Category: амьдралын-өнгө

Улсын төсвийн хөрөнгө оруулалтаар Сэлэнгэ аймгийн Алтанбулаг суманд барьсан шинэ спорт заалны нээлт энэ сарын 24-нд болжээ. Тус заал нь орон нутгийн хүүхэд залуучууд, ард иргэдийг биеийн тамир спортоор хичээллэх орчин нөхцөлийг бүрдүүлэх, бүх нийтийн спортыг түгээн дэлгэрүүлэх үндсэн зорилгын дор бий болсон бүтээн байгуулалт юм. Шинэ заалны нээлтэд Сэлэнгэ аймгийн Засаг дарга Ш.Оргил, орон нутгийн удирдлагууд болон Алтанбулаг сумаас төрсөн тамирчдын төлөөлөл оролцлоо. Уг барилгыг БСШУЯ-ны захиалгаар “Тоонто гранд” компани зураг төслийг гаргаж, “Энх бизнес өгөөмж” компани гүйцэтгэжээ.

Улаангом сумын 8 дугаар багийн малчин Д.Амарсайхан эмээл урлаж зах зээлд нийлүүлсээр байна. Тэрбээр жилд дунджаар 20 гаруй бүрэн тоногтой эмээл хийдэг аж. Энэ нутагт зөвхөн Д.Амарсайхан бус, түүний төрсөн ах, дүү дөрвүүл эмээл урлаж жилд 150-200 бүрэн тоногтой эмээлээ зэргэлдээ сум, аймгийн малчдад борлуулдаг байна.

Говь-Алтай аймаг дахь Шатрын холбооноос уламжлал болгон зохион байгуулдаг өсвөр үеийн аймгийн аварга шалгаруулах тэмцээн энэ сарын 24, 25-нд “Мазаалай” театрт боллоо. Тэмцээнд найман сумын 12 сургууль, 20 цэцэрлэгийн нийт 120 тамирчин долоон насны ангиллаар өрсөлдөж, 63 өсвөрийн шатарчин шагналт байрт шалгарсан юм. Тэмцээнийг аймгийн Гэр бүл, хүүхэд, залуучуудын хөгжлийн газар, Шатрын холбоо хамтран зохион байгуулж, “Алтай төмөр” компани ивээн тэтгэжээ.

Хөвсгөл аймгийн Чандмань-Өндөр сум хүн бүрт ээлтэй орчин бүрдүүлэхээр ажиллаж байна. Тус сум “Жишиг хороолол”, “Сайн хашаа”, “Гэрэлтэй Чандмань” хөтөлбөрийг хэрэгжүүлэн иргэдийн ая тухтай амьдрах орчин бүрдүүлэхийн сацуу сумандаа бизнес эрхлэн амьдрах боломжийг дэмжиж таван төрлийн төсөлд 63 иргэн, өрхийг хамруулжээ. Ингэснээр 89 ажлын байр бий болгосон байна. Мөн 100 бүл зөгий нэмж, зоорь, савлагааны цехийг шинээр ашиглалтад оруулснаар цэвэр зөгийн балыг орон нутгийн зах зээлд нийлүүлж байна. Түүнчлэн, энэ онд 100 хүүхдийн цэцэрлэг ашиглалтад орж, 320 хүүхдийн хичээлийн барилга дуусах шатандаа оржээ. Үүнд сумын Засаг дарга Х.Энхтүвшин санаачилга гарган ажиллаж байгааг нутгийнхан нь хэлж байна.

Өвөрхангай аймгийн Нарийнтээл сумын Баянтээг багийг өндөр хурдны шилэн кабельд холбов. Энэ нь сумаас баг руу интернэт холбож байгаа анхны тохиолдол гэдгийг “Skynetworks” ХХК-ийн инженер Ч.Булгантамир хэлж байна. Багийн иргэдээс хүсэлт тавьсны дагуу 22 км газар шилэн кабель татаж интернэт холбожээ. Ингэснээр иргэд төрийн мэдээллийн нэгдсэн сан болох “Хур” системийг ашиглан 70 гаруй төрлийн үйлчилгээг авах боломж бүрдэж байна.

Энэ онд Дорноговь аймаг Орон нутгийг хөгжүүлэх сангийн 352 сая төгрөгийн хөрөнгө оруулалтаар долоон суманд инженерийн хийцтэй 23 худаг гаргаж, бэлчээрийн усан хангамжийг нэмэгдүүлэхээр төлөвлөжээ. Одоогийн байдлаар Айраг, Дэлгэрэх, Сайхандулаан, Хөвсгөл, Эрдэнэ, Сайншанд сумын Орон нутгийг хөгжүүлэх сангийн 254 сая төгрөгийн хөрөнгө оруулалтаар шинээр 19 инженерийн хийцтэй худаг гаргах ажлын гүйцэтгэгчийг шалгаруулж гэрээ байгуулан ажиллаж байна. Худаг гаргах ажил 70 хувьтай гэж аймгийн ХХААГ-аас мэдээлэв. Нийт 23 худгийг шинээр гаргаснаар 34.5 мянган га бэлчээрийг усжуулж, 64.4 мянган толгой малыг услах боломж бүрдэх аж.

Ховд аймгийн Буянт сумын Соёлын төвийн эрхлэгч Б.Магсаржавтай холбогдлоо. Тэрбээр тунгалаг Буянтын хөвөөнөө сайхан намар болж буйг дуулгаад, “Өдрийн сонин”-ы хамт олон шинэ дугаар бүрээсээ гурван ширхгийг Буянт суманд явуулж буйд сэтгэл хангалуун байгаагаа илэрхийлэв. Өөрөө шүлэг найраг бичдэг, хөдөөд суугаа уран бүтээлчийн хувьд манай сонины байнгын уншигч юм байна. Буянт сумаар ямар мэдээ мэдээлэлтэй байгааг сонирхоход, орон нутгийн удирдлагууд удахгүй сонгогдож ажилдаа орно гэв. Мөн хэдхэн хоногийн өмнө дууны шүлгийн нэрт мастер Лувсангийн Дагвадорж агсны хөшөөний нээлт, сумын соёлын төвийн нээлттэй хамт болсныг дуулгалаа.

“Үйлсийн сайхан Улаанбаатар”, “Ухаарч амьдрах хорвоо”, “Цэрэг эрийн гэргийн дуу”, “Унаган хайр”, “Хүж дэлхий амгалан байг”, “Бүүвэйл хорвоо” гээд алтан үеийн дуунуудын эзэн, Монголын дууны шүлгийн хаан Дагвадоржийн хөшөө Буянт сумын төвд гэрэлтэн босчээ. Хөшөө босгох ажлыг санаачилсан хүн нь Б.Магсаржав өөрөө гэнэ. Таван жилийн өмнө гаргасан түүний саналыг зураач Б.Аюурзана дэмжсэнээр хөшөөний ажил эхэлсэн байна.

Мөн Буянт сумын хөдөө аж ахуйн мэргэжилтэн И.Баасандоржтой холбогдож сумын ургац хураалтын мэдээг сонирхлоо. Энэ намар тус сумын иргэд 3387 тонн төмс, 972 тонн байцаа, 1062.4 тонн лууван, 814.8 тонн шар манжин, 86.4 тонн хүрэн манжин, 2373 тонн тарвас, 261.3 тонн амтат гуа, 2.4 тонн хулуу, 209.3 тонн улаан лооль хурааж, 6088 тонн хадлан,154.3 тонн гар тэжээл бэлтгэжээ.

Говьсүмбэр аймаг, сумын Иргэдийн төлөөлөгчдийн хурлын 2020 оны ээлжит сонгуулийн санал хураалт аравдугаар сарын 15-нд орон даяар явагдсан. Аймаг, сумын ИТХ-ын нийт 84 мандатад нэр дэвшиж сонгогдсон төлөөлөгчдийн 21 буюу 25 хувь нь эмэгтэй төлөөлөгч байна. Аймгийн ИТХ-ын 17 мандатын хоёр, Баянтал сумын 15 мандатын зургаа, Сүмбэр сумын 21 мандатын тав, Шивээговь сумын 31 мандатын ес нь эмэгтэй төлөөлөгч сонгогджээ.

Хөвсгөл аймгийн Мөрөн сумын холбооны газраас мэдээ ирүүллээ. “Өдрийн сонин” сум болгонд гурван ширхэг тараагдаж буйд иргэд маш их талархан хүлээн авч байна. Сумдын Иргэний танхим, ЗДТГ, номын сангуудад тараагдаж байгаа. Мөрөн сумын хувьд “Өдрийн сонин”-ы захиалагч олонтой. Захиалагчдыг хараад байхад ихэвчлэн нас тогтсон юм уу, төрийн албан хаагч байдаг. Сумдын төв дээр байгаа малчдын хувьд тогтмол хэвлэлтэй болж байгаадаа баяртай байна” гэлээ.