 11.00 цагт Налайх дүүргийн Соёл урлагийн ордонд болох юм байна. Харин тэргүүн байрны эзэн яруу найрагчид нэг сая таван зуун мянган төгрөг, хоёрдугаар байрт нэг сая дөрвөн зуун мянган төгрөг өгөх бол тусгай байранд шалгарсан дөрвөн яруу найрагчийг тус бүр 100 мянган төгрөгөөр шагнаж урамшуулах ажээ.

-Энэ долоо хоногт “Саран хөхөө” үндэсний сонгодог жүжиг болон “Тэмүүжин” хүүхдийн жүжгийг тоглоно.–

Улсын драмын эрдмийн театрын 84 дэх үзвэрийн жилийн нээлт өнгөрсөн долоо хоногт болсон. Театрын уран бүтээлчид уламжлал ёсоор арваннэгдүгээр сарыг “Түүхэн жүжгийн өдрүүд” болгон зарлаж, үндэсний сор болсон бүтээлүүдээрээ үзэгчдийнхээ мэлмийг баясгасаар ирсэн. Энэ уламжлалын дагуу өнгөрөгч долоо хоногт “Тэнгэрийн хүү”, “Ану хатан” үндэсний түүхэн жүжгүүдийг толилуулсан билээ. Тэгвэл энэ долоо хоногт “Саран хөхөө” үндэсний сонгодог жүжиг болон “Тэмүүжин” хүүхдийн жүжгийг үзэгчдэдээ өргөн барих гэж байна.

“САРАН ХӨХӨӨ” ҮНДЭСНИЙ СОНГОДОГ ЖҮЖГИЙГ ГУРВАН УДАА ТОГЛОНО

Зохиолч Д.Равжаагийн “Саран хөхөө” жүжгийг Монголын зохиолчдын эвлэлийн шагналт зохиолч А.Шартолгой шинэтгэн тавьж байна. Жүжгийн ерөнхий найруулагчаар Ардын жүжигчин Б.Мөнхдорж, хөгжмийн зохиолчоор Ардын жүжигчин Н.Жанцанноров, зураачаар Н.Содномдорж ажиллаж байна. Жүжгийн гол дүрд Соёлын тэргүүний ажилтан Б.Нармандах, Сурасадмин хатанд Гавьяат жүжигчин Ж.Оюундарь, Лаганад Соёлын тэргүүний ажилтан С.Болд-Эрдэнэ тоглож буй.

Хан хүү Номун Баясгалан өөрийн шадар Лаганы хорт санаагаар гэрээсээ төөрч, номын шидээр хөхөө болон алсад одоод ном эрдмийг хураан буяны зам, мөрийг дагаад ордондоо ирж, оюуны гэгээг түгээн гэгээрэхүйн шидийг үзүүлнэ.

“Саран хөхөө” үндэсний сонгодог жүжгийг энэ долоо хоногт гурван удаа тоглох юм. Тухайлбал ирэх баасан гариг буюу арваннэгдүгээр сарын 14-ний 19.00 цагт нээлтээ хийж, амралтын өдрүүдэд буюу арваннэгдүгээр сарын 15, 16-ны 17.00 цагаас тоглоно.

“ТЭМҮҮЖИН” ХҮҮХДИЙН ТҮҮХЭН ЖҮЖГИЙГ НЭЭЛТ БЯМБА ГАРИГТ БОЛНО

Зохиолч С.Жаргалсайхны “Тэмүүжин” хүүхдийн жүжгийг 2002 онд анх тоглож байжээ. “Түүхэн жүжгийн өдрүүд”-эд багтсан энэхүү жүжгийг энэ сард драмын тайзнаа гурван удаа тоглох юм. Жүжгийн найруулагчаар Урлагийн Гавьяат зүтгэлтэн Б.Баатар, Соёлын тэргүүний ажилтан Н.Болд нар ажиллаж байна. Ерөнхий зураачаар Соёлын тэргүүний ажилтан Я.Санжаасүрэн, хөгжмийн зохиолчоор Урлагийн Гавьяат зүтгэлтэн Ч.Сангидорж ажиллажээ.

Тархай бутархай, өөр хоорондоо дайсагналцан тэмцэлдэж байсан олон овог аймгийг нэгэн тугын дор нэгтгэн захирч, Чингис хаан зэрэгт хүрч орыг залгатлаа хатуу бэрхийг хар нялхаасаа эхлэн даван туулсан баатарлаг хувь заяа. Эх нэгт дүүгээ хөнөөсөн зөрчилт амьдралын хатуу дүрэм. Энэ бол Тэмүүжин хүүгийн түүх юм.

Жүжгийн нээлт ирэх бямба гариг буюу арваннэгдүгээр сарын 15-ны 11.00 цагт болно. Мөн энэ сарын 23-ны ням, 29-ний бямба гаригийн 11.00 цагт тоглох юм байна.

Ийнхүү УДЭТ-ын 84 дэх үзвэрийн өвөл цагийн тоглолт дээрх жүжгүүдээр өндөрлөх юм.

Түүхэн жүжгийн сарын үзвэрийн хуваарийг дахин танилцуулья:

11.14-ний 19.00, 15, 16-нд 17.00 цагт “Саран хөхөө” үндэсний түүхэн жүжиг.

11.21, 23-нд 18.00 цагаас, 22, 29, 30-ны 17.00 цагт “Тэнгэрийн хүү” түүхэн жүжиг.

11.28-ны 19.00 цагт “Оролмаа эх” үндэсний түүхэн жүжиг.

11.15, 23, 29-нд 11.00 цагт “Тэмүүжин” хүүхдийн жүжгийг тус тус тоглох юм.

Дуучин О.Баянмөнх энэ сарын 25-нд Монгол бөхийн өргөөнд “Тусгаар тогтнол” хэмээх зургаа дахь бие даасан тоглолтоо хийхээр болжээ. Энэхүү тоглолтдоо эзэн Чингис хааны үеэс олон зуун жилийн турш гайхамшигт түүхэн замналыг туулж, Тусгаар тогтнолоо олсоныг магтсан дууны уран бүтээлүүдээс бүрдүүлэх нь. Өөрөөр хэлбэл, хүчирхэг урлагийн баг хамт олонтойгоор энэхүү тоглолтоо театарчилсан шоу хэлбэрээр үзэгчдэд хүргэх юм байна.

НЗДТГазраас толилуулж буй “Цөмөөхэй балет” бүжгэн жүжгийг МУГЖ Д.Алтанхуягийн найрууллагаар шинэчлэн УДБЭТеатрт 2014 оны 12-р сарын 24-нөөс 28-ны хооронд тавих гэж байна.

Цөмөөхэй балет нь шинэ жилийн уур амьсгалыг нэмэгдүүлж, гэр бүлээрээ хамт сонгодог орчинд баяраа тэмдэглэн өнгөрүүлэх боломжийг олгох, мөн хүүхэд залуусын сонгодог урлагын боловсролд өчүүхэн бага боловч хувь нэмэр оруулах олон сайн талтай хэмээн Монголын Балетын Хөгжил Сан зорин ажиллаж байна. Мөн тоглолтын нэгэн онцлог нь бүжгийн урлагаар хичээллэдэг болон сонирхдог хүсэл эрмэлзэлтэй 8-15 насны 200 гаруй хүүхэд багачуудыг хамруулан тоглуулах юм. Энэ нь хүүхдэд бага насны нандин дурсамж үлдээх төдийгүй сонгодог урлагын сайхныг мэдэрч өөрийгөө нээх боломж олгож байгаа юм.

Монголын балетын хөгжил сангаас гаргасан бүртгэлийн хуудсыг бөглөн УДБЭТеатрын касс болон жижүүр дээр 11 сарын 19 ны дотор биечлэн авчирч өгнө. Шалгаруулалт 11 дүгээр сарын 22, 23нд 10 цагт Хөгжим бүжгийн Коллеж дээр болно. Шалгарсан хүүхдүүд Хөгжим бүжгийн Коллежийн балетын ангийн хүүхдүүд, Бүжгийн Их Сургууль, Дуурь Бүжгийн Эрдмийн Театр, ОХУ , Япон гэх мэт орнууд мэргэжлийн бүжгэн жүжигчидтэй хамтран нэгэн тайзан дээр мэргэжлийн синфоний найрал хөгжимтэй бүжих болноо.
Бүртгэлийн хуудсыг дараах газруудаас авна.

1. НСУГазрын вэб хуудаснаас бүртгэлийн хуудсаа авч МБХСангийн байранд хүлээлгэн өгөх.
2. МБХСангийн байр /Этүгэн төв 1406 тоот 99047043/
3. УДБЭТеатрын веб хуудас болон касс

Утас: 99136741 , 99047043

УДБЭТ -ын хамт олон “Melodia” симфони найрал хөгжмийн концертыг зохион байгуулах гэж байна. Энэ жил Монгол улсад мэргэжлийн найрал хөгжим үүсэж хөгжсөний 90 жилийн ой тохиож байгаа. УДБЭТ -ын симфони найрал хөгжим нь Монгол улсын дуурь, балет сонгодог урлагийг хөгжүүлэхэд гол үүрэг гүйцэтгэсээр ирсэн арвин их түүх, урын сантай чадварлаг хамт олон юм. Тэд “Melodia” симфони найрал хөгжмийн концертоо энэ сарын 9 –нд тайзнаа амилуулахаар болжээ. Тоглолтод ОХУ, ХБНГУ, Монгол улсад хөгжмийн мэргэжлийн сургуулиудыг төгссөн хөгжимчид оролцохоос гадна УДБЭТ -ын симфони найрал хөгжим бүрэн бүрэлдэхүүнээрээ дан хөгжмийн бүтээлүүдийг тоглоно.

“Warner bros” компанийн шинэ бүтээл “Interstellar” буюу “Оддын хооронд” уран сайхны кино өчигдөр нээлтээ хийсэн байна. Энэ киноны гол дүрүүдийг өнгөрсөн жил “Оскар”-ын шилдэг эрэгтэй дүрийн шагнал хүртсэн жүжигчин Мэтью Макконахи болон жүжигчин Энн Хэтэуэйн нар бүтээсэн юм. 110 минутын турш үргэлжлэх энэхүү киног Британийн найруулагч Кристопхер Нолан найруулжээ. Уг кино 152 сая ам.доллароор бүтсэн байна.

“TV Cocktail” хамтлагийн шинэ уран бүтээл “Омарын Эрэлд” адал явдалт уран сайхны киноны нээлт Тэнгис кино театрын гадаа талбайд болов. Уг киноны нээлтийн үеэр “ТВ коктейль” хамтлагийн жүжигчин Э.Цолмонбаяр ССАЖ-ын сайдын тушаалаар Монгол Улсын “Соёлын Тэргүүний Ажилтан” хэмээх цол тэмдэгээр энгэрээ мялаалаа.

Тус кино нь тус хамтлагийн дөрөв дэх дэлгэцийн уран бүтээл юм.

Хошин урлагийн шилдгийн шилдгүүд хуран чуулсан намар цагийн нэгдсэн шоу тоглолт энэ сарын 09-ны 19:30 цагт “UB Palace”-ийн концертын их танхимд тоглогдохоор товоо зарласан билээ. Тус тоглолтын зар реклам цацагдсан даруйд л зохион байгуулагчдын утаснууд тасралтгүй тачигнаж, үзэгчид гоё суудлуудаа асууж, сураглан хэдийнэ тасалбараа авч эхэлсэн. Харин тус тоглолтыг үзэхийг хүссэн олон зуун үзэгчид тасалбараа үнэгүй хүргүүлмээр байна гэсэн хүсэлтийн дагуу, зохион байгуулагчдын зүгээс тасалбарын борлуулалт өндөр байгаа ч гэсэн хошин урлагт хайртай үзэгчдээ хүндэтгэж ганцхан өнөөдөр тасалбарыг үнэгүй хүргэхээр болжээ.
Ийнхүү үзэгчдийн хүлээлтийг хэдийнэ үүсгээд буй хошин урлагийн нэгдсэн тоглолтонд “Шинэ үе” продакшн, “Шилдэг өнгө” продакшн, “Х Түц” продакшн, “Мөрөөдлийн театр”, “Эмоци” продакшн, “Чапи & Суурь”, “Параоди” хамтлаг нар бүрэн бүрэлдэхүүнээрээ оролцож, хошин урлагт хайртай үзэгч түмэнтэйгээ нэгэн оройг инээд хөөрөөр дүүрэн өнгөрүүлэх юм. Түүнчлэн шоу тоглолтын хөтлөгчөөр “Захиалгат инээд” хамтлагийн авьяаслаг уран бүтээлчид оролцох бөгөөд урилгаар олны хайр, хүндэтгэлийг хүлээсэн дуучид оролцож дуу хуураа өргөн барих гэнэ.
Энэ дашрамд дуулгахад тоглолтын тасалбар хэдийнэ худалдаанд гарсан бөгөөд “UB Palace”-ийн кассаар болон Нарантуул зах, Хархорин захын төв хаалган дээр 15, 20 мянган төгрөгийн үнэтэй борлуулагдаж байгаа юм. Түүнчлэн та бүхэн зохион байгуулагчдын 91937777, 91777888 дугаараас илүү дэлгэрэнгүй мэдээллийг авч, тасалбараа захиалан үнэгүй хүргүүлээрэй.
Монголын хошин урлагийнхан 20 гаруй жилийн түүхнээ 46000 гаруй удаа тайзнаа тоглож, 26 сая гаруй хүнд инээд бэлэглэж, 300 орчим удаа хандивын тоглолт зохион байгуулж үзэгч түмэндээ инээд хөөр, баяр баясал, аз жаргалыг бэлэглэжээ.

“Интерном” номын их дэлгүүрт өнөөдөр англи хэл дээр бичигдэн гарч буй “Богино өгүүлэгийн цуврал” номын нээлт 14.00 цагт болох гэж байна. Энэхүү номуудыг “Talk Talk English”, “Kennedy Cooper Publishing”-аас эмхэтгэн гаргаж байгаа юм байна.

Уг цувралд “Anumal Tales”, “Silent night”, “The Lighthouse” зэрэг 10 богин хэмжээний өгүүллэг багтжээ.