Category: нийгэм

Олон улсын “Алтаргана-2014” наадмыг угтаж “Буриадын Алтаргана наадам, түүний түүх, үр нөлөө” сэдэв олон улсын эрдэм шинжилгээний хурал Гадаад харилцааны яамны хурлын Зөвшилцөл танхимд болж байна. Энэхүү хуралд ОХУ, БНХАУ болон манай орны  нийт 100 орчим эрдэмтэн судлаач оролцон сонирхолтой илтгэлүүдийг хэлэлцүүлж байгаа юм.

Буриадын үндэсний өв уламжлал, соёл урлаг, спортын төрөл зүйлийг хадгалж хамгаалах, өвлүүлэн уламжлуулах, шинэчлэн хөгжүүлэх зорилго бүхий “Алтаргана” наадам энэ сарын 18-21-нд болно. 1994 оноос хойш хоёр жилд нэг удаа зохиогдож ирсэн “Алтаргана” наадам 20 дахь жилдээ болно. Нэгдүгээр шат тухайн улс орон, муж тойрог, аймгуудад тавдугаар сарын 30-ны дотор болох бөгөөд хоёрдугаар шатны төвлөрсөн арга хэмжээ нь Хэнтий аймгийн Дадал суманд болох юм.

Монгол Улсын нутаг дэвсгэрээс хууль бусаар гаргасан үлэг гүрвэлийн 18 олдворыг АНУ-ын Засгийн газраас манай Засгийн газарт хүлээлгэн өгөх ёслол энэ сарын 10-ны өдөр АНУ-ын Хууль зүйн яамны Нью Йорк хот дахь салбарын байранд болсон байна. Олдворыг хүлээн авахтай холбогдсон АНУ-ын Цагаачлалын болон Гаалийн хууль сахиулах албаны мэдэлд ирсэн өмч хөрөнгийг хүлээлгэн өгөх тухай Монгол Улс, АНУ-ын Засгийн газар хоорондын Гэрээнд 2014 оны 6 дугаар сард Монгол Улсаас АНУ-д суугаа Элчин сайд Б.Алтангэрэл гарын үсэг зуржээ.  

Ёслолын арга хэмжээнд Монгол Улсаас НҮБ-ын дэргэд суугаа Байнгын төлөөлөгч, Элчин сайд О.Оч, Нью Йорк хотын Өмнөд дүүргийн Прокурор Прийт Бхарара болон албаны бусад хүн оролцсон байна. Элчин сайд О.Оч хэлсэн үгэндээ, Монголоос гаралтай нэн эртний олдворуудыг олж буцаахад тусалж буй Америкийн хууль сахиулах албаныханд Монгол Улсын Засгийн газрын өмнөөс чин сэтгэлийн талархал илэрхийлж, манай хоёр орны энэхүү  хамтын ажиллагаа нь зохион байгуулалттай гэмт хэргийн эсрэг тэмцэх олон улсын хамтын ажиллагаанд чухал туршлага болж байгааг онцлон тэмдэглэжээ.

Прокурор П.Бхарара “Бид үлэг гүрвэлийн олдворуудыг эх оронд нь буцаах түүхэн үйл явдалд оролцож байгаадаа баяртай байна” гэсэн бол Тусгай төлөөлөгч Ж.Хейз “Өнөөдрийн бидний буцаан өгч байгаа олдворууд хэн нэгний хувийн цуглуулгад байгаагүй зүйл. Эдгээр нь монголын ард түмний өмч бөгөөд өнгөрсөн жилийн бидний буцаасан Батаарын хамт үндэсний байгалийн түүхийн музейн үзмэрт тавигдах юм” гэжээ.

Олдворуудын дотор бүтэн шахуу Батаарын араг яс, Овирапторын чулуужсан өндөг, 5 үлэг гүрвэлийн хамтдаа чулуужсан яс зэрэг зүйл байгаа аж. Эдгээр нь 68-80 сая жилийн настай бөгөөд Монголын говиос олдсон гэдгийг судлаачид тогтоожээ. Судлаач Марк Норелл ийм төрлийн олдворууд нь нэн ховор бөгөөд шинжлэх ухааны чухал судлагдахуун болохыг тэмдэглэжээ.

АНУ-ын Засгийн газар 2007 оноос хойш л гэхэд уран зураг, гар бичмэл, олдвор зэрэг 7000 гаруй соёлын үнэт зүйлс, эртний эдлэлийг Австри, Герман, Камбож, Ирак Итали, Монгол, Перу Польш, Хятад, Франц зэрэг 30 шахам оронд буцаагаад байгаа аж. Ёслолын үеэр Элчин сайд О.Оч АНУ-ын Цагаачлал, гаалийн хууль сахиулах албаны зарим төлөөлөгчид ССАЖЯ-ны хүндэт өргөмжлөлийг гардуулжээ.

Ёслолын ажиллагаанд мөн Монгол Улсаас АНУ-д суугаа ЭСЯ-ны Элчин зөвлөх Д.Гансүх, Консул З.Эрдэнэбаяр, ССАЖЯ-ны Палеонтологи, археологийн музейг шинэчлэх төслийн зөвлөх Др. М.Болорцэцэг, АНУ-ын Цагаачлал, Гаалийн хууль сахиулах албаны дотоод аюулгүй байдлын тусгай төлөөлөгч Жеймс Хэйз, мөн Албаны Олон улсын ажиллагааны газрын тусгай төлөөлөгч Люси Эскамилла, Эртний эдлэл, урлаг, соёлын өвийн асуудал хариуцсан төлөөлөгч Дебора Хардос, АНУ-ын Байгалийн түүхийн музейн палеонтологийн тасгийн дарга Марк Норелл, хэвлэл, мэдээллийн байгууллагын төлөөлөгчид оролцсон байна.

Нийслэлийн 375 жилийн ойг тохиолдуулан Улаанбаатар хотын Захирагчийн ажлын алба, Монголын хог хаягдлыг боловсруулах холбоо хамтран хотын тохижилтыг сайжруулахаар ажиллаж байна. Энэ ажлын хүрээнд Чингисийн талбайд хаягдал шилээр хийсэн,  харанхуйд гэрэлтдэг 20 сандлыг байршууллаа. Эдгээр сандлын эргэн тойронд цэцэг тарьсан бөгөөд иргэд амран суух тухтай орчныг бүрдүүлсэн юм. Цаашид шилний хог хаягдлаар өвөрмөц загвар бүхий тохижилтын ажлуудыг үргэлжлүүлэн хийхээр төлөвлөж байна. Шилэн сандлуудын дээр бүтээлийн нэр, хийц загварын талаарх мэдээллийг байршуулах юм.

АНУ-ын Бэй Аэриагийн Монголчуудын Холбоо долдугаар сарын 12-ны өдөр Тулгар төр байгуулагдсаны 2223 жил, Их Монгол Улс байгуулагдсаны 808 жил, Үндэсний Эрх чөлөөний хөдөлгөөний 103 жил, Ардын хувьсгалын 93 жилийн ойн баяр наадмаа тэмдэглэжээ. 

Алс холын Америк орны баруун эргийн үзэсгэлэнт Сан Франциско хотын Алтан хаалганы цэцэрлэгт хүрээлэнд 17 дахь жилдээ баяр наадмаа ийнхүү тэмдэглэсэн бөгөөд баяр наадмын арга хэмжээг Бэй Аэриагийн монголчуудын холбоо манлайлж, Ерөнхий консулын газар, Хүүхдийн гэр төв болоод бусад байгууллага, хувь хүмүүс хамтран зохион байгуулжээ.

Энэ жилийн манай наадмын түрүүг Цэргийн начин, Дашчойлон хийдийн унзад лам Гомбодорж авсан бол сумын заан, Олон улсын жүдо бөхийн спортын мастер Мөнхбаясгалан үзүүрлэжээ. Мөн шагайн харваанд олон залуус оролцож, хүүхдүүд дааганы уралдаан зохиосон байна. Сонирхуулахад, хүүхдүүдийн унаж уралдсан даагыг Бэй Аэриагийн Монголчуудын Холбооны наадмын морины комиссын гишүүн н.Бат-Очир урласан гэнэ.

Эх сурвалж: Ширчингийн Баатар, БАМХ

Монгол Улсын Ерөнхийлөгч Ц.Элбэгдорж үндэсний их баяр наадмын үеэр Монгол Улсад зочилж байгаа ОХУ-ын ИТАР-ТАСС агентлагийн сэтгүүлчдэд ярилцлага өгөв. Төрийн тэргүүн ярилцлага өгөх үеэрээ “Орон даяараа монгол түмэн хуран цуглаж, баяр наадмаа тэмдэглэж байна. Наадам бол монголчуудын сайхан баяр юм. Энэхүү наадмын талбай дээрээс би Монголын ард түмний нэрийн өмнөөс, баяр, хөөрөөр бялхаж байгаа хүн бүрийн өмнөөс Оросын ард түмэнд, ОХУ-ын Ерөнхийлөгч В. Путинд халуун сэтгэлийн мэндчилгээ дэвшүүлж байна. Айл гэр бүр аз жаргалтай байг. Гудамж талбай болгонд баяр хөөр цалгиж байг” гэлээ.

Эх сурвалж: www.president.mn

Өнгөрсөн ням гарагт орсон хүчтэй борооны улмаас нийслэлийн Онцгой байдлын газарт усанд автсан тухай 23 удаагийн дуудлага ирж нийслэлийн Онцгой байдлын газрын аврах анги, харьяа дүүргүүдийн Онцгой байдлын хэлтсийн аврагч, гал сөнөөгчид усыг соруулан шуурхай ажиллан аюулгүй байдлыг хангажээ. Усанд автсан дуудлагыг Чингэлтэй дүүрэг 2, Сүхбаатар дүүрэг 5, Баянгол дүүрэг  3, Сонгинохайрхан дүүрэг 3, Баянзүрх дүүрэг  9 удаа ирүүлсэн байна. Тухайлбал Баянгол дүүргийн 8 дугаар хороо, 4 дүгээр хороолол 11 дүгээр байрны 9 давхарын айлын дээврээс ус ороод байна гэсэн дуудлагыг шөнийн 02:08 цагт өгснөөр дүүргийн ОБХ-ийн Аврах гал унтраах 18 дугаар ангийн 6 албан хаагч хүрэлцэн очиход дээврийг шалгахад ус зайлуулах хоолой бөглөрсөн байсныг хэвийн болгосон байна.

Мөн Баянгол дүүргийн 8 дугаар хороо, 4 дүгээр хороолол 32Г байрны айл амьдардаг суурийн давхар усанд автаад байна гэсэн дуудлагыг шөнийн 02:35 цагт өгснөөр дүүргийн ОБХ-ийн Аврах гал унтраах 18 дугаар ангийн 6 албан хаагч очиж усыг мотопомпоор соруулж, далан хийж усны урсгалыг хаах арга хэмжээ авч ажиллажээ. Түүнчлэн Сонгинохайрхан дүүргийн 26 дугаар хороо, Баянбулагийн 4 дүгээр гудамжинд айлын гэр усанд автаад байна гэсэн дуудлагыг 03:10 цагт өгснөөр дүүргийн ОБХ-ийн Аврах гал унтраах 26 дугаар ангийн 8 албан хаагч, 2 автомашинтайгаар усыг мотопомпоор соруулж, шуудуу татаж усыг зайлуулсан бол тус дүүргийн 7 дугаар хороо, Далангийн 1 дүгээр гудамжинд байшин усанд автаад байна гэсэн дуудлагыг 03:10 цагт өгснөөр дүүргийн ОБХ-ийн Аврах гал унтраах 29 дүгээр ангийн 8 албан хаагч, 1 автомашинтай цагт гарч усыг мотопомпоор соруулж, шуудуу татаж усыг зайлуулах арга хэмжээ авчээ.

Ус цаг уур орчны хүрээлэнгээс ихэнх нутгаар түр зуурын дуу цахилгаантай бороо орно гэсэн урьдчилсан мэдээ ирүүлж байгаа учраас  иргэд, олон  нийтийг цаг агаарын тухай мэдээллийг тухай бүр хүлээн авч, гэр орон сууцны үер усны аюулгүй байдлаа сайтар хангаж, бага насны хүүхэд, өндөр настан, хөгжлийн бэрхшээлтэй иргэдийг хараа хяналттай байлгахыг анхааруулж байна.

Голын усны төвшин 60-80 см хүрч үерийн аюултай байдалд  хүрсэн тул голын эрэгт зорчихгүй байх, орон нутагт баталгаат зам гүүрээр зорчиж, гарамгүй газраар автомашинтай гол гатлахгүй байхыг нийслэлийн Онцгой байдлын газраас онцгойлон анхааруулж байна.

Худалдаа үйлчилгээ, банк санхүүгийн байгууллагууд баяр наадмын өдрүүдэд амарч, өнөөдрөөс ажиллаж эхэллээ. Тодруулбал “Нарантуул-2”  худалдааны төв, “Скай”  их дэлгүүр, “Хар хорин” худалдааны төв, “Барс” худалдааны төв, “Хүчит шонхор” худалдааны төв, “Да хүрээ ” техникийн зах өнөөдрөөс ажиллах юм. Харин Нарантуул худалдааны төв энэ сарын  23-наас эхлэн  ердийн цагийн  хуваарийн дагуу ажиллана. Мөн “Дүнжингарав”  худалдааны төв 18-наас эхлэн  ердийн цагийн  хуваарийн дагуу ажиллах юм байна.

Долдугаар сарын 15-аас эхлэн шинэ тарифаар усны төлбөр авах болжээ. Шударга өрсөлдөөн хэрэглэгчийн төлөө газар болон Ус сувгийн удирдах газар  хамтран орон сууцны айлуудын болон аж ахуй нэгжүүдийн хэрэглэж байгаа усны үнийг нэмэх шийдвэр гаргасан нь энэ.

Нийслэлийн орон сууцны нэг өрх өнөөдрөөс нэг сард 2500 төгрөг төлөхөөр Багануур, Налайх, Төв аймагт нэг өрх сардаа 1800 төгрөг харин үйлдвэр, аж ахуйн нэгжийн цэвэр усны үнэ 91 мөнгөөс 1.2 төгрөг, бохир усны тариф 60 мөнгөөс 1.5 төгрөг байхаар тогтсон байна.