Category: нийгэм

Яармагийн гүүрнээс Нисэх-Нисэхийн товчоо, Сонсголонгийн уулзвараас Яармагийн товчоо хүртэлх 13.7 км авто замын өргөтгөл, шинэчлэлтийн ажлыг хийхээр болсон юм. Энэ хүрээнд зургадугаар сарын 21-ний өдрөөс эхлэн Яармагийн гүүрнээс Вива ситигийн зүүн урд тал хүртэлх 600 метр авто замын урд талын урсгалыг нэг сарын турш хаахаар болжээ.  Зам хаалттай үед хойд талын урсгалыг сөрөг хөдөлгөөнтэй болгож, тээврийн хэрэгслийг нэвтрүүлэх юм. Дээрх замыг хааж, далангийн дүүргэлт болон хатуу ухмалын ажил, гадаргуун ус зайлуулах төмөрбетон хоолойн ажил хийх юм байна. 

“Khaan Quest 2014″ хээрийн сургуулийн хэвлэлийн бага хурал өнөөдөр 11.00 цагт Зэвсэгт хүчний жанжин штабт болох гэж байна. “Khaan Quest-2013” Энхийг дэмжих ажиллагааны олон улсын хамтарсан сургуульд энэ жил урьдчилсан байдлаар 23 улс орны 1100 гаруй цэргийн алба хаагчдаа оролцуулахаа албан ёсоор мэдэгджээ.  Сургуулийг зургадугаар сарын 20-ноос долдугаар сарын 1-ний өдрүүдэд уламжлал ёсоор команд штабын сургууль, салаадын хээрийн сургууль, эмнэлэг хүмүүнлэгийн болон инженерийн хамтарсан ажиллагаа гэсэн дөрвөн үндсэн хэсгээр зохион байгуулахаар төлөвлөж аж. Энэ жилийн хувьд анх удаа БНХАУ-аас хээрийн сургуульд салаа, эмнэлгийн хамтарсан ажиллагаанд эмч нарын бүлэг оролцуулах юм байна. НАТО-гийн гишүүн орон болох Чех Улсаас хээрийн сургуульд салаа, сургагч багш нар оролцуулахаа албан ёсоор мэдэгджээ. 

Юуны түрүүнд картны гэмт хэрэг гэдэг нэр томъёог хүргэе. Хувь хүний төлбөрийн картны туузан мэдээлэл буюу track-г хууль бусаар хуулбарлан авч тусгайлан бэлдсэн картны бэлдэц дээр суулгаж төлбөр тооцоо болон бусад байдлаар ашиглах гэмт хэргийг Carding буюу хуурамч төлбөрийн картны гэмт хэрэг гэдэг байна. 

Гэвч сүүлийн жилүүдэд гадаадын банкны харилцагч нарын картны мэдээллийг хууль бусаар авч хуурамч карт үйдлэн хөгжиж буй улс орнуудад гэмт хэрэг үйлдэх явдал эрс ихэсч байна. 2012 оноос хойш Монгол улсын Цагдаагийн байгууллагаас Малайз, Сингапур, Украйн, Нигер улсын иргэд хуурамч картаар гэмт хэрэг үйлдсэн олон хэргүүдийг илрүүлэн шалгажээ.

Гэмт этгээдүүд гадны иргэний картаар гүйлгээ хийж байгаа хэдий ч тухайн мөнгөн дүнтэй тэнцэх гүйлгээг манай Монголын арилжааны банкуудаар дамжин гардаг учир эцсийн хохирол Монголын арилжааны банкууд, худалдаа үйлчилгээ эрхэлж буй иргэд, аж ахуй нэгжүүд амсан, гэмт хэргийн золиос болдог байна.

Энд нэгэн жишээ дурдъя. Өнгөрсөн дөрөвдүгээр сард Хятад улсын иргэдийн хүсэлтээр монгол улсын иргэд нь Монгол улсад бүртгэлтэй аж ахуй нэгжийг худалдан авчээ. Хуулийн этгээдийн нэр дээр данс нээж, пос терминал /карт уншигч/ машиныг эзэмших зорилгоор арилжааны банктай гэрээ байгуулан карт уншигч худалдан авсан байна.

Гэвч тухайн пос машиныг худалдан авсан хятад иргэн… Энд дарж цааш уншина

Иргэнийхээ үүргийг нэр төртэйгээр биелүүлсэн Б.Маргад хүүгийн талаар өнөөдөр танилаасаа сонслоо.  Тэрбээр энэ сарын 16-нд галаас гурван хүний амь насыг аварсан баатарлаг үйлс бүтээжээ. 

Болсон явдлыг сийрүүлбэл, Баянгол дүүргийн 15 дугаар хороо 24 дүгээр байрны 4 тоотод энэ сарын 16-нд гал гарсан байна. Гал үүднээсээ эхэлж гарсан бөгөөд яах ийхийн зуургүй битүү утаа болж улмаар дотор нь байсан хүмүүс амиа алдах дөхжээ.

Хэдийгээр гал гарсан айл нэгдүгээр давхарт байрладаг ч гэлээ цонхыг нь гаднаас нь төмөрлөсөн болохоор дотор нь байсан хүмүүс гарах ямар ч боломжгүй байсан аж.

Энэ үед 5 настай дүүгээ хөтлөөд дэлгүүр явж байсан Б.Маргад хүү эр зориг гарган гал гарч байгаа айлын цонхных нь төмрийг салган улмаар дотогш нэвтрэн орж гурван хүний амийг аварчээ. Тэдний нэг нь хэвтрийн хөгшин байсан аж.

Ингээд баатарлаг үйлс бүтээсэн Б.Маргадын ээж Ж.Оюунгэрэлээс болсон явдын талаар тодрууллаа.

-Юуны өмнө танд болон танай хүүд баяр хүргье. Үнэхээр баатарлаг үйл бүтээжээ?

-Баярлалаа. Хүүгээрээ үнэхээр их бахархаж байна.

-Тухайн үед яг юу болсон юм бэ?

-Манайх яг хажуугийнх нь байранд амьдардаг юм. Тэр үед хүү маань дүүгээ хөтлөөд урд талын дэлгүүр рүү явж байсан юм билээ. Гэтэл 24 дүгээр нэгдүгээр давхрын айлд гал гарч, дотор нь хүмүүс гарч чадахгүй байсан гэсэн. Энэ үед хүү маань дүүгээ “Яг наанаа зогсож байгаарай” гэж хэлчихээд гадаа байсан хүүхдүүдтэй нийлж тэр айлын цонхыг гаднаас нь эвдэлж орсон юм билээ. Эхлээд жижиг өрөөнийх нь цонхны гаднах төмрийг мултлаад цонхыг нь хагалаад дотогш ортол цааш явах аргагүй битүү утаа байсан гэсэн. Тэгэхээр нь том өрөөнийх нь цонхыг эвдэлж ороод дотор байсан хүмүүсийг аварсан юм билээ.

-Дотор хэдэн хүн байсан бэ?

-Гурван хүн байсан, нэг нь хэврийн хөгшин гэсэн. Эхлээд хоёр хүнийг нь цонхоор гаргаад буцаж орж нөгөө хэвтрийн хүнийг үүрч, дүүрч гаргасан гэж байсан.

-Тухайн үед галынхан ирээгүй байсан хэрэг үү?

-Хүү маань тэр гурван хүнийг аварчихаад л дүүгээ хөтлөөд дэлгүүр рүү яваад өгсөн гэсэн. Тэгэхэд галын машин зөрсөн тухай хэлж байсан. Тэгэхээр гал гарснаас хойш нилээд удаж байж ирсэн байх.

-Галаас аврагдсан хүмүүс танай хүүд талархал илэрхийлсэн үү?

-Өчигдөр би хүүгээ нөгөө хэвтрийн хөгшин дээрээ сүү авч очоод биеийг нь асуучих гэсэн юм. Хүүг маань очиход тэр хүн их баярлаж, миний хүүд талархсан сэтгэлээ илэрхийлж захидал бичиж өгсөн байна лээ

-Та хүүгийнхээ баатарлаг үйлсийн талаар хэзээ мэдсэн бэ?

-Тэр өдөр хүү маань гэнэт залгаад “Ээж ээ, би галаас хүний амь аварчихлаа” гэсэн. Би ч учрыг нь ололгүй бүр сандраад “Юун гал ус вэ, битгий дэмий юм яриад бай. Аюултай шүү дээ” гэтэл  “Сая аварчихлаа” гэсэн. Сүүлд хүү маань “Тэр гал гарч байсан айлын цонхыг нь хагалж ороход дотор юу хүлээж байгааг нь ч мэдээгүй шууд л яваад орсон” гэж байсан. Үнэхээр их зориг гаргасан байгаа юм. Аймаар ч юм шиг.

-Галаас хүний амь аврахад танай хүүтэй хамт ямар хүмүүс байсан бэ?

-Тэр хавьд тоглож байсан дандаа жоохон хүүхдүүд байсан гэсэн. Миний хүү чинь өөрөө жоохон шүү дээ, дөнгөж 19 настай. Хүү маань тэднийг жоохон гэхийг бодоход Ерөнхий боловсролын сургуулийн хүүхдүүд байсан байх аа.

-Хүү тань аль сургуульд сурдаг вэ?

-Миний хүү Ахлагчийн сургууль төгсөөд одоо Элитийн 150 Баталионы дэд ахлагч, буудагч цолтой.  

-Ярилцсанд баярлалаа

-Баярлалаа.

Замын цагдаагийн газраас ирүүлсэн судалгаанаас үзвэл өнгөрсөн жил улсын хэмжээнд мотоцикльтэй холбоотой 330 осол, зөрчил гарч 112 хүн амиа алдан, 191 хүн гэмтэж бэртжээ. Үүнтэй холбогдуулан Мэргэжлийн хяналтын байгууллага улсын хэмжээнд энэ чиглэлээр тандалт судалгаа хийн дүнгээ гаргалаа. Иргэд уул хадтай, замгүй, бартаа ихтэй газар хурд хэтрүүлдэгээс мотоциклийн обуд нь хагарч цууран осолддог байна. Энэ нь нийт ослын 51 хувийг эзэлж байгаа бол 35 хувь нь бусад тээврийн хэрэгсэлтэй мөргөлдсөний улмаас, үлдэх нь бусад осол гэсэн ангилалд багтжээ. Осолд өртөгсдийн 251 хүн буюу 76 хувь нь тухайн үедээ хамгаалалтын дуулга малгай өмсөөгүй, 93 хүн буюу 24 хувь нь согтууруулах ундаа хэрэглэсэн байсан нь тогтоогдлоо. Осолдсон мотоцикльтэй эздийн 72 хувь нь мотоциклоо улсын бүртгэлд бүртгүүлж, дугаар аваагүй зөрчил ч гарсан байна.    

Аймгуудад мотоциклийг хүн тээврийн зориулалтаар ашиглах нь элбэг. Тухайлбал Дорнод, Баян-Өлгий, Архангай, Говь-Алтай, Өвөрхангай аймгийн төвд 258 мотоцикль үйлчилгээнд явж байгаа. Өнгөрсөн онд хүн тээвэрлэж явсан мотоцикльтэй иргэд осол гаргасны улмаас 10 хүн амь насаа алдсан байна. Манай хуульд мотоцикль эзэмшигч, ашиглагч, тэдгээрт хяналт тавих харилцааг зохицуулсан тодорхой заалт, холбогдох эрх бүхий байгууллагаас хэрхэн ашиглах талаар зөвлөмж, зааварчилгаа байдаггүй учир Мэргэжлийн хяналтын байгууллага хяналт шалгалт хийх боломж хомс. Гэхдээ аймгуудын Мэргэжлийн хяналтынхан тухайн орон нутгийн Замын цагдаагийн байгууллагатай хамтран осол, зөрчлөөс сэргийлэх, мотоциклоор хүн тээвэрлэж байгааг зогсоох шаардлага тавьж, зөвлөмж зааварчилгаа өгөх зэргээр боломжтой бүх арга хэмжээг авч байна.

Цаашид импортоор оруулж ирж байгаа мотоциклийн стандарт, чанарт анхаарах, манай нөхцөлд тохирох эсэхийг тогтоох, мотоцикль оруулж ирж байгаа аж ахуйн нэгж, иргэдэд мэдээлэл өгөх, улсын хилээр нэвтрүүлэхэд хил, гаалийн хяналтын байгууллагаас хийх үзлэг, шалгалтын ажилд мөрдөх эрх зүйн акт гаргах зэрэг саналаа Зам, тээврийн яаманд хүргүүллээ. Мөн шат шатны Засаг дарга нар иргэдийнхээ мотоциклийг улсын бүртгэлд оруулж, улсын дугаар өгч хэвших, аюул, осолгүй эзэмшиж, ашиглах талаар сурталчилгаа, таниулга, зөвлөмж, санамж өгч байхыг санал болголоо. Өнгөрсөн онд улсын хилээр 37 мянга орчим мотоцикль орж ирсний 36713 нь БНХАУ-д, үлдсэн нь Энэтхэг, БНСУ, АНУ, Япон зэрэг 17 улсад үйлдвэрлэсэн байжээ.

www.medee.mn

-Барилгын компаниудад залилуулсан иргэд холбоонд нэгдэнэ-

Барилгын компаниудын барьж, ашиглалтад оруулж буй орон сууцны чанар болоод м/кв-ын зөрүүтэй холбоотой гомдол тасрахаа больсон. Энэ асуудлаар өнөөдөр барилгын компаниудаас болж хохирсон иргэдийн төлөөлөл “Үндэсний мэдээллийн төв”-д мэдээлэл хийсэн юм.

Барилгын компаниуд иргэдэд худалдаж буй орон сууцныхаа м/кв-аас дутааж, худалдаж байгаа талаарх гомдлыг иргэд өнгөрсөн жилээс  хойш их гаргах болсон юм.   Тиймээс Шударга өрсөлдөөн, хэрэглэгчийн төлөө газар 2013 оны арванхоёрдугаар сараас хойш 50 орчим барилгын компанид хяналт шалгалт хийсэн. Шалгалтаар 560 гаруй иргэний орон сууцны м/кв-аас 4-20 метр талбайг дутаасан буюу гурав орчим тэрбум төгрөгийн хохирол учруулсаныг тогтоож, Шударга өрсөлдөөн, хэрэглэгчийн төлөө газраас хариуцлага тооцохоор торгууль ногдуулж буй. Мөн үүн дээр барилгын чанарын асуудал нэмэгдэх юм.

Тэгвэл энэ бүх хугацаанд барилгын компаниудын чанаргүй барилга, иргэдийг м/кв-ын зөрүүгээр мэхэлдэг байдалтай тэмцэхээр холбоо байгуулах тухай өнөөдрийн хурлаар онцоллоо.  Орон сууц захиалагчдын хохирогчдын холбоонд одоогоор дээрх байдлаар хохирсон 11 иргэн нэгдэхээ илэрхийлээд байгаа талаар тус холбоог үүсгэн байгуулагч Ч.Пүрэвзана хэлсэн юм.

Эдгээр 11 иргэний хувьд янз бүрийн байдлаар хохирч үлдсэн гэх бөгөөд нарийн шалгаж үзэхэд иргэдэд гэрээнд зааснаас дутуу м/кв-тай байр зарсан,  ашиглалтад өгөөд удаагүй байр нь хана, таазнаасаа цууралт өгсөн зэрэг зөрчил илэрч, иргэдийг хохироосоор байгаа ажээ. Тиймээс урьд нь хохирсон иргэд ганцаараа хохирлоо барагдуулахаар хөөцөлдөж, үр дүнд хүрдэггүй байсныг өөрчлөх хэрэгтэй болсныг хурлаар онцолж, хохирогчдыг нэгтгэн хамтдаа тэмцэхээр болсон байна. Одоогоор уг холбоог байгуулах эрх зүйн баримт бичгийг бүрдүүлэн холбогдох шатны байгууллагуудад хандсан бөгөөд барилгын компаниудад залилуулсан иргэдийг холбоондоо элсэхийг уриалж буй. Холбоог байгуулж, хүмүүсийг эгнээндээ нэгтгэсний дараа чухам аль компани хэдий хэмжээгээр хэдэн иргэнийг хохироосныг нарийн тогтоож, Шударга өрсөлдөөн, хэрэглэгчийн төлөө газар болон тухайн барилгын компанид мэдэгдэх юм байна. Хэрвээ энэ нь үр дүнд хүрэхгүй бол цаашлаад хууль, хяналтын байгууллагуудад хандаж, шаардлагатай бол жагсаал хийнэ  гэдгээ өнөөдрийн хурлаар мэдэгдлээ.

Азийн шинжлэх ухааны паркуудын холбооны удирдлагын уулзалт энэ сарын  19-нөөс 21 хүртэл Мэдээллийн технологийн үндэсний паркт болох гэнэ. МТҮП  2012 онд Азийн шинжлэх ухааны паркуудын холбооны гишүүн байгууллага болжээ. МТҮП нь  холбооны бусад гишүүн байгууллагуудтай харилцан туршлага солилцох, хамтарсан төсөл хөтөлбөр хэрэгжүүлэх, Азийн шилдэг паркуудын  хөгжлийн загварыг нэвтрүүлэх,  ОУ-ын арга хэмжээнд оролцох боломж нээгдэнэ хэмээн тус паркийнхан найдаж байна.  Тус холбоо нь  жил бүр гишүүн байгууллагын удирдлагуудын уулзалтыг зохион байгуулдаг уламжлалтай бөгөөд энэ жилийн удирдлагуудын уулзалт анх удаа Улаанбаатарт зохион байгуулагдах гэж байна.   Уулзалтанд  Япон, Солонгос, Турк, Вьетнам зэрэг орнуудын 30 гаруй төлөөлөгч, Монголоос 10 гаруй аж ахуйн нэгж, компанийн удирдлага, төрийн болон төрийн бус байгууллага, их дээд сургуулиас 30 гаруй төлөөлөгч оролцох бөгөөд нийт 80 орчим төлөөлөгч хамрагдана.  Тус уулзалтанд нийт 5 илтгэл тавигдаж хэлэлцүүлэгдэх бөгөөд БНСУ, Тайвань, Япон зэрэг орнууд өөрсдийн паркын шилдэг туршлагын талаар тус бүр нэг илтгэл, Монгол талаас хоёр илтгэл тавигдана.  Арга хэмжээ удирдлагуудын болон бизнесийн уулзалт гэсэн хоёр хэсэгт хуваагдах аж.   Удирдлагуудын уулзалтаар: “Шинжлэх ухааны паркуудын шилдэг туршлага” сэдвийн дор илтгэл хэлэлцүүлэг явагдана. Уулзалтаар хамтрагч байгууллагын хамтын ажиллагааг бататган бэхжүүлж, АСПА-ийн гишүүн байгууллагуудтай хамтарсан төсөл хөтөлбөр хэрэгжүүлэх талаар харилцан зөвшилцөх төдийгүй Монгол улсад шинжлэх ухааны парк байгуулахад тулгарч буй бэрхшээл,  хэрхэн шийдвэрлэх  тал дээр зөвлөгөө өгч, туршлага солилцох юм.

“Өдрийн сонин”-ны Асуух эрхийн танхимд дөнгөж сая “Гоц авъяастай хүүхдийн” буюу 93 дугаар дунд сургуулийн 30 гаруй багш, ажилчид хэвлэлийн бага хурал хийлгэв. Тус сургуулийн багш ажилчдын мэдээлж буйгаар 2013 оны нэгдүгээр сарын 2-ны өдөр Т.Энхтүвшинг захирлын үүрэг гүйцэтгэгчээр томилжээ. Томилгоог Баянгол дүүргийн Засаг дарга Д.Оросоо хийсэн бөгөөд томилогдсон өдрөөсөө хойш Т.Энхтүвшин захирал зан харилцааны доголдлуудыг удаа дараа гаргах болсон гэнэ.

Тухайлбал, тус сургуулийн үйлдвэрчний хорооны гишүүн С.Алтанчулуун ийн өгүүллээ. Тэрээр “Т.Энхтүвшин багш захирлын сонгон шалгаруулалтад ороогүй, хууль, журмын наад захын шаардлага хангахгүй хүн. Гэнэт л дүүргийн Засаг даргын томилгоогоор үүрэг гүйцэтгэгчээр хүрээд ирсэн. Захирал болсноосоо хойш сургууль дотор цайны газар, спорт заал түрээслүүлэн ашиг хонжоо хайх болсон. Тэрчлэн сурагчдын хандивын мөнгийг өөрийн мэдлийн болгодог. Одоогийн байдлаар 20 гаруй сая төгрөгийг өөрийн болгосон. Энэ алдааг нь хэлэхээр багш ажилчдаа хална гэж сүрдүүлж, дарамталдаг болсон. Одоогийн байдлаар хоёр багшийг албан ёсоор, найман багшийг аман байдлаар халчихаад байна. Халагдсан хоёр багш маань шүүхээр заргалдаад захирлын буруу болсон. Тэгээд эргээд сургуульдаа иртэл саяхан дахиад л халчихлаа. Харин өөрөө дур мэдэн ямар ч шалгуургүйгээр гурван хүнийг шинээр ажилд аваад байгаа” хэмээн өгүүлсэн юм.   

 Харин тус сургуулийн Хөдөлмөрийн багш П.Хувьзаяа “Манай захирлын үүргийг гүйцэтгэгч Т.Энхтүвшин өөрийн хүүгээ өмөөрч гуравдугаар ангийн хоёр ч сурагчийг алгадаж, зодсон байна. Бичлэг нь сургуулийн хяналтын камерт үлдсэнийг бид баримт болгож аваад байгаа. Тиймээс бид ёс зүйн талаас нь Нийслэлийн болровсролын газар, Боловсрол, шинжлэх ухааны яам, Э.Бат-Үүл даргад хүртэл бичиг явуулаад  жил гаруйн хугацаанд ямар ч хариу ирсэнгүй” хэмээн мэдээллээ.

Тухайн багш нар хэвлэлийнхэнд хандах болсон нь ганцхан зорилготой гэнэ. Тэр нь нийт багш ажилчдаа ойлгодог, хувийн харилцааны соёлтой, хэн нэгнийг ялгаварлан гадуурхдаггүй байх аж. “Ийм хэм хэмжээний шалгуураар захирлын сонгон шалгаруулалтыг дахин явуулж өгөөч ээ” хэмээн хүсч байлаа. 

Багш П.Хувьзаяа

Багш С.Алтанчулуун