Монголын рок поп урлагийн шилдэг эрэгтэй таван хамтлаг “Сүнс”, “Камертон”, “Номин талст”, “Салхи”, “Guys” нарын хамтарсан “Мартагдашгүй” тоглолт энэ сарын 18-нд дахин тайзнаа амилахаар болжээ.
Дэлхийн дээд зэрэглэлийн клубуудын стандартаар Монголд анх удаа байгуулагдаж буй “CASTLE” клубын нээлтэнд зориулан тоглогдох “VIP” тоглолтонд таван хамтлагийн залуус маань үе үеийн хит дуунуудаараа үзэгчдийн сонорыг мялааж, дурсамжыг сэргээн хамтдаа дуулж бүжиглэж нэгэн оройг гайхалтай өнгөрүүлэх нь ээ.
Монгол улсад Үндэсний кино урлаг үүсч хөгжсөний 80 жилийн ой энэ онд тохиож буй. Үүнтэй холбогдуулан “Монгол кино” нэгтгэлээс “Монгол киноны шилдэг дуунууд” хүндэтгэлийн тоглолтыг зохион байгуулах гэж байна. Тоглолт арванхоёрдугаар сарын 5-ны 15.00 цагт “Соёлын төв өргөө”-нд болох юм.
Тоглолтонд ард олны сэтгэлд хоногшсон киноны дуунуудыг дуулах бөгөөд МУАЖ А.Долгор, МУАЖ Ө.Баярмагнай , МУГЖ Б.Дашдондог, МУГЖ Ч.Насантогтох, МУГЖ Б.Сарантуяа, МУГЖ Ж.Алтанцэцэг, МУГЖ С.Жавхлан, МУГЖ Б.Ганчимэг, МУГЖ Х.Болормаа , Гавьяат багш Ц.Ерөө шавь нарын хамт, Төрийн соёрхолт Б.Мөнхболд, МУСТА С.Баттулга, МУСТА Д.Отгонжаргал, МУСТА П.Өнөржаргал , МУСТА А.Түмэн-Өлзий, МУСТА С.Цогтсайхан, МУСТА С.Сэрчмаа, МУСТА Т.Баттогтох, МУСТА Д.Жавхаасайхан, МУСТА Б.Баярцэцэг, МУСТА Ц. Баясгалан, МУСТА О. Болдбаатар, МУСТА Б. Нармандах , Дуучин Б.Хонгор, Л.Оюун-Эрдэнэ, Б.Мөнхбаяр, ХЦДБЧ-ын дуучин Э.Дүүриймаа, Д. Мөнгөнтуяа, Л. Болор-Эрдэнэ, Sweetymotion хамтлаг, ОХУ-ын гитарчин Александр Сага зэрэг дуучид оролцох аж. Тоглолтын тасалбар 20,000, 25,000 төгрөгний үнэтэй худалдаалагдаж байна.
Зуун зууны түүхэнд чин үнэнч хайрын гэрч болсон энэхүү жүжиг Монголын театрын тайзнаа 1966 онд С.Гэндэн найруулагчийн найруулгаар, 1996 онд Ч.Найдандоржийн найруулгаар үзэгчдийн хүртээл болж байсан түүхтэй. Харин энэ удаад Төрийн соёрхолт найруулагч Н.Наранбаатар орчин цагт цоо шинэ дэг тавилт,өнгө төрхтэйгээр найруулан тавигдсан билээ. Шинэ төрхтэйгээр үзэгчдийн хүртээл болсон “Ромео Жульетта” Сонгодог жүжиг өнгөрөгч сард үзэгчдийг байлдан дагуулж чадлаа.
Тэгвэл энэ сарын 17, 18-нд 18:00 цагт 19, 20-нд 17.00 цагуудаас үзэгчдийн хүсэлтээр тоглохоор болжээ.
Монголын Дизайнеруудын холбооноос жил бүр уламжлал болгон зохион байгуулдаг “Гоёл-2016” наадам шилдгүүдээ тодруулж, Топ моделиор загвар өмсөгч Х.Уянгыг өргөмжиллөө.
Түүнчлэн тус наадмын шилдэг эмэгтэй загвар өмсөгчөөр А.Хулан, шилдэг эрэгтэй загвар өмсөгчөөр Д.Баяртогтох нар шалгарлаа.
Гранпри шагналыг “Шилмэл загвар” ХХК-ийн дизайнер Д.Өнөболор хүртсэн бол наадмын Шилдэг загвар зохион бүтээх товчоогоор “Говь” ХК тодорсон юм.
Наадмын тусгай шагналыг Өвөр Монголын дизайнер Номин болон Бажуна салоны дизайнер Б.Батсүх нар хүртлээ.
Гоёлын хувцасны шилдэг дизайнераар Ц.Отгон, Үндэсний хувцасны шилдэг дизайнераар Мon Сouture салоны дизайнер Х.Батзаяа, Чөлөөт хувцасны загвараар Урбан жийнс брэндийн дизайнер, Уран сэтгэмжийн загвараар дизайнер Мягмарсүрэн, Батсүрэн нар шилдгээр шалгарсан юм.
Мөн Шилдэг залуу дизайнераар “Эртний Монгол хийц” салоны дизайнер О.Уранцэцэг тодорсон бол Шилдэг makeup artist-аар Наруми салоны Аззаяа, Марина нар, шилдэг үсчингээр Stylish салон шалгарлаа.
Английн алдарт гитарчин, дуучин Жон Гомм ирэх сарын хоёрны өдөр Улаанбаатар хотноо “The IVY”-д тоглолтоо хийх гэж байгаа талаар өнөөдөр мэдээллээ.
Жон Гомм нь 2004 оноос хойш уран бүтээлээ туурвижээ. Түүний хувьд виртуозо стилиэр акустик гитарыг тоглодог юм байна. Гол нь тэрбээр гитар тоглохын зэрэгцээ бөмбөрийн цохилт, басс, аялгууг хослуулж дуулдгаараа онцлог аж.
Тоглолтын зохион байгуулагчаар “Амантун энтертайнмент”, “The IVY”-гийн хамт олон зохион байгуулахаар болжээ. Түүний тоглолт ирэх сарын хоёрны өдөр “The IVY”-д болох юм. Тоглолтод урилгаар “Шөнийн галт тэрэг” хамтлаг оролцохоор болжээ.
Холливуд болон Азийн киноны уран бүтээлчдийн хамтын ажиллагааг хөгжүүлж, уран бүтээлчдийн бүтээлийг дэлхийд таниулах, гаргах зорилго бүхий “Азийн дэлхийн шилдэг кино наадам” АНУ-ын Лос Анжелес хотноо анх удаа зохион байгуулагдаж өндөрлөлөө.
Энэ кино наадамд “Нэтфлекс” компанийн бүтээж байгаа “Хубилай” хаан киноны Аригбөхийн дүрээр Холливудад танигдсан жүжигчин Б.Амарсайхан өөрийн гол дүрд нь тоглож, ерөнхий продюсерээр нь ажилласан “Бодлын хулгайч” киногоо оролцуулсан юм.
Лос Анжелест зохион байгуулагдсан энэхүү кино наадамд Азийн 50 гаруй орны кино бүтээл өрсөлдсөний ихэнх нь “Алтан бөмбөрцөг”, “Эмми” болон “Оскар”-т нэр дэвшиж шагнал хүртэж байжээ.
Кино наадамд оролцсон бүтээлүүдийг 7 төрлөөр шалгаруулан шагнал гардуулснаас “Бодлын хулгайч” кино “Үзэгчдийн таашаал хүртсэн кино”-оор шалгарсан байна.
Түүнээс гадна Б.Амарсайхан нь Лос Анжелес дэх “Hollywood School house”-ыг үндэслэгч Лос Анжелесын хотын дарга Феррис Веб болон Оскарын продюсер Андре Морганы хамт “Азийн дэлхийн кино наадам”-ын ерөнхий зөвлөлийн гишүүнээр сонгогдсон байна.
Тун удахгүй шинэ жил айлчлан ирэх гэж
байна. Энэ жил уламжлал ёсоор “Монголын балетын хөгжил сан” НЗДТГазартай
хамтран хоёр дахь жилдээ “Цөмөөхэй” бүжгэн жүжгийг 2015 оны 12-р сарын
12 -27 ны өдрүүдэд УДБЭТ-ын тайзнаа тавих гэж байна.
Үүнтэй холбогдуулан нийслэлийн Засаг
даргын Нийгмийн хөгжлийн асуудал хариуцсан орлогч Ц.Энхцэнгэл,
“Цөмөөхэй” балетын найруулагч, Монгол Улсын Гавьяат жүжигчин Д.Алтанхуяг
нар мэдээлэл өглөө.
Дэлхийн таван тивийн улсад зэрэг
тоглогддог энэхүү алдарт бүжгэн жүжгийг Монгол Улсын Гавъяат жүжигчин
Д.Алтанхуягийн найруулгаар өнгөрсөн жилээс эхлэн шинэчлэн тоглосон юм.
2014 онд “Цөмөөхэй” балетын тайз, декорац, хувцас хэрэглэлийг АНУ-ын
“Бостон балет” компаниас авчирч 180 орчим хүүхдийг оролцуулан тоглосон
бөгөөд энэ жил таван Клара охиныг шалгаруулж, 200 гаруй авьяаслаг хүүхэд
дүр бүтээхээр тоглолтынхоо бэлтгэл ажлыг хангаж байна. Өмнөх жил
“Монголын балетын хөгжил сан” зохион байгуулсан тоглолт бүрээ хөгжлийн
бэрхшээлтэй иргэд, ахмад настан, оюутнуудад хөнгөлттэй болон үнэ
төлбөргүй үзүүлсэн бол энэ жил “Цөмөөхэй” балет тоглолтыг тархины
саажилттай 10 хүүхдэд онцлон үзүүлэхээр урилга явуулжээ. Тус тоглолтын
орлогоос саажилттай хүүхдүүдийн хөдөлгөөнийг дэмжихэд тустай “Spider
cage” бүсийг авахад хандивлах юм.
“Цөмөөхэй” балетын түүхээс дурдвал,
Германы нэгэн жижигхэн хотхонд илбэчин Просселмейр хүүхдүүдэд илбэ
үзүүлэн гайхшруулж байгаагаар эхлэх энэ балет дэлхийн олон хүүхдүүдийг
балетын урлагт хөтөлж, анхных нь балетын дүр бүтээсэн бүжгэн жүжиг
байсан юм. Тэртээ 1892 онд анх тайзнаа амилж байсан бол өнөөдрийг хүртэл
120 жилийн түүхэн хугацаанд тив алхсан тархсаар шинэ оны баяраар үзэх
ёстой нэгэн гэр бүлийн уламжлал болтлоо үзэгчдэд хүрч чадсан сонгодог
балет болжээ.
Бид энэ талаар эргэн мэдээллэх болно.
Билгүүн номч, академич Бямбын Ринчений эрдэм шинжилгээний бүтээлийн чуулган есөн боть номын нээлт Боловсрол, соёл, шинжлэх ухааны яаманд болж байна. Тодруулбал, Монгол судлалын үндэсний зөвлөлөөс “Монгол судлалын шилдэг өв” цувралыг бий болгохоор зорьж тэргүүн дугаарт академич Бямбын Ринчений эрдэм шинжилгээний бүтээлийг эмхэтгэн хэвлүүлсэн байна. Учир нь их эрдэмтний мэндэлсний 110 жилийн ой тохиож байгаа юм.
Энэ сарын эхээр АНУ-ын Лос-Анжелес хотноо “Asian World Film Festival” амжилттай болж өнгөрлөө. Ази, Холливудын кино уран бүтээлчдийн хамтын ажиллагааг өргөжүүлэх, Азийн шилдэг бүтээлүүдийг дэлхийн кино наадмуудад танилцуулах зорилготой энэ наадам анх удаагаа зохион байгуулагдсан нь энэ юм.
Азийн 50 гаруй улсын кино уран бүтээлчид “Golden Globe”, Emmy”, “Oscar” зэрэг нэр хүнд бүхий дэлхийн томоохон кино наадам, шагнал гардуулах ёслолуудад нэр дэвшээд байгаа кинонуудаа түмний хүртээл болголоо.
Тус наадамд жүжигчин Б.Амарсайханы гол дүрд нь тоглож, продюсерээр ажилласан “Бодлын Хулгайч” киног наадмын гол гурван үзвэрийн нэгээр сонгожээ. Нийт 30 кино бүтээл өрсөлдөж долоон бүтээл нь шагнал хүртсэн энэхүү наадмаас “Бодлын хулгайч” кино шүүмжлэгч, уран бүтээлчид болон үзэгчдээс өндөр үнэлэлт авч, “Үзэгчдийн таашаалд нийцсэн бүтээл” шагналыг хүртсэн байна.
Үүнтэй зэрэгцэн жүжигчин Б.Амарсайханыг тус кино наадмын Удирдах Зөвлөлийн Хүндэт гишүүнээрээ санал нэгтэй сонгож, батламж гардуулжээ. “Oscar”-ын шагналт, нэрт продюсер Андре Морган, “Hollywood School house”-ийг үүсгэн байгуулагч Феррис Вебе, Лос Анжелес хотын дарга зэрэг олон улсад нэр хүндтэй уран бүтээлчид, нийгмийн зүтгэлтнүүд хүндэт гишүүнээр сонгогджээ.
Олон улсын хэмжээний, нэр хүнд бүхий энэхүү фестивалийн зөвлөлд монгол хүнд багтсанаар Монголын кино уран бүтээлчдийн бүтээлийг гадаад зах зээлд танилцуулах, бусад орны шилдэг бүтээлүүдтэй эн зэрэгцэн олон улсын нэр хүнд бүхий наадмуудад оролцох, өөрсдийн чадвар, чадамжийг шалгах томоохон боломж, үүд хаалгыг нээж буй юм.
Өнгөрсөн долоо хоногийн сүүлчээр Улаанбаатар хотын Баянзүрх дүүрэгт та бидний ярьдагаар Сансарт байрлах “Барилга мега стор”-д Монголын урлагийн музейн нээлтээ хийлээ. Урлагийн бүтээлийг дээдлэгч, цуглуулагч Должидийн Батбаярын санаачлан байгуулсан уг музейн нь манай улсын урлагийн түүхэнд бас нэгэн шинэ хуудсыг нээсэн юм. Музей Монголын орчин үеийн урлагийн , хүрэл зэвсэгийн үеийн гээд үндсэн дөрөв болон дэд танхимтай. Эхний танхимд манай орчин үеийн зураачдын шилдэг бүтээлүүдийг тавьжээ. XVII-XIX үеийн угсаатны зүй танхимд хүрэл зэвсгийн үед хэрэглэж байсан ховор эд зүйлс, сархинаган тоонотой эртний монгол гэрийн үүд хэсэг, тухайн үед уран бүтээлээ туурвиж байсан өндөр гэгээн Занабазарын бүтээсэн ногоон Дарь эх, танка зураг болон бурхдын цутгамал зэрэг ховорт тооцогдог эртний урлагийн бүтээлүүд зэрэг олон сонирхолтой үзмэрүүд тус музейд тавигдсан байна.
Монголын урлагийн музейн нь “Од” галерейтэй. Музейн энэ хэсэг нь Монголын болон гадаадын зураачид, цуглуулагчдад бүтээлээ олны хүртээл болгох сайхан боломжийг олгох юм. Үзэгчдэд үнэгүй үйлчлэх энэ танхимд уран бүтээлчид цугларч, үзэгчид ая тухтай саатан урлагийн талаар ном товхимолыг үзэж, уулзалт, лекц зохион байгуулж болно. Монгол урлагийн түүхийн толь болсон тус музейд морилон саатсан хэн бүхэн урьд өмнө нь олны хүртээл болж байгаагүй сонирхолтой үзмэрүүдтэй танилцах юм.