Category: амьдралын-өнгө

Хэнтийн Цэнхэрмандалаас бидэнд мэдээ ирлээ. Тус суманд Монголын энэрэнгүй үйлстэн, хүндэт донор Н.Уртбаяр ажиллаж амьдарч байна. Н.Уртбаяр нь 1985 онд донорт элсэж түүнээс хойш 91 литр 800 грамм цус өгч, 739 хүний амь аварч байсан энэрэнгүй үйлстэн юм. МУЗН-ийн ерөнхий нарийн бичгийн даргаар олон жил үр бүтээлтэй ажилласан Равдан зангийн Самдандовж “Таны гавьяа хөдөлмөрийн баатрын гавьяатай эн тэнцэнэ” гэж хэлж байсан юм. Хүндэт донор тэрээр 2008 онд ходоодны цус алдалттай өвчтөнд нэг өдөрт нэг литр 800 грамм цусыг хэдхэн минутын зайтай амарч байгаад өгч байсан. Энэ тухайгаа “Өвчтэй хүний ам, хамраас цус садарч урсаад, их эвгүй байсан. 20 граммын бүдүүн зүүгээр хоёр сувилагч ээлжлээд л цус аваад нөгөө хүн рүүгээ дамжуулна. Одоо бодоход их бүдүүлэг байж дээ. Тэр өдөр өглөө 10 цагт очоод 14 цаг болоход нэг литр 800 грамм цус авчихсан байсан. Мөн миний бие Цэнхэрмандал сумын Саран гэж хөгшинд нэг литр 500 грамм цус өгч байлаа. Г.Оюунбилэг эмч “Уртаа ах аа, болих уу даа” гэж хэлж байсан. Тэгэхэд нь би “Та бол тангараг өргөсөн эмч хүн, би хүний эрүүл энхийн төлөө явж байгаа хүн, наад хүнээ цаашаа явахыг нь харах уу, эсвэл ирэхийг нь харах уу” гэсэн. Нэг литр 600 гаран цусыг шахахад нөгөө өвчтөний цус тогтоод эхэлсэн байдаг. Өдгөө тэр өвчтөн маань 80 насыг зооглож, 10 жил болоход ганц ч удаа эмнэлэгт хэвтээгүй Мөнгөнморьтод амьдарч байна” хэмээн бахдал дүүрэн хэлдэг. Ийм л хүндэт донор, 739 хүний амийг аварсан энэрэнгүй үйлстэн өдгөө “Алтан донор” цолоо ч авч чадахгүй, хөдөө суманд чимээгүйхэн аж төрж байна. 150-иас дээш хатгуулсан бол “Алтан донор” болдог, гэвч энэ хүн 176 удаа хатгуулж, 91 литр цусаа бусдад өгчээ. Мөн Дорнодын хилийн цэрэгт байсан Оросын хурандаад 550 грамм цус өгч байсан гээд түүний гавьяа барагдахгүй. Энэ сайхан эгэл баатар энэрэнгүй үйлстэн Уртбаярыг алдаршуулж, гавьяа зүтгэлийг нь төр түмэнд мэдрүүлэхийг “Өдрийн сонин”-ы хамт олноос хүсье.

Дорноговь аймгийн Цагдаагийн газрын мэдээллээр эхний 11 сарын байдлаар 382 хэрэг бүртгэгдэж, гэмт хэргийн улмаас 119 хүн гэмтэж, 15 хүн нас барсан байна. Бүртгэгдсэн гэмт хэргийн тоо өмнөх оны мөн үеэс 180-аар буюу 32 хувиар, гэмтсэн хүний тоо 96 буюу 44.6 хувиар, нас барсан хүний тоо 31 буюу 67.4 хувиар тус тус буурсан аж. Харин үндэсний аюулгүй байдлын эсрэг гэмт хэрэг, цахим мэдээллийн аюулгүй байдлын эсрэг гэмт хэрэг, эрүүл мэндийн эсрэг гэмт хэрэг, цэргийн албаны эсрэг гэмт хэрэг, олон нийтийн аюулгүй байдал, ашиг сонирхлын эсрэг гэмт хэрэг бүртгэгдээгүй байна.

Сэлэнгэ аймгийн Нэгдсэн эмнэлгийн Ковидын тасагт эмчлүүлж байгаа өвчтөнүүдийн биеийн байдал хөнгөн, эмчилгээ хэвийн үргэлжилж байна. Энэ тасагт эхний ээлжийн дөрвөн эмч, ажилтнууд 14 хоног ажиллаж үүргээ гүйцэтгэлээ. Өнөөдрөөс дараагийн хоёрдугаар ээлжийн баг өвчтөнүүдэд эмчилгээ, асаргаа, тусламж үйлчилгээг үзүүлэхээр ажилдаа ороод байна. Сэлэнгэ аймагт вирусийн тохиолдол сүүлийн хэд хоногт бүртгэгдээгүй гээд тайвширч болохгүй. Гэрээсээ гарч олон хүнтэй уулзах, бусадтай нийгмийн харилцаанд орохгүй улс, аймгийн Онцгой комиссын шийдвэрийг мөрдөж ухамсартай байхыг аймгийн Онцгой комиссоос нийт иргэддээ онцгойлон сануулж, анхаарууллаа.

УИХ-ын гишүүн О.Цогтгэрэлийн санаачилгаар Увс аймагт Брэндийн зөвлөл шинээр байгууллаа. Тус зөвлөл нь Увс аймгийн онцлогт тулгуурласан нэгдсэн нэг брэнд гаргаж гадаад, дотоодын зах зээлд сурталчлан таниулах, борлуулалтын нэгдсэн сүлжээг үүсгэн, үйлдвэрлэл, үйлчилгээ эрхлэгчдийг дэмжих замаар аймгийн эдийн засагт орлогын шинэ эх үүсвэрийг бий болгох зорилготой аж.

Аймгийн Засаг дарга Ч.Чимэдээр ахлуулсан уг зөвлөлийн дэргэд Ажлын алба байх бөгөөд бүрэлдэхүүнд нь аймгийн хөгжлийн тэргүүлэх салбарт харьяалагдах төрийн байгууллагууд, мэргэжлийн холбоод, хувийн хэвшил, олон нийтийн байгууллагын төлөөллүүд орж ажиллах юм байна.

Увс аймаг Брэндийн зөвлөлтэй болсноор ард иргэдийн дунд ажлын байр нэмэгдэж, орлогын эх үүсвэрүүд шинээр бий болох юм.

Шинэ төрлийн коронавирусээс урьдчилан сэргийлэх ажлын хүрээнд 2020 оны арваннэгдүгээр сарын 12-ны өдрөөс эхлэн одоог хүртэл сумын хэмжээнд 126 төрийн албан хаагч хуваарийн дагуу сумын эргүүл, шуурхай штабын жижүүр, засмал зам дагуух постонд хуваарийн дагуу ажиллаж иргэдэд шаардлага хүргүүлэн хяналтыг хийж ажиллаж байна. ААН, албан байгууллагаар үйлчлүүлж буй иргэд хүн хоорондын зайг баримтлан, амны хаалтаа тогтмол зүүж хэвшлээ. Тосонцэнгэл суманд УБ /199/ Дархан /3/ Эрдэнэт /8/ Сэлэнгэ /26/ Өмнөговь /4/ тус тус нийт 240 иргэн эмнэлгийн хяналтанд гэрээр тусгаарлагдаж баг хариуцсан эмч, Засаг дарга нар заавар зөвлөгөө өгч гэрээ байгуулан хяналтыг сайжруулан ажиллаж байна. Сумын Онцгой комисс, шуурхай штаб.

Өмнөговь аймгийн Залуучуудын холбооноос зохион байгуулсан “Залуусын давлагаа” сайн үйлсийн аян амжилттай өрнөж Даланзадгад сумын 8 багийн 30 өрхөд нэг сарын хоол хүнс, түлшний дэмжлэгийг үзүүллээ. “Залуусын давлагаа” сайн үйлсийн аянд нэгдэж хандив өгсөн Залуучуудын холбооны тэргүүлэгч, гишүүд болоод нийт хандив өгсөн иргэддээ талархал илэрхийлье.

Магадлан итгэмжлэлийн шинжээчийн баг 2020 оны арванхоёрдугаар сарын 17-18-ны өдрүүдэд Баянжаргалан сумын Эрүүл мэндийн төвд ажиллаж магадлан итгэмжлэлд хамруулах үнэлгээг цахим хэлбэрээр амжилттай зохион байгууллаа. Үнэлгээг хийхдээ эмнэлгийн гадна болон дотор обход үзлэг, бүх өрөө, тасалгаанд тойром үзлэг хийн гардан үйлдлийг амбу, хүчилтөрөгч өтгөрүүлэгч, отсас ажиллуулж үзсэн бөгөөд хувийн хамгаалах хувцас хэрэгслийг эмнэлгийн жолооч өмсөж, тайлж үзүүлсэн нь өндөр үнэлгээ авсан байна. Шинэ шалгуур, цахим хэлбэрээр магадлан итгэмжлэлийн үнэлгээг зохион байгуулж, Баянжаргалан сумын “Эрүүл мэндийн төв нь сайн зохион байгуулалттай, техникийн ямар нэгэн саадгүй ажилласан” гэж үнэлэгдлээ.

МЗЭ-ийн гишүүн сэтгүүлч, яруу найрагч Ц.Элбэгзаяа Дорнодчууд “Төмөр багш”, “Төмөр дарга” хэмээн хүндэтгэдэг 52 жил төрдөө зүтгэж буй Монгол Улсын зөвлөх багш Н.Төмөрийн тухай нийтлэл ирүүлснийг товчлон хүргэе. Сүхбаатарын Халзан суманд Нацагдоржийн гэр бүлд төрсөн Төмөр багш 1973 онд УБДС-ийн Монгол хэл, уран зохиолын ангийг төгсөж Дорнод аймагтаа хуваарилагдан, Чойбалсан сумын 8 жилийн сургуулиас ажлын гараагаа эхэлжээ. Тэрээр боловсролын салбарт 37 жил ажиллахдаа Чойбалсан хотынхоо 1,3,4,5,8,11, Хан-Уул цогцолбор сургуульд багш, хичээлийн эрхлэгч, захирал, албан болон албан бус боловсролын арга зүйч, Дорнод аймгийн Боловсрол Соёлын төвд мэргэжилтэн зэрэг албыг хариуцлагатай, ажлын өндөр амжилттай хашиж иржээ. Монгол Улсын Зөвлөх багш түүний бүтээлч ажлаас цухас дурдвал өөрийн мэргэжлээрээ 25 шавиа бэлтгэсэн, мэргэжлээрээ стандарт шаардлага хангасан таван кабинетыг байгуулж, сурган хүмүүжүүлэх илтгэлийн уралдаанд найман удаа, багш нарын “Ур чадвар”-ын уралдаанд жил бүр оролцон 1-5 дугаар байранд шалгарч байжээ. Залуу багш нарт “Заах аргын чадвар өсөх, хэл ярианы логик сэтгэлгээ хөгжих зэрэг нь сайн багш болох замд сайнаар нөлөөлнө” хэмээн зөвлөдөг бөгөөд сурган хүмүүжүүлэгчид болон мэргэжлийн багш нар эцэг эх иргэдэд зориулж 70 гаруй ном, зөвлөмж бичиж олны хүртээл болгосон. 2007 онд гавьяаны амралтаа авч Чойбалсан хотын 4000 ахмадтай хорооны даргаар сонгогдож, 2015 онд Монголын ахмадын хорооны дарга Ц.Сүхбаатар орон нутагт очин ажилтай нь танилцаж Улсын тэргүүний ахмадын хороо болгон батламжилсан. 2017 онд Н.Төмөрийг аймгийн Ахмадын хорооны даргаар дэвшүүлэн сонгосон. Өнгөрсөн онд ажил үйлсээрээ улсдаа мөн тэргүүлсэн. Алдарт эхийн хоёрдугаар одонтой тэрээр 12 хүүхэд төрүүлсэн ачит ээжтэйгээ “Монголын алдарт эхчүүд” номонд мөнхөрсөн бахархалтай.

Орон нутгийн сонгуулийн дүнд тус сумын ИТХ-д МАН 26 суудал, АН таван суудалтай болсон юм. Хэрлэн сумын ИТХ-ын хоёрдугаар хуралдаанаар Ардчилсан намаас сонгогдсон төлөөлөгчид бүлэг байгуулах санал хүргүүлжээ. Энэ саналыг Хэрлэн сумын ИТХ-ын МАН-ын бүлэг хүлээн авч, дэмжсэнээр АН бүлэгтэй болсон байна.

Сүхбаатар аймгийн Мэргэжлийн хяналтын газраас урьдчилан сэргийлэх ажлын хүрээнд авч хэрэгжүүлж буй арга хэмээний үр дүнг танилцууллаа.

Баруун-Урт сумын хэмжээнд зургаан ажлын хэсэг гарч шалгалт хийснээс лабораторийн шинжилгээний бичиггүй, хаяг шошгоны зөрчилтэй, хугацаа хэтэрсэн 180 нэр төрлийн 2700 ширхэг нийт 6.2 сая төгрөгийн бараа бүтээгдэхүүнийг хураан авч, устгуулахаар хүлээлгэн өгчээ.