Category: мэдээ

Categories
мэдээ нийгэм

Энхийг сахиулагчдын ээлжит цуваа Өмнөд Суданыг зорилоо DNN.mn

Бүгд Найрамдах Өмнөд Судан Улсад явагдаж байгаа НҮБ-ын мандаттай UNMISS ажиллагаанд үүрэг гүйцэтгэхээр Монгол Улсын Зэвсэгт хүчний XIV ээлжийн мотобуудлагын батальоны хоёрдугаар цувраа 10 дугаар сарын 24-ний өдөр ажиллагааны газар орныг зорив. Энх цагт эх орныхоо бахархал нь болон гялалзаж яваа энхийг сахиулагчдыг үндэсний агаарын тээвэрлэгч “МИАТ” ТӨХК-ийн “Чингис хаан” онгоцны хөлгийн ахмад Б.Эрдэнэ-Уулаар ахлуулсан нисгэгч нар хүргэж өгөхөөр эх орноосоо хөөрлөө.

May be an image of 5 people

Энэ удаагийн цуврааг багийн захирагчийн орлогч, дэд хурандаа Т.Тулга ахлан ажиллагааны газар орныг зорьсон ба ЗХЖШ-ын орлогч дарга бригадын генерал Б.Баатар, ЗХЖШ-ын ахлагч, тэргүүн ахлагч Н.Баасан, ЗХЖШ-ын Энхийг дэмжих, цэргийн хамтын ажиллагааны хэлтсийн дарга хурандаа Д.Мягмаржав нар энхийг сахиулагчдаа эх орноосоо хөөртөл нь хамт байв. Бригадын генерал Б.Баатар Монголын энхийг сахиулагчдын өнөөдрийг хүртэл тогтвортойгоор байгуулж яваа гавьяаг тодотгож, энэ хариуцлагатай үүрэг өнөөдөр та бүхний нуруун дээр ирж байна хэмээн офицер, ахлагч бүрийг эрч хүч нэмэгдүүлсэн урмын үгээр мялааж, ажиллагааны газар оронд эв найрамдалтай, нэгнээ ойлгодог, дэмждэг, бусадтайгаа нийцтэй байхад л бүх зүйл болно гэв. Мөн тэрээр монгол цэргүүд НҮБ-д хүлээн зөвшөөрөгдөж, бахархал болсон шалтгаан нь сахилга хариуцлага гэдгийг ч онцлон тэмдэглэж, энхийг сахиулагчдыг зорьсон газарт нь саадгүй хүргэхээр эх орноосоо мордож буй хөлгийн ахмад Б.Эрдэнэ-Уулаар ахлуулсан нисгэгч нарт чин сэтгэлийн талархал дэвшүүлсэн юм.

Энхийг сахиулагчдын дунд анх удаа ажиллагаанд явж байгаа, бүр эх орноосоо ч анх удаа хилийн дээс алхаж байгаа алба хаагч байх бол дадлага туршлагатай ажиллагааны туршлагатай алба хаагчид ч цөөнгүй байв. Тэд хамт олонч нөхөрсгөөрөө эрхгүй ялгарч байсан нь гар тээшийн ачаа 10 кг байх ёстой гэсэн шаардлагыг биелүүлж буйгаас ч харагдана лээ. Гар тээш нь 10 кг нь илүү гарсан нь дутуу нэгнийхээ цүнхэнд багцлан хийж, хэн нь ч ачаагаа үлдээж, сэтгэл дундуур үлдсэнгүй.

Хурандаа Д.Эрдэнэбилэг захирагчтай Монгол Улсын Зэвсэгт хүчний XIV ээлжийн мотобуудлагын батальоны 50 хувь нь анх удаа үүрэг гүйцэтгэх гэж байгаа залуу офицер, ахлагч нар бөгөөд тэд эх орныхоо өгсөн үүрэг даалгаврыг өвөртөлж, аав ээж, хань ижил, үр хүүхэд, ахан дүүс, найз нөхдийнхөө ерөөлтэйгөөр ажиллагааны газар орныг зорьсоор байна гэж  Зэвсэгт хүчний Жанжин штабаас мэдээллээ.

Categories
мэдээ нийгэм

“Рутан” ХХК-ийн гаргасан зөрчлийг арилгуулна DNN.mn

Дэлхийн банкны хөнгөлөлттэй зээлээр дулааны 2А магистраль, 2ф350 мм-ийн голчтой 0,95 хос.км шугамыг 2ф500 мм-ийн голчтой болгон өргөтгөн шинэчлэх ажлыг өнгөрсөн 7 дугаар сард эхлүүлсэн. Дээрх ажлыг гүйцэтгэгчээр “Рутан” ХХК ажиллаж байна. Дулааны шугамын ажлыг Улсын драмын театрын урд талбайгаас Монгол Улсын боловсролын их сургуулийн баруун талын зам хүртэл 950 метр талбайд хийнэ.

Өнөөдрийн байдлаар дулааны шугамын ажил Улсын драмын театраас “Сонгдо” эмнэлгийн баруун тал хүртэл, ХХБ-ны зүүн хойноос Боловсролын их сургуулийн баруун тал хүртэл хийгдээд байна.

Үлдсэн хэсэг болох “Сонгдо” эмнэлгийн баруун талаас ХХБ-ны зүүн хойд Энхтайваны өргөн чөлөөний авто зам хүртэлх хэсэг шугамын ажил хийгдэж амжаагүй тул Улаанбаатар хотын Захирагчийн ажлын албанаас энэ жил нэмж авто зам, явган зам сэтлэх зөвшөөрөл өгөхгүй байхаар шийдвэр гаргасан юм.

Гэвч “Рутан” ХХК нь 2024 оны 10 дугаар сарын 19-ний өдөр Зоригийн гудамжны авто зам, ХХБ-ны зүүн талын авто замыг зөвшөөрөлгүй сэтлэн дулааны шугамын ажил гүйцэтгэснээс үүдэн авто замд эвдрэл үүсэж, зорчих хөдөлгөөнд саад учраад байна.

Үүссэн асуудалтай холбогдуулан цагдаагийн байгууллагаас “Рутан” ХХК-д зөрчлийн тухай хуулиар арга хэмжээ авч, гаргасан зөрчлийг арилгуулна.

Categories
мэдээ нийгэм нүүр-хуудасны-онцлох онцлох-нийтлэл туслах-ангилал

Б.Анхбаяр: Газрын тосны бүтээгдэхүүний хэрэглээ жил ирэх тусам 5-10 хувиар нэмэгдэж байна DNN.mn

Аж үйлдвэр, эрдэс баялгийн яамны Газрын тосны бодлогын газрын дарга Б.Анхбаяраас түлш, шатахууны нөөцийн талаар тодрууллаа.

-Манай улсын шатахуун, түлшний нөөц хэр байна вэ?

-Монгол Улсын хэмжээнд өнөөдөр/өчигдөр/-ийн байдлаар АИ92 төрлийн авто бензин 25 орчим хоног, түлш 25 хоног, АИ95 бензин 45 хоногийн нөөцтэй байна. Энэ долоо хоногийн Засгийн газрын хуралдаанд Аж үйлдвэр, эрдэс баялгийн яамнаас 2025 онд аж ахуйн нэгжүүдийн бүрдүүлэх ёстой нөөцийн хэмжээг оруулж батлуулсан. Газрын тосны бүтээгдэхүүний тухай хуулиар аж ахуйн нэгжүүдийг 30 хоногийн нөөцтэй байх шаардлагыг тавьдаг. Тиймээс энэ хуулийн хүрээнд аж ахуйн нэгжүүд 30 хоногийн нөөц буюу ноднин жилийн хэрэглээн дээр суурилсан нөөцийг бүрдүүлэх учиртай. Ингээд газрын тосны манай улсад үйл ажиллагаа явуулдаг 64 аж ахуйн нэгж нийт 180 мянган тоннын нөөцтэй байлгахаар Засгийн газрын тогтоол батлагдсан. Энэ тогтоолд АИ92 бензин 60 мянга, түлш 110 мянга, онгоцны түлш 5.5 мянга, шатдаг хий 3.5 мянган тонныг нөөцлөх ёстой гэж тусгасан. Тиймээс компаниуд 2025 онд ийм хэмжээний нөөцийг бүрдүүлэх ёстой юм.

-Одоо байгаа нөөц маань өвөлжилт, газар тариалангийн ажлын үед ямар нэгэн асуудал гарахгүйгээр хангалттай байна гэж ойлгож болох уу?

-Бид энэ оны есдүгээр сард газрын тосны бүтээгдэхүүнийг тогтвортой нийлүүлэх талаар ОХУ-тай Засгийн газар хоорондын хэлэлцээрийг хийсэн. Энэ хэлэлцээрийн дагуу ОХУ Монгол Улсад газрын тосны нийлүүлэлтийг ямар нэгэн байдлаар тасалдуулахгүй байх үүрэг хүлээсэн. Манай талаас өөрсдийнхөө захиалгыг өгнө. Өвөлжилтийн бэлтгэл ажил болон газар тариалангийн ажилд дизель түлш ихээр шаардагддаг. Одоогийн байдлаар улсын хэмжээн дэх нөөц хангалттай байна. Ойролцоогоор 90 орчим мянган тонн түлш байгаа.

-Түрүүн хэлсэн 180 мянган тонн гэдэг нь сарын нөөц юм байна. Тэгэхээр манай улсын жилийн хэрэглээ хэр байдаг вэ?

-Энэ 180 мянган тонн гэдэг чинь 30 хоног буюу нэг сарын нөөц гэсэн үг. Энэ дотроо АИ92, авто болон онгоцны түлш, АИ95 гээд бүх бүтээгдэхүүн орно. Төрөл тус бүр дээрээ 30 хоногийн нөөц гэсэн үг. Харин хэрэглээнээсээ хамаараад өөр өөр байна. Манай улсын энэ төрлийн бүтээгдэхүүний хэрэглээ жил ирэх тусам 5-10 хувиар нэмэгдэж байна. Ноднин жил манай улс нийтдээ 2.1 сая тонн газрын тосны бүтээгдэхүүн хэрэглэсэн. Харин энэ жил энэ тоо 2.3 сая тонныг давах нь гэсэн прогнозтой байгаа. Тэгэхээр жил бүр нэмэгдэж байгаа хэрэглээн дээрээ тулгуурлаад дараа жилийн нөөцийнхөө тогтоолыг батлуулж гаргадаг юм.

-Газрын тосны нөөцийн савыг нэмэгдүүлэх тал дээр салбар яамнаас ямар ажлууд хийхээр төлөвлөж байгаа вэ?

-Хамтарсан Засгийн газрын үйл ажиллагааны хөтөлбөрт энэ талаар тусгагдсан байгаа. Ингэхдээ 3-6 сарын нөөцийн агуулахыг барьж байгуулах зорилтот ажлыг тусгасан. Тус улсын өмчит хадгалах савыг аль болох хилийн бүс болон Өмнөговь аймаг, Улаанбаатар хот гэсэн байршлуудад байгуулах юм. Энэ ажлыг ирэх дөрвөн жилийн хугацаанд хийж гүйцэтгэх төлөвлөгөөтэй.

Т.ДАРХАНХӨВСГӨЛ

Categories
мэдээ нийгэм нүүр-хуудасны-онцлох онцлох-нийтлэл туслах-ангилал

Х.Мөнх-Эрдэнэ: Өдөр бүр 2-3 хүн зам тээврийн осолд өртөж байна DNN.mn

Сүүлийн үед зам тээврийн ослын тоо нэмэгдэж, явган зорчигчийн амь нас, эрүүл мэнд хохирсон тохиолдол өсч байна. Үүнтэй холбогдуулан Тээврийн цагдаагийн албаны Урьдчилан сэргийлэх хэлтсийн ахлах мэргэжилтэн, Цагдаагийн ахмад Х.Мөнх-Эрдэнэтэй ярилцлаа.

-Энэ онд зам тээврийн осолд явган зорчигч холбогдсон хэдэн тохиолдол бүртгэгдээд байна вэ?

-2024 он гарсаар улсын хэмжээнд нийт 21485 зам тээврийн осол бүртгэгдсэн байна. Эдгээр тохиолдлын 1528-д нь явган зорчигч холбогдсон. Харамсалтай нь, эхний есөн сарын байдлаар явган зорчигч замын хөдөлгөөнд оролцож байгаад мөргүүлж, амь насаа алдсан 83 тохиолдол бүртгэгджээ. Эдгээрийн 42 нь нийслэлд, 41 нь хөдөө орон нутагт бүртгэгдсэн. Замын хөдөлгөөнд оролцож байгаад гэмтэж бэртсэн хүний тоо 1445 байгаагийн 80 орчим хувь нь нийслэлд бүртгэгдсэн байна.

-Хоёр хоногийн өмнө Яармагийн зам дээр ноцтой осол гарч, гарцаар гарч явсан хоёр хүнийг мөргөж, нэг нь амь насаа алдсан харамсалтай хэрэг гарсан. Энэ тал дээр албаны хүний хувьд ямар байр суурьтай байна вэ?

-Явган зорчигч, жолооч аль аль нь замын хөдөлгөөний дүрмээ баримталж хөдөлгөөнд оролцох хэрэгтэй. Тэгэхгүй бол хэн нэгэн хүний амь нас, эрүүл мэнд хохирох эрсдэл үүсдэг. Монгол Улсын замын хөдөлгөөний дүрэм дээр жолооч болон явган зорчигчид хүлээлгэх үүрэг гэж байдаг. Энэ үүргээ биелүүлээгүйн улмаас осол гарч хүний амь эрсдээд байна.

-Явган зорчигчид ямар үүрэг хариуцлага хүлээлгэдэг вэ?

-Монгол Улсын замын хөдөлгөөний дүрмийн тавдугаар бүлэгт явган зорчигчийн эрх, үүргийг тодорхой заачихсан байгаа. Явганаар замын хөдөлгөөнд оролцож байгаа иргэн бүр зам хөндлөн гарах гэж байгаа тохиолдолд заавал явган хүний тэмдэг, тэмдэглэгээтэй хэсгээр гарах ёстой. Энэхүү дүрмийн заалтыг иргэд биелүүлэхгүй тохиолдол их гардаг.

Замын хөдөлгөөний ачаалал ихсээд, хурд нь саараад ирэх үед түгжирч байгаа машинуудын дундуур гарцгүй хэсгээр зам хөндлөн гарч байна. Аль эсвэл хажууд нь нүхэн гарц, гүүрэн гарам байгаа тохиолдолд түүгээр гарахаас залхуурдаг. Ингэснээр тухайн хэсгээр явж байгаа тээврийн хэрэгсэлд мөргүүлэх, шүргүүлэх зэрэг тохиолдол гардаг. Явган зорчигч гарцгүй хэсгээр зам хөндлөн гарахгүй байх, онц шаардлагагүй бол замын зорчих хэсэг дээр гарах ёсгүй байдаг. Зөвхөн Нийслэлийн тохижилт үйлчилгээний газрын ажилтнууд, зам ангийн ажилчид, замын цагдаа хөдөлгөөн зохицуулж байгаагаас бусад тохиолдолд иргэд зорчих хэсэг дээр байх ёсгүй. Үүнийг үл хайхран замын зорчих хэсэг дээр такси барих гэж зогсож байгаад мөргүүлэх тохиолдол гардаг.

-Бага насны хүүхэд замын хөдөлгөөний дүрэмд хэрхэн аюулгүй оролцох ёстой вэ?

– Монгол Улсын замын хөдөлгөөний дүрэмд заасны дагуу 10 хүртэлх насны хүүхдийг эцэг эх, харгалзах хүнгүйгээр замын хөдөлгөөнд оролцуулахыг хориглодог.

ЕБСболон цэцэрлэгүүдэд “Гараас-гарт” хөтөлбөр хэрэгждэг. Тийм учраас эцэг эхчүүд заавал сургууль дээр нь хүргэж өгөөд, аваад явах ёстой. Мөн сургуулиудын гадна “School police” ажиллаж байгаа учраас 10 хүртэлх насны хүүхдүүд зам тээврийн осолд өртөх нь харьцангуй бага. Гэтэл түүнээс дээш насны хүүхдүүд замын хөдөлгөөнд бие даагаад оролцдог учраас зам тээврийн осолд өртөх нь ихэсдэг. Хүүхдүүд гэрээс сургууль хүртэлх замдаа бэртэж гэмтэж байгаа тохиолдлууд их гарч байна. Иймд эцэг эхчүүд хүүхдүүддээ аль гарцаар зам хөндлөн гарах вэ гэдгийг сайн зааж өгөх хэрэгтэй.

-Замын хөдөлгөөнд оролцож буй жолооч нарт замын хөдөлгөөний дүрмийн ямар үүрэг хариуцлагыг хүлээлгэдэг вэ. Жолооч нар ихэвчлэн ямар дүрмийг зөрчиж байна вэ?

-Монгол Улсын замын хөдөлгөөний дүрэм дээр “Явган хүний гарц нэвтрэх” гээд тусдаа бүлэг, заалт байдаг. Жолооч нарын хамгийн энгийн мэддэг зүйл нь улаан гэрэл хараад зогсдог. Үүнтэй адил явган хүний гарц гэсэн тэмдэг байгаа тохиолдолд жолооч заавал хурдаа хасах ёстой. Тэр нь гэрлэн дохиотой, дохиогүй зам байсан ч хамаагүй. Энэ тал дээр жолооч нар ихэвчлэн хурдаа сааруулахгүй зорчдог. Хэрвээ явган зорчигч зам хөндлөн гарах гээд гарцны хажууд зогсож байвал тухайн зорчигчийг жолооч түрүүлж замаар нэвтрүүлэх ёстой.

Гэтэл замын хөдөлгөөний ачаалал ихтэй байгаагаас болоод жолооч нар явган хүний гарцыг анзаарахгүй явчихдаг. Мөн хөдөлгөөнд оролцох үедээ маш болгоомжгүй үйлдэл гаргадаг, гар утас болон ижил төрлийн зүйл оролдож байгаад зам хөндлөн гарч байгаа явган зорчигчийг гарцан дээр харахгүй очоод мөргөдөг тохиолдлууд гардаг. Замын хөдөлгөөний дүрмийн жолоочнарт хамаарах хамгийн чухал заалт нь “зэрэгцээ эгнээнд явж байгаа жолооч явган зорчигчдод зам тавьж өгөх гээд хурдаа хасвал мөн хурдаа хасах ёстой” гэж заасан байдаг. Үүнийг мөрдөөгүйн улмаас явган зорчигчийг мөргөх, гэмтээх тохиолдлууд их гардаг. Уулзвар гарцаар нэвтрэх үедээ шар гэрэл асангуут амжина гээд орчихдог. Гэтэл шар гэрэл унтраад улаан болоход нөгөө талаас явган зорчигч зам руу орж ирдэг. Тэр үед мөргөж гэмтээх тохиолдол байдаг. Жолоочийн сахилга бат гэдэг зүйл маш чухал байна. Замын тэмдэг тэмдэглэл, гэрлэн дохиогоо маш сайн баримтлах ёстой.

-Осол ихэвчлэн хаана бүртгэгдэж байна вэ. Хэдэн насны хүмүүс өртөж байна вэ?

-Өдөр бүр 2-3 хүн ямар нэгэн байдлаар зам тээврийн осолд өртөж байна. Тээврийн цагдаагийн албанаас хоёр жилийн өмнө судалгаа хийсэн. Нийслэлд гарсан тохиолдлын ихэнх нь Улаанбаатар хотыг тойрсон гэр хорооллын дунд тавигдсан засмал замууд дээр гарсан осол байдаг. Харанхуй шөнө, оройн цагаар үзэгдэх орчин хязгаарлагдаад ирэх үед осол их гардаг. Осолд 18-40 орчим насныхан их өртөж байна. Мөргөлдсөн хүмүүсийн гэрэл зургийг тулгаад үзэхээр ойролцоогоор 80-90 хувь нь хар бараан өнгийн хувцас өмссөн байдаг. Хар бараан хувцас өмссөн хүмүүс жолооч нарт тээврийн хэрэгслийн ойрын гэрэлд шөнийн цагаар 17 метр дотор л харагддаг. Энэ нь туршилтаар тогтоогдсон зүйл. Гэр хорооллын дундах зам дээр хөдөлгөөний ачаалал сийрэг учраас 60 хүртэлх км цагийн хурдтай явж байгаа машинууд нэг секундэд 16 метр газар туулдаг. Тийм учраас хурдтай явж байгаа машин 17 метр дотор явган зорчигчийг хараад хурдаа хасахад зорчигч дээр тулаад очдог. Улмаар явган зорчигчийг мөргөөд, амь нас нь хохирдог. Замын хөдөлгөөний дүрэм дээр зөвлөмжөөр орсон заалт байдгийн нэг нь “Шөнийн цагаар өөрийнхөө харагдах нөхцөл байдлыг сайжруулах зорилгоор гэрэл ойлгох бүхий шинж чанартай хувцас өмсөж хөдөлгөөнд оролцоно уу” гэсэн заалт замын хөдөлгөөний дүрмийн 5.2 дахь хэсэг дээр байдаг.

-Явган зорчигчийн зам хөндлөн гарах гарцтай ойролцоох зам дээр хурд сааруулагч байдаггүй нь зам тээврийн осол гарах нэг шалтгаан болж байгаа байх?

-Тухайн замын хөдөлгөөний эрчим, ачаалалд тохируулаад судалж байгаад хурд сааруулагчийг байршуулж хийдэг. Явган зорчигч мөргүүлж байгаа цэгийн судалгааг нь гаргаад тухайн нутаг дэвсгэрээс Нийслэлийн замын хөгжлийн газар луу явуулаад хурд сааруулагч тавих эсэхийг шийддэг. Сүүлд Яармагийн зам дээр гарсан осолтой холбоотойгоор тухайн газарт явган зорчигчийн аюулгүй байдлыг хангах чиглэлээр хурд сааруулагч тавих шаардлагатай гэж үзвэл манайхаас судалгааг нь хийгээд явуулна. Хурд сааруулагчийг ихэвчлэн сургууль орчмын бүс дээр хүүхдүүдийн аюулгүй байдлыг хангах зорилгоор тавьдаг.

-Гэрлэн дохио, зохицуулагч байхгүй үед явган зорчигч хэрхэн аюулгүй байдлаа хангаж зам хөндлөн гарах ёстой вэ?

-Явган зорчигч машиныг бүрэн зогссоны дараа зам хөндлөн гарах ёстой. Гарцан дээр зогсож байтал машин хурдаа хасаж байгааг хараад шууд явж болохгүй. Нөгөө машин чинь зуны дугуйтай явж байвал гулсаж ирээд зорчигчийг мөргөх аюул үүснэ. Аль болох машин бүрэн зогссоны дараа явган хүний зам руу орох хэрэгтэй. Нүдэнд харагдах газар болон ойр хавьд нэг ч гарц байхгүй, зам хөндлөн гарах зайлшгүй шаардлага байвал хоёр талаас ямар ч тээврийн хэрэгсэл чиглэж ирээгүй үед замыг эгц хөндлөн гарна гэсэн дүрэм байдаг. Энэ заалтыг нарийн зам дээр л мөрдөх хэрэгтэй. Өргөн зам дээр явган хүний гарцыг 400 метрийн зайтай хийсэн учраас гарцаараа гарах хэрэгтэй.

-Өвлийн улирал ирж буйтай холбогдуулан жолооч нар замын хөдөлгөөнд хэрхэн аюулгүй оролцох талаар зөвлөгөө өгнө үү?

-Өвлийн улирал болж байгаа учраас жолооч нар машиныхаа дугуйг солих шаардлагатай. Дөрвөн улирлын дугуй гэж байхгүй. Тэр дугуй нь -10 градусаас дээш хүйтэрдэггүй уур амьсгалтай орнуудад зориулагдсан байдаг. Мөн шил рүү үлээдэг паар, тос тосолгоо, шил арчигчийн хэвийн ажиллагаа, машины гэрлийн тусгалыг сайжруулах зэргээр автомашины бүрэн бүтэн байдлыг хангасаны дараа замын хөдөлгөөнд оролцох шаардлагатай.

Г.Балгармаа

 

Categories
мэдээ нийгэм цаг-үе

Таван шалгуур үзүүлэлтээр нийслэлд тээврийн хэрэгслийн сери дугаар олгоно DNN.mn

Улаанбаатар хотын түгжрэлийг бууруулах зорилгоор НИТХ-аас энэ оны хоёрдугаар сарын 8-нд нийслэл хотод олгох тээврийн хэрэгслийн улсын бүртгэлийн дугаарын дээд хязгаарыг 730 мянга байх тогтоолыг баталсан. Үүнтэй холбоотойгоор арваннэгдүгээр сарын 8-наас импортоор орж ирэх автомашинд хотын дугаар шинээр олгохгүй байх тогтоолыг хэрэгжүүлж эхлэхээр болсон юм. Гэсэн хэдий ч уг баталсан дээд хязгаарт багтаан таван шалгуур үзүүлэлтээр нийслэл хотод тээврийн хэрэгслийн улсын бүртгэлийн дугаарыг олгохоор болсон юм. Энэ талаар “Замын хөдөлгөөний удирдлагын төв” ОНӨТҮГ-ын Хөдөлгөөн зохицуулалт, хяналтын хэлтсийн дарга Н.Намуугаас тодрууллаа.

Тэрбээр “Улаанбаатар хотод 785 мянган тээврийн хэрэгсэл бүртгэлтэй байдаг бөгөөд өнөөдрийн байдлаар 400-450 мянган автомашин замын хөдөлгөөнд идэвхтэй оролцож байна. Өөрөөр хэлбэл, оргил цагийн үед Улаанбаатар хотын тээврийн хэрэгслийн дундаж хурд 7-13 км/цаг байгаа юм. Харин нийслэл 250 мянгаас доош тооны тээврийн хэрэгсэлтэй байж 25 км/цагаас дээш хурдтай явах боломжтой болж буй. Энэ хүрээнд Улаанбаатар хотод бүртгэлтэй 785 мянган тээврийн хэрэгслээс хасалт хийн 730 мянга болсон тохиолдолд таван шалгуур үзүүлэлтийг баримтлан улсын бүртгэлийн дугаарыг олгоно” гэв.

Тодруулбал, нийслэл хотод тээврийн хэрэгслийн улсын бүртгэлийн дугаар олгоход дараах таван шалгуур үзүүлэлтийг баримтлан, бүртгэнэ.

  1. Тээврийн хэрэгслийн өмчлөгч, эзэмшигч нь нийслэлийн оршин суугч иргэн, нийслэлд бүртгэлтэй хуулийн этгээд байх;
  2. Өмчлөгч, эзэмшигч нь Авто замын тухай хуульд заасан төлбөр, Зөрчлийн тухай хуулийн 14 дүгээр бүлгийн 14.7 дугаар зүйл дэх зөрчил болон төлбөрөө барагдуулсан байх. Жолоочийн даатгалын тухай хуульд заасны дагуу даатгуулсан байх;
  3. Тээврийн хэрэгслийн хөдөлгүүрийн экологийн ангилал нь “евро-4” эсвэл түүнтэй дүйцэхүйц буюу түүнээс дээш байх;
  4. Сүүлийн 10 жилийн дотор үйлдвэрлэгдсэн тээврийн хэрэгсэл байх;
  5. Экспортын өмнөх техникийн хяналтын үзлэгт орсон байх зэрэг шалгуурыг тавьж буй.

Тээврийн хэрэгслийн улсын бүртгэлийн дугаар олгох дэс дарааллыг дараах шалгуур үзүүлэлтээр цахимаар тогтооно. Тодруулбал,

  • Дээрх шалгуур үзүүлэлтийг хангасан тохиолдолд дэс дарааллын эхэнд байх;
  • Хүсэлт гаргасан цаг хугацааны дарааллаар;
  • Цахилгаан, устөрөгчийн болон эдгээрийн хосолсон тээврийн хэрэгслийг бензин болон дизель хөдөлгүүртэй тээврийн хэрэгслийн өмнө нь байх;
  • Тээврийн хэрэгслийн үйлдвэрлэгдсэн огноогоор нь буюу үйлдвэрлэгдээд удаагүй тээврийн хэрэгсэл өмнө нь байх;
  • Монгол Улсын Замын хөдөлгөөний аюулгүй байдлын тухай хуульд нийцээгүй буюу баруун гар талдаа жолооны хүрдтэй тээврийн хэрэгслийн өмнө зүүн гар талдаа жолооны хүрдтэй байх зэрэг шалгуур үзүүлэлтийг харгалзан үзнэ.

Түүнчлэн нийтийн тээврийн үйлчилгээг дэмжих зорилгоор нийслэл хотын гол гудамж замын хөдөлгөөн, түгжрэлд бага нөлөө үзүүлдэг тээврийн хэрэгсэлд дээрх шалгуур үзүүлэлт хамаарахгүйгээр улсын бүртгэлийн дугаарыг хэвийн олгоно. Тодруулбал,

  • Мотоцикл
  • Механизм
  • Зүтгүүр
  • Чиргүүл
  • Цистерн
  • Тусгай зориулалтын автомашин
  • Автобус зэрэг тээврийн хэрэгсэлд улсын бүртгэлийн дугаарыг хэвийн олгоно.

Ташрамд, автотээврийн хэрэгслийн улсын дугаар олгох журмын дагуу гурван жил болон түүнээс дээш хугацаанд техникийн хяналтын үзлэгт хамрагдаагүй 57 мянга гаруй тээврийн хэрэгслийг бүртгэлээс хассан ба эдгээрийн дугаарыг шалгуур үзүүлэлт хангасан автотээврийн хэрэгсэлд шилжүүлэн өгөх боломжтой. Мөн Автотээврийн үндэсний төвөөс ирүүлсэн мэдээгээр нийслэл хотод техникийн хяналтын үзлэг, оношилгоонд орох хугацаа хэтэрсэн Улаанбаатар хотын бүртгэлийн дугаартай 81,961 тээврийн хэрэгсэл байгаа аж.

Categories
гадаад мэдээ

БРИКС баяртай! DNN.mn

БРИКС-ийн ээлжит дээд чуулган ОХУ-ын Казань хотод болов. Орос бол Бразил, Энэтхэг, Хятадын хамт БРИКС-ийг үүсгэн байгуулагч орнуудын нэг. Өмнөд Африк 2010 онд нэгдэн орсны дараа уг байгууллагаоролцогч улсуудын эхний үсгээр одоогийн нэрээ бий болгосон билээ. Хожим нь Иран, Египет, Арабын Нэгдсэн Эмират, Этиоп улсууд мөн тус холбоонд нэгдсэн. Мөн Турк, Азербайжан улсууд БРИКС-т элсэх хүсэлтээ ирүүлээд байгаа билээ.

ВВС-ийн Оросыг хариуцсан албаны тоймч Григор Атанесян “ОХУ-ын ерөнхийлөгч Владимир Путины хувьд Казань дахь дээд хэмжээний уулзалт нь түүнийг дэлхийн бусад улсаас тусгаарлагдсан, гадуурхагдсан хүн биш гэдгийг харуулах боломж юм. Гэхдээ дэлхийн өмнөд бүсийн 30 гаруй орны дипломатууд болон албаны хүмүүс Путинтэй санал нийлэхгүй байгаа нь ойлгомжтой. Хятад улс ялангуяа аюулгүй байдлын асуудлаар Оросын талыг баримтлахыг үнэхээр хүсэхгүй байна. Тухайлбал, АНУ-аас удаа дараа хүсэлт тавьсны дараа Хятад улс ОХУ-д давхар хэрэглээний бараа бүтээгдэхүүний экспортыг хязгаарлаад байгаа билээ” гэжээ. Харин ВВС-ийн Энэтхэгийн албаны сурвалжлагч Хинди Рагвендра Рао “Энэ жилийн БРИКС-ийн дээд хэмжээний уулзалт нь тус холбооны хоёр гол гүрэн болох Хятад, Оростой харилцах харилцааны хүрээнд Энэтхэгийн хувьд онцгой ач холбогдолтой юм” гэжээ.BBC-ийн Туркийн албаны сурвалжлагч, гадаад бодлогын ахлах мэргэжилтэн Эмре Темел “Анкарагийн Европын Холбоонд элсэх оролдлого гацаанд орж байгаа тул Туркийн хувьд энэ удаагийн дээд хэмжээний уулзалт маш чухал юм” гэжээ. Тэгвэл BBC-ийн Персийн албаны тоймч Си Кайван Хоссейни “БРИКС-тэй холбоотой бүх зүйл нь Ираны чихэнд хөгжим юм. Учир нь барууны улсууд давамгайлсан дэлхийн өнөөгийн дэг журмыг эсэргүүцэх зорилготой цөмийн хоёр гүрний тэргүүлдэг БРИКС эвсэл нь Ираны дээд удирдагчийн үзэл баримтлалд бүрэн нийцэж байдаг билээ” гэжээ. ВВС-ийн Бразилийг хариуцсан сурвалжлагч Жулия Браун “Дэлхийн өмнөд хэсгийн нэг удирдагч байх нь Бразилийн хувьд тун таатай зүйл байсаар ирсэн. Да Силва болон түүний засгийн газар энэ зорилгоо хадгалахын тулд БРИКС болон түүний гишүүн орнуудын байгуулсан Шинэ Хөгжлийн банкинд ихээхэн найдвар тавьж байгаа бололтой” гэжээ. BBC Африкийг хариуцдаг редактор Бруно Гарсез “Өмнөд Африкийг БРИКС-ийн холбоонд элсэх үед тус улсын эдийн засгийн хэмжээ бусад дөрвөн гишүүн орныхоос хамаагүй бага байсан. Харин БРИКС-т орсноос хойш Өмнөд Африк Хятадаас банк санхүү, уул уурхай зэрэг салбарт асар их хэмжээний хөрөнгө оруулалт хүлээн авсан” гэжээ.

Казань хотноо болсон БРИКС-ийн дээд хэмжээний уулзалтад оролцогчид энэхүү арга хэмжээг зохион байгуулсан ОХУ-д талархал илэрхийлж, барууны улсууд дэлхийн янз бүрийн орны эсрэг “хууль бус хориг арга хэмжээ” авч байгааг буруушаан, хамтарсан тунхаг гаргажээ

Уг тунхаглалд чуулганд оролцогчдын мөргөлдөөнийг энхийн замаар шийдвэрлэхэд чиглэсэн яриа хэлцэл, дипломат арга замаар эвлэрүүлэн зуучлах, сайн үйлсийн талаарх холбогдох саналыг сэтгэл хангалуунаар тэмдэглэж байна” гэжээ.Харин БРИКС-ийн дээд хэмжээний энэхүү уулзалтыг энгийн үгээр тайлбарлавал ийм юм.

ОХУ-ын ерөнхийлөгч энэхүү уулзалтын эхэнд гоё гоё үг хэлж оролцогчдоос өөрийн улсад хөрөнгө оруулалт хийхийг уриалсан.Шуудхан хэлэхэд “Бид баларч байна” хэмээн мөнгө гуйсан. Тэгвэл БРИКС оршиж буй 15 жилийн хугацаанд гишүүн улсууд ОХУ-д 3,8 тэрбум ам.долларын хөрөнгө оруулалт хийсэн нь эдгээр улсын бусад улсад хийсэн нийт хөрөнгө оруулалтын нэг хүрэхгүй хувь юм. Гол найдвар болох Хятадаас Орост оруулсан хөрөнгө оруулалт 2014 онд 4,5 тэрбум ам. доллар байсан бол 2024 онд 3,2 тэрбум болж 1/3 хувиар багассан байна. Харин Энэтхэг ОХУ-д ердөө 613 сая ам.долларын хөрөнгө оруулалт хийсэн нь Германд энэ улсаас хийсэн хөрөнгө оруулалтаас 33 дахин, Их Британийхаас 61 дахин бага хөрөнгө юм. Харин Бразил, Өмнөд Африкийн хөрөнгө оруулалт хэтэрхий бага байсан учир Оросын төв банкны тайланд ч орсонгүй. Энэ бол Орос Украинд дайн эхлүүлэхээс өмнөх баримт. Харин дайн эхэлснээс хойш Орос улс ичсэндээ зүгээр л гадны хөрөнгө оруулалтын баримтыг нууцалж орхисон билээ. БРИКС-ийн өмнөх уулзалтуудаар хэдэн ч удаа “Бид өөрийн гэсэн валюттай болж байна” гэж зарлаж байв. Харин одоо валютаа орхиж төлбөрийн шинэ хэрэгсэл болох Шинэ Хөгжлийн банктай болж үүнийгээ цахим мөнгөөр хөдөлгөх гэнэ. Хятад болон бусад улсууд аль хэдийн өөрсдийн цахим мөнгийг хэрэглэж байгаа. Путинд зориулан шинэ цахим мөнгө гаргаж хайран цаг, хөрөнгө дэмий үрэх ямар шаардлага байх билээ. Хамгийн гол нь БРИКС бол “Их 7”-ийн эсрэг байгуулсан уулзалт бөгөөд үүнийгээ тэд хөгжингүй улсуудын эсрэг хөгжиж буй улсуудын эвсэл болгох гэж энэ хугацаанд яаж ч чардайгаад барсангүй. Учир нь аливаа эвсэл нь үнэт зүйл дээр тулгуурлаж байгуулагддаг. Энэхүү үнэт зүйлээ хамгаалан, өргөжүүлэх гэж институт гэдэг тодорхой асуудал хариуцдаг бүтэц бий болгож үйл ажиллагаагаа хэрэгжүүлдэг. Харин БРИКС-т нэгдсэн үнэт зүйл гэж огт байхгүй. Үнэт зүйлгүй болохоор институтгүй. Институтгүй болохоор ярихаас цааш гардаггүй. Тэгээд ч өнөөдөр дэлхийн баялгийн 24 хувийг АНУ улс, Европын холбоо 22.5, Япон 7.9, Их Британи 4.1 хувийгүйлдвэрлэж байна. Харин Хятад 18, Энэтхэг 3.3, Орос 1.7 хувийг гаргаж байна. Эндээс “Их 7” болон БРИКС-ийн хүчин чадлыг шууд харчихаж болно. Иймээс БРИКС бол Хятад ЗХУ шиг өөрийн тойрон хүрээлэгчидтэй болох гэж, Монгол хоёр хөршийн тэргүүнтэйгээ гурвуул уулзах гэж, Турк “Европын Холбоонд элсүүлэхгүй бол бид энд элслээ шүү” гэж барууны улсуудыг айлгах гэж оролцдог янз бүрийн зорилготой улсуудын эрээвэр, хураавар цугларалт юм.

Энд дурдахгүй өнгөрч болохгүй нэг зүйл нь Украйны Швейцарьт зохион байгуулсан дэлхийн энх тайвны дээд хэмжээний уулзалтад оролцохоос татгалзсан,НҮБ-ын ерөнхий нарийн бичгийн дарга Антонио Гутерриш БРИКС-ийн дээд хэмжээний уулзалтад оролцогчдын нэг болсон явдал байв. Энэ хүн бол дэлхийн баялаг бүтээгчдийг “дарангуйлагч”, хөгжил дэвшлийн шууд саад, татвар хэмээх “террорист” үйл ажиллагаагаар олон улсаас маш их хэмжээгээр цугласан мөнгийг элдэв гоё нэртэй өндөр өртөгтэй төслүүдээр яаж үр ашиггүй үрж болохыг гишүүн улсууддаа үлгэр жишээ болгон харуулдаг НҮБ хэмээх хоцрогдсон байгууллагын сүүлчийн тэргүүн юм. Удахгүй ардчилсан улсуудад “хорт хавдар” болоод байгаа баялаг бүтээгчдээ татвараар дарамтлан улсаа шууд хохироож, боловсролгүй улс төрчид ялаа шиг бэлэн мөнгөн дээр цугладаг энэ бурангуй явдал устана. Учир нь дэлхийн I дайны дараа Австри-Унгарын болон Османы эзэнт гүрэн, дэлхийн II дайны дараа Английн болон барууны улсуудын “Колонийн эзэнт гүрэн” бутарсан. Харин өнөөдөр дэлхийн III дайны дараа Орос, Хятад, Ираны “эзэнт гүрэн” бутарч, үндэстэн бүр тусдаа нэгдэн улс болж, бүх тусгаар улс тэгш эрхтэй болох сайн цаг ирж буй нь тодорхой болчихоод байна. Иймээс БРИКС баяртай! Учир нь үнэт зүйл дээр нэгдээгүй аливаа эвсэл, холбоо “Эвсэлд нэгдээгүй улсуудын эвсэл” шиг “цор, цор” гэж байгаад нэг л мэдэхэд сураггүй болчихсон байдаг билээ.

 

Г.АМАРСАНАА

Categories
мэдээ нийгэм

“Шинэ хоршоо” хөдөлгөөний хүрээнд 6500 гаруй хоршоо байгуулагдаж, 16 мянга гаруй малчинд зээл олгоод байна DNN.mn

“Шинэ хоршоо” хөдөлгөөний хүрээнд 6500 гаруй хоршоо байгуулагдаж, 16 мянга гаруй малчинд зээл олгоод байна.

Монгол Улсын Засгийн газрын 2024 оны 95 дугаар тогтоолоор “Шинэ хоршоо” хөдөлгөөний салбар дундын уялдааг хангах үндэсний хороо байгуулагдаж, өчигдөр анхдугаар хуралдаанаа хийлээ. Хурлаар “Шинэ хоршоо” хөдөлгөөний тайлан, хөдөлгөөнийг эрчимжүүлэх хүрээнд хэрэгжүүлэх үйл ажиллагааны үндсэн чиглэл, Үндэсний хорооны 2024 оны төлөвлөгөөний төсөл, Хоршооны гишүүн малчдын зээлийн явц, зээлийн эргэн төлөлтийн мэдээлэл, “Шинэ хоршоо” хөдөлгөөний салбар дундын уялдааг хангах үндэсний хорооны тогтоолын төсөл зэргийг хэлэлцэн баталлаа.

Энэхүү хөдөлгөөн өрнөж эхэлснээс хойших зургаан сарын хугацаанд 6599 шинэ хоршоо байгуулагдаж, 68,500 малчин хоршоонд гишүүнээр элсэж, нийт 556 тэрбум төгрөгийн хөрөнгө оруулалтын зээлийг 16,399 малчинд олгосон байна. Хурлаар зээлийн зарцуулалт, үр дүнг хянаж, Зээлийн мэдээллийн санг байгуулах зэрэг арга хэмжээнүүдийг хэрэгжүүлэхээр төлөвлөлөө.

“Шинэ хоршоо” хөдөлгөөний дараагийн үе шат нь хоршоологчид, үйлдвэрлэгчидтэй хамтран ажиллаж, үйлдвэрлэлийн гинжин хэлхээний чухал бүрэлдэхүүн хэсэг болох, улмаар дэлхийн зах зээл рүү гарах экспортын чиг баримжаатай бараа бүтээгдэхүүн үйлдвэрлэх явдал юм.

Мөн уур амьсгалын өөрчлөлтөөс үүдэлтэй байгалийн гамшиг, аливаа эрсдэлийг хамтын хүчээр буюу хөдөлмөр, хөрөнгөөр хорших замаар даван туулж, урьдчилан сэргийлж, үндэстнээрээ сөрөн тэсвэрлэх чадвартай байх, уламжлалт мал аж ахуй, соёлын давтагдашгүй үнэт байдал, онцлогоо хадгалж үлдэх гэсэн том агуулга, чухал зорилгыг багтааж байгаа билээ гэж Монгол Улсын Шадар сайдын Хэвлэлийн албанаас мэдээллээ. 

Categories
мэдээ нийгэм

Нийслэлийн өдрийн барилдааны цахим бүртгэл эхэллээ DNN.mn

Аравдугаар сарын 27-ны ням гарагт 13:00 цагаас болох Нийслэл Улаанбаатар хотын 385 жилийн ойд зориулсан улс, аймаг, цэрэг, сумын цолтой 128 бөхийн уламжлалт барилдааны цахим бүртгэл эхэллээ.

Бүртгэл 2024 оны аравдугаар сарын 25, 26-нд үргэлжилнэ гэж Монголын Үндэсний Бөхийн Холбооноос мэдээллээ. 

Categories
мэдээ нийгэм цаг-үе

Нойтон цас, цас орох тул зам, даваа, гүвээнд халтиргаа гулгаа үүсэхийг анхааруулж байна DNN.mn

Малчид, иргэд, тээвэрчдийн анхааралд: Өнөөдөр Төв, Сэлэнгэ, Хэнтийн нутгаар нойтон цас, цас орох тул зам, даваа, гүвээнд халтиргаа гулгаа үүсэхийг анхааруулж байна.

2024 оны аравдугаар сарын 25-ны 08 цагаас 20 цаг хүртэл: Ихэнх нутгаар солигдмол үүлтэй. Төвийн аймгуудын нутгийн өмнөд болон зүүн, зүүн аймгуудын нутгийн баруун хойд хэсгээр нойтон цас, цас орно. Бусад нутгаар цас орохгүй. Нутгийн зүүн өмнөд хэсгээр баруун өмнөөс, бусад нутгаар баруун өмнөөс баруун хойш эргэж секундэд 6-11 метр. Ихэнх нутгаар бага зэрэг хүйтэрч Хангай, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Идэр, Тэс, Эг, Үүр, Орхон, Туул, Тэрэлж, Хэрлэн, Онон, Улз голын хөндийгөөр 1 хэм хүйтнээс 4 хэм дулаан, Их нууруудын хотгор, говийн бүс нутгийн өмнөд хэсгээр 10-15 хэм, бусад нутгаар 3-8 хэм дулаан байна.

Categories
мэдээ нийгэм цаг-үе

Сансарын колонкийн уулзвараас Дамбадаржаагийн уулзвар хүртэлх авто замыг хааж, засварлана DNN.mn

Сансарын колонкийн уулзвараас Дамбадаржаагийн уулзвар хүртэлх авто замыг хааж засварлахаар болжээ. Тодруулбал, авто замыг өнөөдөр 23.00 цагаас энэ сарын 28-ны 17.00 цагийн хооронд хааж засварлана.

Дараах зураглалын дагуу зам хаана.