Category: спорт

Монголын хүндийн өргөлтийн холбооны ерөнхийлөгчийн нэрэмжит “Парис-2024” зуны XXXIII олимпийн наадмын өмнөх сорилт тэмцээн болно. Тэмцээн энэ сарын 26-27-ны өдрүүдэд Сүхбаатарын талбайд болох юм.

Тус тэмцээний зааврыг танилцуулж байна.

Америк тивийн хөл бөмбөгийн аварга шалгаруулах тэмцээний шөвгийн наймын тоглолтод Аргентины шигшээ баг Эквадорын багийг хожсоноор тус тэмцээний хагас шигшээд шалгарсан эхний баг боллоо.

АНУ-ын Техас муж улсын Хьюстон хотод болсон тоглолтын үндсэн цаг 1:1-ээр өндөрлөж, Аргентины шигшээ баг торгуулийн цохилтоор 4:2-оор хожсон байна. Тоглолтын тооны харьцааг Аргентины шигшээ багийн довтлогч Лаутаро Мартинес нээжээ. Тэрбээр тоглолтын 35 дахь минутад Алексис Макаллистерийн өгсөн дамжуулалтыг толгойгоороо цохиж гоолдсон байна. Эквадорын багийн гоолыг 92 дахь минутад довтлогч Кевин Родригес оруулжээ. Аргентины шигшээ багийн довтлогч, ахлагч Лионель Месси торгуулийн цохилтод гоол оруулж чадаагүй байна. Аргентины хаалгач Эмилиано Мартинез хоёр цохилтыг хаажээ.

Хагас шигшээд аргентинчууд Венесуэл, Канадын шигшээ багуудын аль хожсонтой долоодугаар сарын 6-нд тоглоно.

Олон улсын “Олимпийн өдөр”-ийг гурав хоногийн өмнө тэмдэглэсэн Монголын баг тамирчид энэ удаагийн Парисын олимпод есөн төрөлд өрсөлдөх 32 эрхийг аваад байна. Одоогоос 130 жилийн өмнө буюу 1894 оны зургадугаар сарын 23-ны өдөр Францын нийгмийн нэрт зүтгэлтэн Пьер де Кубертиний санаачилгаар олон улсын спортын зүтгэлтнүүд олимпийн наадмыг орчин цагт сэргээн явуулах чухал шийдвэр гаргаж байсан түүхтэй. Тиймээс орчин үеийн олимпизмын хөдөлгөөн энэ өдөр үүссэн гэж үздэг.

Бөмбөрцгийн спортын хамгийн том цэнгэл наадам болох олимп эхлэхэд яг нэг сарын хугацаа үлдээд байна. Монголын баг тамирчид 1964 оны Токиогийн олимпийн наадмаас эхлэн зуны олимпийн 13 наадамд оролцож хоёр алт, 11 мөнгө, 17 хүрэл, нийт 30 медаль хүртсэн амжилттай байгаа. Үүн дотроо жүдочид 11, чөлөөтийнхөн 10, боксчид 7, буудлагынхан хоёр медаль хүртжээ.
Монгол Улсын шигшээ багийн хувьд олимпийн эрх олгох тэмцээн албан ёсоор дууссан. Харин Олон улсын усан спортын холбооноос Парисын олимпийн бассейн усан замд уралдах тамирчдыг баталгаажуулсан бөгөөд манай улсад эрэгтэй, эмэгтэй тус бүр нэг эрх өгснөөр Монголын баг тамирчдын тоо хоёроор нэмэгдээд байгаа юм.

Спортын салбарын удирдлагууд “Энэ удаагийн олимпод 45-50 эрх авах боломжтой” хэмээн ярьж байсан ч талаар болов. 2024 оны олимптой жилд спортын салбарын төсөв өмнө жилүүдээс харьцангуй өндөр байсан нь үнэн. Энэ нь спортын салбарт, тэр тусмаа олимпод хэрхэн ач холбогдол өгсний нотолгоо юм. Гэвч “Рио-2016”, “Токио-2020” наадамд 43 тамирчин оролцуулж байсан нь дээд амжилтдаа өнөө жил хүрсэнгүй.

Сарын дараа эхлэх “Парис-2024” зуны XXXIII наадамд байт харваа, бокс, буудлага, хөнгөн атлетик, жүдо, чөлөөт бөх, хүндийг өргөлт, усанд сэлэлт, дугуйн спорт гэсэн есөн төрөлд 32 тамирчин илгээхээр болсон бөгөөд эрэгтэй 15, эмэгтэй 17 тамирчин өрсөлдөнө. Энэ удаагийн олимпийн нэгэн тод өнгө нь дугуйн спортоор эрхээ авсан явдал юм.

Монголын багийг жүдочид оролцогчдын тоогоороо тэргүүлж 10 тамирчин зодоглоно. Гэхдээ Токиод 11, Риод 13 жүдоч барилдаж байсныг бодвол мэдээж хэрэг, буурсан үзүүлэлт. Мөн олимпоос эрэгтэйчүүд нь медаль авч чадахгүй яваа ч Монголын топ-4 спортын нэг хэвээр байгаа чөлөөт бөхийнхөн найман эрх авлаа. Чөлөөтийн эмэгтэйчүүдийн амжилт тогтмол байгаа бол эрэгтэйчүүдийнх бууралттай байгаа.

Олимп болон дэлхийн аваргатай Монголын топ спортын төрөлд зүй ёсоор нэрлэгддэг ширэн бээлийтнүүдийн төлөөлөл болж, ердөө хоёрхон эмэгтэй боксчин хүч үзнэ. Боксчдын хувьд “Парис-2024”-д өрсөлдөх эрхийн тэмцээн жинхэнэ барцадтай байлаа гэхэд хилс болохгүй. Хариуцлагагүй удирдлагын буруугаас тэд эрхийн төлөөх нэг тэмцээнээ салхинд хийсгэж, нөгөө боломжоо ашиглаж чадсангүй.Олимпийн эрхийн төлөөх анхны тэмцээндээ оролцсон бол 2-3 эрх авах байсныг үгүйсгэх аргагүй.
Яг ийм эрсдэлтэй цаг үед зарим нэгэн спортын зүтгэлтэнтэй уулзаж, санал сэтгэгдлийг нь сонссон юм.

---

Монгол Улсын хөдөлмөрийн баатар, Монгол Улсын гавьяат дасгалжуулагч, Ардын багш Ч.Насантогтох: Энэ удаагийн Олимпоос Монголын баг тамирчид 4-5 медаль авах боломжтой

---

-Жүдо бөхийн үндэсний шигшээ багийн ахлах дасгалжуулагчаар олон жил ажилласан туршлагатай хүний тань хувьд энэ удаагийн олимпийн өнгийг тодорхойлбол…?

-Монголын баг тамирчид спортын есөн төрөлд 32 эрх аваад байна. Олон улсын спортын сайтад Монголын баг тамирчдыг Парисын олимпоос 4-5 медаль авах боломжтой гэсэн таамаг дэвшүүлсэн байна лээ. Би үүнтэй санал нэг байгаа.Тухайлбал, чөлөөтийнхөн 1-2 медаль, манай жүдогийнхон хоёр медаль авах байх гэсэн таамагтай л сууж байна.

-Та хэдэн удаагийн олимпод оролцсон билээ?

-Нэг их шалихгүй. Жүдогийн Үндэсний шигшээ багийн ахлах дасгалжуулагчийн албыг чамгүй олон жил хашсан. Нийтдээ долоон олимпод оролцсон байдаг юм.

-2020 оны Токиогийн олимпод 43 эрхтэй оролцож байсан Монголын баг тамирчдын тухайд нэлээд буурсан үзүүлэлт болох шиг боллоо?

-/Инээв/. Эрхийн хувьд тийм харагдаж болох ч паралимпийн төрлийн эрхээ нэмэхээр хэлсэн дүндээ дөхөж очно л доо.

-Найдлага тээсэн зарим төрлийн тухайд олны итгэлийг алдсан үйлдэл гаргах шиг боллоо. Үүн дээр Та юу хэлмээр байна. Ялангуяа боксынхны хувьд?

-Миний хувьд “Ханжөү-2022” наадмын алтан медальт боксчин, МУГТ Б.Чинзоригт их найдлага тавьж байсан. Тэр маань сэргээшийн асуудлаар бүдэрчихлээ. Ер нь тамирчнаас нь сэргээш илэрсэн гэж үзвэл тухайн төрлийн шигшээ багийн ахлах дасгалжуулагч болон багийн эмч хамгийн түрүүнд огцордог олон улсын жишиг байдаг. Тийм л жишгээр боксын шигшээ багийн ахлах дасгалжуулагч ажлаа өгсөн болов уу гэж боддог.

-Та одоо ямар алба хашиж байна вэ?

-Олимпод бэлтгэх ажлын хэсэгт 25 хүн ахлаад ажиллаж байна. Манай баг тамирчдын эрүүл мэнд, сэтгэл зүй гээд дөрвөн гол чиглэлийг хариуцаж байгаа юм.

-Парисын олимпод өрсөлдөх эрхээ авсан тамирчид хаана бэлтгэл хийж байгаа вэ?

-Чөлөөт бөхийнхөн Батсүмбэрийн “Чемпион” цогцолборт, буудлагынхан клубтээ, хүндийг өргөлтийн М.Анхцэцэг Төрхурхын амралтад, хөнгөн атлетикийнхан Хонхорт, боксынхон Эрдэнэтийн “Сэлэнгэ” амралтад бэлтгэл сургуулилтаа хийж байгаа. Харин манай жүдочид өнөөдрөөс “Цонжин болдог”-т очиж бэлтгэлдээ гарна.

---

Монгол Улсан гавьяат дасгалжуулагч, Дэлхийн шилдэг шүүгчийн дээд үнэлгээ болох “Алтан шүгэл” шагналт, Ардын багш А.Басхүү: Ард түмний итгэл найдварыг тамирчид биелүүлэх ёстой

---

-Спортын хамгийн том цэнгэл наадам болох Олимпийг та хэдэн удаа шүүсэн бэ?

-Олимпийн наадмыг шүүх эрхийг зургаан удаа надад олгосон ч би таван олимпод биечлэн шүүгчээр ажилласан байдаг. Тухайн цаг үеийн байдлаас болж 1984 оны Лос-Анжелесийн олимпод оролцож чадаагүй юм. Тус олимпод ЗХУ, БНМАУ-ын тус бүр гурван шүүгч оролцоогүй. Харин дараа нь Лос-Анжелесийн олимпод шүүсэн гэх батламжийг бидэнд өгсөн.

-Чөлөөт бөхийн шигшээ багийн ахлах дасгалжуулагч байхдаа олимпод оролцсон биз дээ?
Нэг удаа л дасгалжуулагчаар оролцсон.

-Бөмбөрцгийн хамгийн том спортын наадмыг шүүнэ гэдэг нэр төрийн хэрэг. Тэр тусмаа таван удаа тамирчдын хувь заяаг дэнсэлж явсан гэхээр…?

-Олимпийн наадмыг шүүнэ гэдэг үнэхээр хариуцлагатай ажил. Тэр ч утгаараа 2014 онд Дэлхийн алдрын танхимд залагдсан анхны монгол хүн болсон. Шүүгчийн хөдөлмөрөө үнэлүүлсэн нь тэр шүү дээ. Тухайн үедээ шүүгчээс найм дахь хүн нь болж байлаа. Гэтэл дэлхий дээр хэчнээн шүүгч байдаг билээ гэж бодохоор бахархмаар л юм билээ. АНУ-д төвтэй энэхүү танхимд залагдсан анхны монгол хүн болсондоо баярлаж явдаг даа.

-Сарын дараа Парисын олимп хөшгөө нээх гэж байна. Манайхан энэ олимпод өрсөлдөх 32 эрх авлаа. Таны хувьд сэтгэгдэл ямар байна вэ?

-Чөлөөт ч бай, жүдо ч бай, бокс ч бай спорт бол спорт. Үүнийг дотор нь ялгаж салган зааглаад байх шаардлагагүй. Аливаа спортын амжилтад уруудах, өгсөх явдал гарч л байдаг. Монголын тамирчид 1968 онд анх олимпод оролцоод дөрвөн медаль авчирч байсан түүхтэй.2008 онд олимпийн хоёр аваргатай болсон. Токиогийн олимпийг бодвол энэ удаа эрхийн тоо буурчээ. Харамсалтай. Гэхдээ нэг гол зүйл байна.

-Юу тэр вэ?

-Бидний үеийг бодвол их спортод төр, засгаас анхаарч, хөрөнгө мөнгө төсөвлөж өгдөг болж. Тийм болохоор хувь тамирчид хичээх хэрэгтэй. Төрийн хишиг, ард түмний итгэл найдварыг тамирчид биелүүлэх ёстой. Нэгэнт олимпод өрсөлдөх эрхээ авсан бол ухрах зам үгүй. Өмнөх Олимпийн эрхдээ ч хүрсэнгүй гэж шалтаг тоочих юм байхгүй. Үүргээ ухамсарлах ёстой. Харамсалтай нь үүрэг гэх зүйлийг аль ч салбарт орхигдуулаад байх юм.

Н.Саранчимэг

Монголын хөлбөмбөгийн холбооноос зохион байгуулдаг Монголын хөлбөмбөгийн нэгдүгээр лигийн 2023-2024 оны улирлын тоглолтууд өндөрлөж цом гардуулах ёслолоо 2024 оны зургаадугаар сарын 30-ны өдөр товложээ. Энэхүү үйл ажиллагаа нь олон нийтэд нээлттэй болох бөгөөд хөлбөмбөг сонирхогч та бүхнийг Хөлбөмбөгийн холбооны талбайд хүрэлцэн очиж, сонирхон үзэхийг урьж байна.

Зургаадугаар сарын 30-ны өдөр 16:30 цагаас Монголын хөлбөмбөгийн талбайд ёслолын үйл ажиллагаа болно.

Олон улсын олимпын хорооноос Орос, Беларусын тамирчдын талаар гаргасан шийдвэртэй холбоотойгоор Дэлхийн бөхийн нэгдсэн холбооноос олимпын квотод дахин хуваарилалт хийжээ.

Ингэхдээ журмын дагуу жендерийн тэгш байдлыг харгалзан, эрх аваагүй үлдсэн хамгийн өндөр чансаатай олимпын хороонд квот өгөх шийдвэрийн дагуу чөлөөт бөхийн эмэгтэйчүүдийн 57 кг-д манай тамирчин Б.Хонгорзул Парис-2024 зуны XXXIII олимпын наадамд оролцохоор боллоо.

Ингэснээр манай эмэгтэйчүүд бүтэн багаараа Парисыг зорино.

Европын хөлбөмбөгийн аварга шалгаруулах тэмцээн ид өрнөж байна. Үүний хажуугаар Копа Америка буюу Америк тивийн аварга шалгаруулах тэмцээн эхэлж, цэнхэр гариг хөлбөмбөгөөр амьсгалж байна.

Ийм үед “Евро 2024” тэмцээний эргэн тойронд өрнөж буй үйл явдлаас тоймлон хүргэж байна.

---

ФРАНЦ 1-1 ПОЛЬШ

Францын шигшээ баг Польштой эвийн гэрээ байгуулж, ганц оноо авснаар хэсгээсээ хоёрдугаар байраар хасагдах шатанд шалгарлаа. Авууштай нь, Мбаппе гоол оруулсан явдал. Хэдийгээр Мбаппе салхийг хагалж, гоол оруулсан ч, Польшийн Левандовски тооны харьцааг тэнцүүлж, тоглолт 1-1 гэсэн харьцаатай өндөрлөсөн юм. Тоглолтын шилдгээр Польшийн хаалгач Лукаш Скорупски нэрлэгдсэн байна. Тоглолтын дараа Францын дасгалжуулагч Дидье Дешам “Бид хэсгээ тэргүүлэхийг хүссэн ч Скорупски тэнд байлаа. Тэр өнөөдөр гайхалтай байсан. Бид долоон боломж үүсгэсэн ч ашиглаж чадсангүй” гэсэн бол Польшийн дасгалжуулагч Михал Пробеж ” Хасагдах шатанд шалгарч чадаагүй нь ичмээр юм. Гэхдээ бид эцсээ хүртэл тэмцэж, сайн өрсөлдөөнийг үзүүллээ. Хөлбөмбөг ингэж л урагшилдаг. Тамирчдынхаа хичээл зүтгэлд талархаж байна” гэжээ.

АВСТРИ 3-2 НИДЕРЛАНД

Австрийн шигшээ баг Франц, Нидерланд, Польш гэсэн хүчирхэг багуудыг ардаа орхиж хэсгээ тэргүүллээ. Өчигдөр л гэхэд Нидерландтай нээлттэй тоглолтыг үзүүлж, таван гоол орсон тоглолтын эцэст Забитцерын гоолоор ялалт байгуулжээ. Ингэснээр тэд хэсгээ тэргүүлж, Нидерландын шигшээ гуравдугаар байраар хасагдах шатанд шалгараад байна. Австрийн дасгалжуулагч Ральф Рангник “Ерөнхийдөө бид хожихын төлөө илүү шунаж, талбай дээр эрчтэй байлаа. Гоол алдсан ч хурдан сэргэж, хүнд байдалд орсонгүй. Бид тоглолтын хэв маягаа хадгалж чадсан” гэсэн бол Нидерландын дасгалжуулагч Роналд Коэман “Бид тоглолтыг муу эхлүүлсэн. Хүчтэй байж чадсангүй. Тоглолтыг эхнээс нь удирдаж чадсангүй. Бид талбай дээрх хариуцлагаа хүлээх болно” гэлээ.

ХОРВАТ 1-1 ИТАЛИ

Хорватын алтан үеийнхэн гэгддэг хөлбөмбөгчид 2018 оны дэлхийн аваргын тэмцээнээс мөнгөн медаль, 2022 оны ДАШТ-ээс хүрэл медаль хүртсэн амжилттай баг. Харин энэ удаагийн Европын аварга шалгаруулах тэмцээнээр Модрич, Перишич, Манжукич, Субасич, Чорлука, Ракитич, Брозович, Ковачич, Ловрен, Крамарич нараар эхэлсэн Хорватын хөлбөмбөгийн алтан үе төгсөж байх шиг. “Евро 2024”-ийн тун ширүүн өрсөлдөөнтэй, үзүүштэй тоглолтыг энэ хоёр баг үзүүлж, хөгжөөн дэмжигчдээ огшоосон юм. Хоёр багийн хаалгач болох Жанлиужи Донаррумма болон Доминик Ливакович нар гайхалтай байсныг хэлэх хэрэгтэй.

Хоёрдугаар үед Хорватаас эхний гоолыг оруулсан. Модричийн торгуулийн цохилтыг Доннарумма хаасан ч гүйцэт цэвэрлээгүй бөмбөг эргэн Модрич дээр ирэн гоол оруулжээ. Ийнхүү Хорват 1-0 гэсэн харьцаатай хожиж, Италийн шигшээ хасагдах шатанд шалгарах эсэх нь эргэлзээтэй болсон үед Спаллетти довтолгооны сэлгээнүүдээ оруулсан. Үндсэн цаг дуусч, шүүгч долоон минутыг нэмж сунгасан үед Калафьоргийн дамжуулалтаар Закканьи гайхалтай гоолыг оруулж, тооны харьцаа тэнцсэнээр Италийн шигшээ хэсгээсээ шалгарч, Хорватын шигшээ гэртээ харих болсон юм.

Италийн ахлах дасгалжуулагч Лучано Спаллетти “Иймэрхүү шийдвэрлэх тоглолтууд төгсгөл хэсэг рүүгээ улам сонирхолтой болдог. Эхний үед бид тааруу байлаа. Хэрэв жаахан хичээсэн бол амжилтад хүрэх байсан. Ялна гэсэн сэтгэхүйгүй ийм үр дүнд хүрэхгүй” гэсэн бол Хорватын дасгалжуулагч Златко Далич “Энэ бидний тэмцээн биш байжээ. Бид хоёр ч торгуулийн цохилт алдлаа. Нэмэлт цагт хоёр ч гоол алдлаа. Бүх нөхцөл байдал бидний гарт байсан” гэжээ.

АЛБАНИ 0-1 ИСПАНИ

Тоглолтын өмнө Испанийн шигшээ баг гарааны 11 тоглогчийнхоо арвыг нь сольж, ганцхан хамгаалагч Лапорте дараалан тоглосон юм. Нэгдүгээр үе эхлээд удаагүй байхад Ферран Торрес гоол оруулж, ерөнхийдөө тоглолтын хувь заяаг шийдчихсэн гэхэд хилсдэхгүй. Үлдсэн хугацаанд Албани алдах зүйлгүй урагш шахаж, довтолсон ч амжилтад хүрсэнгүй. Тоглолт Испанийн ялалтаар өндөрлөжээ. Ийнхүү В хэсгээс Испани болон Италийн шигшээ багууд хасагдах шатанд шалгарлаа.

Испанийн дасгалжуулагч Луис де ла Фуенте ” Тоглолт бүр ширүүн өрсөлдөөнтэй, тоглоход хэцүү байна. Бүх гурван тоглолтдоо хожиж, хаалгандаа гоол алдсангүй. Энэ эрчээрээ л байх хэрэгтэй. Хасагдах шатанд Европын шилдэг 16 баг байх болно. Нэг өдөр хамгийн дээр нь байсан ч дараагийн удаад юу ч биш болж болно” гэсэн бол Албанийн дасгалжуулагч Силвиньо “Тоглогчдоороо, улсаараа бахархаж байна. Бид хоёр дахь удаагаа л Еврод орж байна. Гурван гайхалтай багтай сайн тоглож, эх орноо бахархуулж чадлаа. Бид ийм тэмцээнд олон орох хэрэгтэй” гэжээ.

ШВЕЙЦАРЬ1-1 ГЕРМАН

Хожсон нь хэсгээ тэргүүлэх чухал тоглолтод хоёр баг эвийн гэрээ байгуулснаар Герман хэсгээ тэргүүлж, Швейцарь хоёрдугаар байраар хасагдах шатанд шалгарлаа. Нэг болон хоёрдугаар үед Германы довтолгоо эрчтэй үргэлжилж байсан ч гоол оруулаагүй болохоор Германы дэмжигчид багтаа эргэлзэж эхэлсэн юм. Тоглолтын төгсгөлд Швейцарийн шигшээ баг дахин нэг гоол оруулсан ч отон тоглолт байсан учраас тооцсонгүй. Харин шүүгчийн сунгасан нэмэлт цагийн төгсгөлд Раумын хөндлөн дамжуулалтыг Фулкруг мөргөж, Германы шигшээ баг тэнцээний гоолыг оруулснаар тоглолт өндөрлөсөн байна.

Тоглолтын дараа Швейцарийн дасгалжуулагч Мурат Якин “Хэсэгтээ хожигдоогүйдээ баяртай байна. Бид багаараа хөдөлмөрлөж, зөв санаатай байна. Систем, стратеги ажиллаж, талбайд гарсан тамирчид тун сайн байна. Бид тэмцсэн, их гүйсэн ч хүчтэй өрсөлдөгчийн эсрэг хэцүү байлаа. Том сорилт байлаа” гэсэн бол Германы дасгалжуулагч Юлиан Нагельсманн “Төгсгөлд хүртэх ёстой оноогоо хүртлээ. Мэдээж довтолгооны хөлбөмбөгт эрсдэл үүрч, гоол алдах тохиолдол байдаг. Бид эргэн ирж чадлаа. Бид энэ тэнцээг хүртэх эрхтэй. Швейцарь бол гайхалтай өрсөлдөгч. Сонирхолтой тоглолт байлаа. Сэлгээгээр талбайд гарсан тамирчид чухал гоол оруулж байгаа нь сайн хэрэг. Бид өрсөлдөгчийнхөө гарааг судалж, сэлгээгээрээ тоглолтыг өөрчлөхийг хүссэн” гэжээ.

ШОТЛАНД0-1 УНГАР

Шотланд энэ тоглолтод хожиж байж, дөрвөн оноотой гуравдугаар байраар хасагдах шатанд шалгарах боломжтой байсан бол Унгар хожвол энэ тэмцээний анхны хожлоо аваад зогсохгүй гуравдугаар байраар дараагийн шатанд шалгарах боломж хүртэх байлаа. Тоглолтын төгсгөлд буюу 90+10 дахь минутад сэлгээгээр талбайд гарсан Кевин Чобот гоол оруулснаар Унгарын шигшээ баг ялалт байгуулжээ.

Унгарын дасгалжуулагч Марко Росси ” Нэгдүгээр үед Шотланд бага зэрэг илүү бөмбөг эзэмшсэн. Бид илүү олон боломж үүсгэсэн гэдгээрээ тоглолт эн тэнцүү боллоо. Тэд бөмбөг илүү эзэмшсэн ч агуулгаараа бид энэ хожлыг хүртэх эрхтэй” гэсэн бол Шотландын дасгалжуулагч Стив Кларк “Бид нээлттэй тоглож, эсрэг багтаа сөрөг довтолгоо явуулах боломжийг олголоо. Гэхдээ бид боломж үүсгэсэн. Заавал хожих ёстой гэдэг дарамтад тоглох нь боломж үүсгэх бүрт хэцүү болгож байсан. Хөлбөмбөгийн бурхан бидний талд байх хэрэгтэй байсан ч өнөөдөр байсангүй” гэсэн байна.

 

Н.САРАНЧИМЭГ

НҮБ-ын ивээл дор зохион байгуулагддаг „United World Games“ Олон улсын өсвөрийн спортын их наадам Австри улсын Клагенфу.26рт хотод спортын 12 төрлөөр 30 орны 8000 гаруй тамирчид оролцсон тэмцээн 2024 оны зургаадугаар сарын 20-23-ны өдрүүдэд зохион байгуулагдлаа.

Энэ тэмцээний сагсан бөмбөгийн төрөлд Монгол Улсаас U14 болон U16 насны ангилалд Монгол Улсын аварга “Modun Wolves Basketball Club”-ын „Modun Wolves-Team Mongolia“ хоёр баг тамирчид оролцсоноос Д.Отгонбаатар дасгалжуулагчтай U14 насны баг хэсгийн тоглолтдоо Австри, Нидерланд, Италийн багийг хожиж хэсгээсээ нэгээр гарчээ.

Дараа нь Туркийн багтай тоглож, шөвгийн 16-гаас гарснаар шилдэг наймд үлдсэн байна. Улмаар Герман улсын багтай тоглож шилдэг дөрөвт шалгаран, алтан медалын төлөө АНУ-ийн 1-р багтай тоглон хожигдож, хүрлийн төлөө АНУ-ийн 2-р багийг хожсоноор Хүрэл медалийн болзол хангажээ.

Олон улсын тэмцээний гараагаас амжилттай тавьсан өсвөрийн „Modun Wolves -Team Mongolia“ багийнхан өчигдөр /2024.06.25/ эх орондоо ирсэн байна.

Сагсан бөмбөгийн тэмцээнд 60 гаруй баг өрсөлдсөнөөс АНУ-ын нэгдүгээр баг алт, БНХАУ-ын баг мөнгө, Монгол Улсын хөвгүүд хүрэл медаль хүртжээ.