Category: мэдээ

Энэ сарын 21-нд Төв аймгийн Эрдэнэ сумын нутаг, Баяндавааны замд Сүхбаатараас Улаанбаатарын чиглэлд явсан хот хоорондын зорчигч тээврийн автобус осолдон зургаан хүн нас барж, 40 гаруй хүн гэмтэж бэртсэн харамсалтай хэрэг гарсан.

Өдгөө гэмтэж бэртсэн зорчигчдыг ГССҮТ-д эмчилж байгаа бөгөөд биеийн байдал нь эхнээсээ сайжирч эмнэлэгээс гарч эхэлсэн билээ.

Ослын шалгааныг хууль хяналтын байгууллагынхан шалгаж байгаа гэж байсан. Тэгвэл “Дайчин сүх” ХХК-ний “Hyundai Bus” маркийн 0522 СҮА дугаарын автобусны үндсэн жолоочийг саатуулан шалгаж байгаа гэх мэдээлэл байна. Бид энэ хэргийн талаар эргэн мэдээлнэ.

Нийслэлийн Мэргэжлийн хяналтын газраас Хан-Уул дүүргийн 11 дүгээр хорооны нутаг дэвсгэр Зайсангийн аманд газар ашиглан барилга угсралтын ажил гүйцэтгэж байгаа иргэн, аж ахуйн нэгж, байгууллагуудын газар ашиглах гэрээ, зориулалт, батлагдсан ерөнхий төлөвлөгөө болон зураг төсөл, барилга угсралтын ажлын явц, барилга угсралтын ажлыг эхлүүлэх, үргэлжлүүлэх зөвшөөрөл, баримт бичгийн бүрдүүлэлт зэргийг шалгажээ.

Удирдамжийн хүрээнд 31 иргэн, ах, ахуйн нэгж байгууллагын үйл ажиллагааг газар дээр нь шалгажээ. Үүнээс 17 нь ирж холбогдох бичиг баримтыг шалгуулсан бол 3 нь газрын зориулалтын дагуу /аялал жуулчлал/ ашиглаж байгаа, Хан-Уул дүүргийн Засаг даргын захирамжаар гэр бүлийн хэрэгцээнд ахуйн зориулалтаар 3 иргэнд олгосон газар дээр барилга баригдаж байгаа, үлдсэн 25 иргэн, аж ахуйн нэгж байгууллага зориулалт өөрчлөн барилга угсралтын ажил гүйцэтгэж байсан аж.

Мөн Хан-Уул дүүргийн Засаг даргын захирамжаар гэр бүлийн хэрэгцээнд ахуйн зориулалтаар 3 иргэнд газар эзэмшүүлэх шийдвэр гаргасан, олгосон газар дээр барилга байгууламж баригдаж байгаа, 2 иргэн Туул голын онцгой хамгаалалтын бүсэд барилга, байгууламж барьж байгаа, 11 иргэн, аж ахуйн нэгж байгууллага нь байгаль орчинд нөлөөлөх байдлын үнэлгээг аялал жуулчлалын зориулалтаар хийлгэсэн боловч барилга байгууламж барьсан, 2014 онд байгаль орчны менежментийн төлөвлөгөөгүй, орчны хяналт шинжилгээний хөтөлбөр, байгаль орчныг хамгаалах тухайн жилийн төлөвлөгөөг батлуулан хэрэгжүүлээгүй, 2013 оны байгаль хамгаалах төлөвлөгөө, орчны хяналт шинжилгээний хөтөлбөрийн биелэлтийг гаргаж холбогдох газарт тайлагнаагүй, гүний худгуудад тоолуур байршуулж баталгаажуулаагүй, ус ашиглах зөвшөөрөлгүй, дүгнэлт, гэрээгүй, орчны цэвэрлэгээ хангалтгүй, хатуу хог, хаягдлыг ил задгай хаясан, ахуйн бохир цуглуулах зориулалтын цооноггүй, бие засах газрыг ил задгай газарт нүх ухаж, бохирыг хөрсөнд шингээж байгаа зэрэг нийтлэг зөрчил илэрсэн байна.

Шалгалтын явцад илэрсэн зөрчлийг арилгуулах талаар улсын байцаагчийн хамтарсан албан шаардлагыг 15 иргэн, аж ахуйн нэгж байгууллагад хүргүүлжээ.

Мөн Богдхан уулын дархан цаазат газрын хамгаалалтын захиргаанд шалгалтаар илэрсэн зөрчлийг арилгуулахаар холбогдох хуулийн хэрэгжилтэд хяналт тавьж ажиллах талаар албан бичгийг хүргүүлсэн байна.

Энэхүү шалгалтын хүрээнд 7 аж ахуйн нэгж байгууллагад 1750,0 мянган төгрөгийн захиргааны арга хэмжээ тооцон барагдуулаад байгаа аж.

 “Гал үндэстэн” холбооны тэргүүн Ц.Мөнхбаяр нарын таван хүн холбогдсон хэргийн давж заалдах шатны шүүх энэ сарын 27-нд болох гэж байна. Энэ талаар “Гал үндэстэн” холбооны дэд  тэргүүн Я.Хундаганай болон тус холбооны гишүүд мэдээлэл хийж, дээд шатны шүүхэд ялахын төлөө тэмцэнэ гэдгээ мэдэгдлээ.

Я.Хундаганай “Ц.Мөнхбаяр ард иргэд, эх орон, газар шороо, гол усныхаа төлөө тэмцсэнийхээ хариуд торны цаана суух ёсгүй. Ямар үндэслэлээр хориод байгааг нь гайхаж байна. Магадгүй эрх баригчдын алдаатай бодлогыг олж харан эсэргүүцсэнийх нь төлөө биз. Тэр эх орон, газар шороогоо өмөөрч уул уурхайн компаниудын техник хэрэгсэл рүү буудаж, Чингисийн талбайд морьтой жагсаал хийж эх орныхоо төлөө тууштай тэмцэж байсан нь түүний хоригдох шалтгаан болж байгаад харамсаж байна” гэж онцлов.

Мөн “Иргэдийн шударга шүүх” ТББ-ын тэргүүн Х.Бат-Ялалт тэдэнтэй нэгдэж байгаагаа илэрхийллээ. Тэрээр “Гэмт хэрэг гэдэг бол хэн нэгнийг хохирооё гэсэн муу бодлыг хэлдэг. Харин Ц.Мөнхбаярт ямар муу бодол байсан юм бэ? Эх орон газар шороогоо бүрэн бүтэн авч үлдэе гэсэн нь эрх баригчдын хувьд муу бодол болж таарч байна уу” гэлээ. Тэд цаашдаа Ц.Мөнхбаяр болон бусад тэмцэгчдээ, эх орон газар шороогоо хамгаалж харийханд элэгтэй эрх баригчидтай тууштай тэмцэхээр шийджээ. Үүний тулд иргэний хөдөлгөөнүүдийг нэгтгэж “Хүслээ нэгтгэе” хэмээх үндэсний хөдөлгөөнийг үүсгэн байгуулж, энэ сарын 28-нд албан ёсоор хурал хийхээр товлосон байна.

“Нийтийн үйлчилгээний Улаанбаатар нэгтгэл” болон хувийн хэвшил, аж ахйун нэгж байгууллагууд хамтран  энэ жил нийтдээ 700 мянган м.кв талбайн зүлэг, 90 мянган мод, 800 мянган сөөгөнд арчилгаа тордолгоо хийж байгаа аж.

Нийслэлийн гудамж, цэцэрлэгүүдэд 450 мянган ширхэг мод, сөөг тарьжээ. Зүлэг тарих ажил энэ сарын нэгний өдрөөс эхэлсэн ба ирэх долоодугаар сарын 5-ныг хүртэл үргэлжлэх аж. Зүлэг шинээр болон нөхөн тарих ажил 200 мянган м.кв талбайд хийгдэх юм байна.

Харин цэцэгжүүлэлт энэ сарын 5-аас эхэлж, 500 мянган ширхэг цэцгийг 30 мянган м.кв талбайд суулгахаас 70 хувийг нь тариад байна. Ногоон байгууламжийн хөрсийг ариутгах ажил 152 м.кв талбайд хийгджээ. Мөн ургамлын өвчин, хортонтой тэмцэх ажлын хүрээнд 88150 ширхэг   мод бут сөөгийг энэ сарын 25-наас ирэх сарын 10-ны хооронд ариутгах юм байна.

Монгол Улсын Ерөнхийлөгч, Зэвсэгт хүчний ерөнхий командлагч Ц.Элбэгдоржид “Оюутан-цэрэг” хөтөлбөрийн анхдагчдаас талархлын захидал илгээсэн байна.

Төв аймгийн Алтанбулаг суман дахь Зэвсэгт хүчний 119 дүгээр ангид алба хааж буй Ш.Түвшинбаяр, Б.Есүхэй нарын зэрэг “Оюутан-цэрэг” хөтөлбөрийн анхны оюутан-байлдагчдаас ирүүлсэн захидалд “Бид бол азтай оюутан. Ингэж өөрсдийгөө тодотгосон нь Монгол Улсын Ерөнхийлөгчийн 92 дугаар зарлиг, Засгийн газрын 40 тоот тогтоол, Батлан хамгаалахын сайд, Боловсрол, шинжлэх ухааны сайд нарын хамтарсан тушаалын дагуу “Оюутан-цэрэг” хөтөлбөрийн анхны оюутан, цэрэг болсон явдал юм.

Оюутнууд биднийг суралцахын зэрэгцээ цэргийн жинхэнэ алба хаах боломж олгосон явдалд бид чин сэтгэлээсээ талархаж байна. Учир нь эх орноо батлан хамгаалах эрхэм үүргийг минь эдлүүлэхэд дорвитой дэмжлэг үзүүлж буй явдал юм. Ингэснээр маш их цаг хугацаа хэмнэж, асар их мэдээллийг залуус бидэнд олгосоор байна.

Цэрэг эрс бид оюутан байх хугацаандаа цэргийн жинхэнэ албаа нэр төртэй хааж, улмаар их, дээд сургуулиа амжилттай суралцан төгсөж, эх орныхоо өмнө хариуцлага хүлээсэн төрийн жинхэнэ албан хаагч болж чадахаа эх орон, багш, сурган хүмүүжүүлэгчид, аав ээж, найз нөхдийнхөө өмнө андгайлан тангараглая” гэжээ.