Category: сурталчилгаа

2014 оны дэлхийн аварга шалгаруулах тэмцээний G хэсэгт өрсөлдөж буй АНУ  Португал 2:2-ийн харьцаатай тэнцлээ. Тоглолтыг португалчууд тун сайн эхлүүлж, тав дахь минутад Луиш Нани гоол оруулсан юм. Тоглолтын 64 дэх минутад АНУ-ын шигшээ багийн хагас хамгаалагч торгуулийн 16 метрийн гаднаас хүчтэй цохиж гоол орууллаа. 81 дэх минутад АНУ-ын довтлогч Клинт Демпси Грахам Зусигийн дамжуулалтаар гоол оруулж, тооны харьцааг 2:1-ийн харьцаатай болгожээ. Тоглолтын 90+5 дахь минутад Криштиан Роналдугийн баруун жигүүрээс өгсөн дамжуулалтыг Силвестре Варела мөргөж гоол оруулснаар Португалчууд оноог тэнцүүлсэн байна.  Дараагийн тойрогт АНУ Германтай, Португал Ганатай тоглоно.

2002 оноос хойш анх удаа ДАШТ-д оролцож буй Белгийн баг ОХУ-ын шигшээг 1:0-ийн харьцаатайгаар  ялжээ. ОХУ-ын баг нэг  оноотой хэвээр үлдсэн ч дараагийн шатанд шалгарах боломж байсаар байгаа юм. ОХУ-ын багийн довтлогч А.Кокорины гав ганцаараа үсрэн мөргөсөн бөмбөг болон Тоби Алдервейрелдын торгуулийн талбайд гаргасан алдааг эс тооцвол Бельгийн баг энэ тоглолтын турш илүү аюултай довтолгоо хийсэн баг байлаа.

Австрийн нийслэл Вена хотноо Ираны цөмийн хөтөлбөрийн талаар зургаан улсын гэрээ хэлцэл явагдаж байлаа. Иран болон “том зургаа” (ОХУ, АНУ, Герман, Франц, Хятад, Их Британи) –гийн хооронд явагдаж байсан энэ гэрээ хэсэг хугацаанд завсарласан. Завсарласан гол шалтгаан нь Ираны төлөөлөгчид хэсэг хугацаанд алга болсонтой холбоотой. Алга болсон төлөөлөгчид тусгай өрөөнд Нигер-Ираны шигшээ багуудын тоглолтыг үзэж байлаа.

Коста-Рика улсын ерөнхийлөгч Луис Гильермо Солис Бразилд очиж чадаагүй. Гэхдээ тэр жинхэнэ латин америк хүний ёсоор улсынхаа шигшээ багийг гэртээ сууж дэмжсэн гэнэ. Хөлбөмбөгийн хэмжээсээр их л жижигхэнд орох тус улсын баг Уругвайтай тоглохын өмнө Гильермо Солис “Манай баг 2:1-ээр өрсөлдөгчөө ялна” хэмээн “төлөг буулгаж” буй байдал.

Харин тэдний баг Уругвайн шигшээг 3:1-ээр хожсоны дараа Ерөнхийлөгчийн аз жаргалд хязгаар гэж үгүй байлаа. “Чин сэтгэлээсээ хүсэхэд бүтэхгүй зүйл гэж үгүй, эх орон нэгтнүүд ээ. Бууж өгч болохгүй. Эцсээ хүртэл тэмц. Хүсэл биелдэг гэдгийг үзүүлсэн та нартаа чин сэтгэлээсээ баярлалаа” хэмээн фэйсбүүктээ эрхэм Ерөнхийлөгч бичжээ.

Нидерландын хаан Уиллиам-Александр, хатан хаан Максима хоёр хөлбөмбөгт хачин дуртай гэдгийг бүгд мэднэ. Тэд улсынхаа шигшээ багийн тэмцээнийг алгасахгүй үзэх дуртай. Харин энэ удаа тэдний хайртай баг Австралийн шигшээ багийг 3:2-оор хожиж хэсгээсээ шалгарах нь ойлгомжтой болоход эрхэмсэг хаан, хатан хоёр тэвчсэнгүй, хувцас солих өрөөнд орж нүцгэн шахуу хөлбөмбөгчидтэй зургаа татуулж баяраа хуваалцлаа.

Дуулианы эзэн Жулиан Ассанжийг санаж байна уу. “Wikileaks” сайтыг үндэслэгч тэрбээр одоо Лондон дахь Эквадор улсын элчин сайдын яамнаа орогнож байгаа. Тэгэхээр тэр ямар улсыг дэмжих нь ойлгомжтой, тийм үү.

“Ноён Обама, ноён Путин, ноён Ким Чен Ун нараа, дайн хэрэггүй, хайр дурлал, сэтгэлийн баясал гэдгийг мэдэрч амьдраач. Мишель Башелийн (Чилийн эмэгтэй ерөнхийлөгч) өгзгийг атгаач”. Чилийн шигшээ багийн хөгжөөн дэмжигч өөрийнх нь баг хэсгээсээ шалгарсны дараа сэтгэл хөдлөлөө илэрхийлж барьсан хуудас.

Дэлхийн шилдэг хөлбөмбөгч Криштиано Роналдог дэлхийн аваргад оролцохын тулд эрүүл мэндээ золиосолж байна гэж мэс заслын эмч Жозе Карлуш Норонья хэвлэлээр өгсөн ярилцлагадаа онцлон тэмдэглэжээ. Нороньягийн өгүүлснээр бол Роналдо зүүн өвдөгний гэмтлээ сэдрээж, насан туршдаа хөлбөмбөгч тоглож чадахааргүй болох гээгүй л бол энэ дэлхийн аваргаар дахиж нэг ч тоглолтод гарах хэрэггүй гэнэ.

Хэсгийн эхний  тоглолтод Португалын шигшээ Германд 4:0-ээр бут ниргүүлэхэд Роналдо бэлтгэл бүрэн ханаагүй мэт харагдсан нь өвдөгний гэмтэлтэй нь холбоотой гэж Норонья сануулжээ.

“Тэр дахиад хөлбөмбөгийн талбайд гарахгүй ч болж магадгүй тул ирээдүйгээ бодоод энэ дэлхийн аваргад дахиад тоглох хэрэггүй” гэж Норонья мэдэгдсэн байна. Гэлээ ч Роналдо АНУ, Ганын эсрэг тоглолтод оролцохоор бэлтгэлээ базаасаар байгаа юм. Дэлхийн аваргын өмнө Роналдо өвдөгний гэмтлийн улмаас хоёр нөхөрсөг тоглолтод оролцоогүй бөгөөд өвдгөө одоо ч боож яваа гэнэ.

Эквадорын багийн дасгалжуулагч Р.Руэда өөрийн өмнө нь удирдаж байсан
Гондурасын шигшээг 2:1-ийн харьцаатайгаар хожсноор дараагийн шатанд
шалгарах найдвараа хадгалж үлдлээ.

Харин Гондурасын баг 2 дараалж хожигдон, хэсгийн шатнаас хасагдах нь тодорхой боллоо.

БАГИЙН БҮРЭЛДЭХҮҮН

Гондурасын багийн дасгалжуулагч Луйс Фернандо Суарес Францын багт ялагдсан тоглолтонд орсон гараандаа 2 өөрчлөлт хийсэн байна.

Өмнөх тоглолтонд улаан хуудас авсан Уилсон Паласиосын оронд Хорхе
Кларос гараанд гарсан бол Энди Нахарын оронд Оскар Гарсиа гарааны
бүрэлдэхүүнд дуудагджээ.

Харин Швейцарийн багт хожигдсон бүрэлдэхүүндээ ердөө ганцхан
өөрчлөлтийг дасгалжуулагч Р.Руэда хийсэн байна. О.Минда талбайн төвд
Карлос Арболедагийн оронд гараанд гарчээ.

ГООЛУУД

Тоглолтын эхний гоол 31 дэх минутанд орсон. Эквадорын баг тоглолтын
эхнээс аюултай довтолгоо цөөнгүй хийж байсан ч К.Костли тооны харьцааг
нээж, Гондурас тоглолтыг тэргүүлж эхэлсэн юм.

Брайн Бекелесийн алсын дамжуулалтыг Хорхе Гуагуа хамгаалж чадалгүй алдснаар Костлид боломж гарч, улмаар тэрээр гоол оруулжээ.

Гэсэн ч ердөө 3 минутын дараагаар Эннер Валенси тооны харьцааг 1:1 болгосон.

Хуан Паредесийн дамжуулалтыг 3 хамгаалагч өнгөрөөсний дараагаар Валенси хамгийн эхэнд хүрсэн нь тэр байв.

Улмаар хоёрдугаар үе эхлээд 20 минут өнгөрч байхад В.Аюувигийн
булангийн цохилтонд Э.Валенси хамгийн түрүүнд хүрч, гоол оруулснаар
Эквадорын багт ялалтын 3 оноог авчирчээ.

ТОГЛОЛТЫН ШИЛДЭГ ТОГЛОГЧ

Эннер Валенси. Өдгөө 24 настай тэрээр Мексикийн Пачука клубт харьяалагддаг.

Шигшээдээ 14 тоглолтонд оролцон 9 гоол оруулаад байгаа тэрээр энэ
өдөр дубль хийн багтаа ялалт авчирсан учир шилдгээр нэрлэгдэх нь
гарцаагүй хэрэг биз ээ.

“Бразил-2014”-ийн эхний өдрүүдийн хамгийн том сенсааци нь Испанийн
шигшээ баг хэсгээсээ шалгарч чадаагүй гэдэг асуудал байлаа. Түүх сөхвөл францчууд
1998 онд дэлхийн аварга болсныхоо дараа 2002 оны тэмцээнд нэг ялах нь битгий хэл
нэг гоол оруулж үзэлгүйгээр хасагдаж байсан. Италичууд 2006 онд дэлхийн аварга болсныхоо
дараа 2010 оны Африкийн тэмцээнд ирээд бас л нэг ч ялж чадалгүй гэртээ харьж байлаа.
Дээрх хоёр багтай харьцуулахад Испанийн шигшээ багт хүндэтгэх шалтгаан бий. Тэд
гэнэт цойлж гарч ирээгүй. Тэд 2006 оноос эхлэн дэлхийн хөлбөмбөгийн моодыг тодорхойлж
даруй 10 орчим жил энэ хэлбэрээ хадгалан бусад улсын шигшээ багийг чичрүүлж байлаа.
Испанийн шигшээ багийн Хави, Иньеста, Касильяс, Рамос, Торрес нарын түүх үүгээр
төгсч байгаа ч тэдний ард Иско, Лорьенто, Морьено гээд өчнөөн олон залуучууд зайг
нь нөхөх гээд хүлээж байгаа. Тийм учраас тэд айх юмгүй залуу үедээ халаагаа өгнө.
Испанийн шигшээ багийн ганц алдаа цагийг нь олж залуу үедээ зай тавьж өгөөгүй гэдэг
л байх шив дээ. Энэ бол тоглогчдын буруу биш, багийн ахлах дасгалжуулагч Де Боскегийн
алдаа юм шүү дээ. Испанийн шигшээ багийг баллаж мэдэх ганц алдаа нь авч болох бүх
шагналыг авсан “хөгшчүүл”, тэдэнд цаашид тоглох сонирхол бий юу гэдэг л тэдний хамгийн
том дутагдал хэмээн манай сонин өмнө нь бичиж л байлаа.

Тэр нь ч энэ удаад батлагдав. Хамгийн харамсмаар нь өмнөх дэлхийн
аврага багийнхны хувьд эмгэнэлтэй, ичмээр бас гунигтайгаар унав. Гэвч тэд хөлбөмбөгийн
түүхэнд хийдгээ хийж, гавьяагаа тамгалсан улсууд учраас тэднийг битгий муулаарай.

Робин
ван Перси (Нидерландын шигшээ багийн довтлогч): Бид нэгдүгээр үед ямар
муу тоглов оо. Ерөөсөө болж өгөхгүй байсан. Гэхдээ австраличуудыг магтах хэрэгтэй.
Тэд хором ч зогсохгүй хөдөлж байсан шүү дээ. Дэлхийн дэвжээнд тоглож байгаа хүн
хэсэг ч хугацаанд зогсч болохгүй гэдгийг өнөөдрийн тоглолт харууллаа. Ийм тоглолтод
заавал ялж байх хэрэгтэй. Хоёрдугаар үед 4-3-3 схемээр тоглож эхэлсэн нь ашгаа өгсөн
болов уу. Бид чинь дандаа ийм схемээр тоглодог байсан тул их амар санагдсан. Миний
шар хуудасны тоо хэтэрсэн тул Чилитэй тоглох тоглолтыг өнжинө. Нэг бодлын сайн ч
юмуу.

Серхио Рамос (Испанийн шигшээ багийн төвийн хамгаалагч): Маш
хүнд байна. Испанийн шигшээ багийн хувьд өнөөдөр тун хэцүү өдөр. Гэхдээ энэ бол
Испанийн хөлбөмбөгийн төгсгөл биш шүү. Бид түүхийг бүтээсэн. Яг энэ баг Европын
аварга болж дэлхийн аваргын цомыг анх удаа нутагтаа авчирч байсан. Үүнийг мартах
аргагүй. Бидний араас сайн, авьяаслаг залуучууд гарч ирж байгаа. Бид Австралийн
шигшээ багтай тоглох тоглолтоо толгой өөдөө цоглог тоглож дуусгана.

Паркийн дэргэдэх “Хүрхрээ” асар. Зургадугаар сарын 17-нд шөнийн 00 цагаас  Герман, Португалийн тоглолт эхэлсэн юм. Герман 4:0-ээр хожлоо. Манай сурвалжлагч Ц.Мягмарсүрэнгийн гэрэл зургийн сурвалжлагаас хөл бөмбөгийн фанатуудын  үдшийг тольдоно уу. 

 

ДАШТ-ий  В хэсгийн хоёрдугаар тойргийн хүрээнд цомыг хамгаалагч Испанийн шигшээ баг Чилийн шигшээ багтай  тоглож 2:0 харьцаатай ялагдал хүлээлээ. Ингэснээр Испанийн шигшээ баг ДАШТ-ийг цаашид үргэлжлүүлэх боломжгүй болж, хэсгээсээ шалгарч чадсангүй. Испанийн шигшээгийн хувьд багийн гол найруулагчийн нэг Шави Эрнандезийг сэлгээнд суулгаж довтлогоог дэмжих зорилготой Педрог баруун жигүүрт гаргажээ.  Мөн төвийн хамгаалалтанд өмнөх тоглолтонд муу тоглолт үзүүлсэн Херард Пикегийн оронд Баерны Хави Мартинез гараанд гарсан байна. Бусад байрлалуудад яг өмнөх тоглолтонд тоглосон хэлбэрээрээ тогложээ. 

Хөл бөмбөгийн ДАШТ-ий В хэсгийн хүрээнд Нидерландын шигшээ баг хоёрдугаар тойргийн тоглолтоо Австралийн шигшээ багтай хийн 3:2 харьцаатай ялалт байгууллаа. Тоглолтын эхнээс Австралийн шигшээ бөмбөг барилт сайн хийж байсан ч тоглолтын эхний гоолыг 20 дахь минутад Нидерландын шигшээ багийн довтлогч Роббен гоол оруулсан.  Энэ гоолоос нэг минутын дараа Австралийн шигшээ багийн хагас хамгаалагч МкГоуэний дамжуулалтыг Тим Кэхил буулгалгүй солгой хөлөөрөө цохин тооны харьцааг 1:1 болгож тэнцүүлсэн юм. Ийнхүү тоглолтын эхний үе Австралийн шигшээ багийн давамгай байдлаар өндөрлөсөн билээ.  Тоглолтын сүүлийн хагаст хийсэн эхний гоол ч Австралийнх байв.  Дараагийн гоолыг Нидерландын багийн  Ван Перси хийсэн юм. Хожлыг гоолыг  сэлгээгээр гарч ирсан Мемфис Депай  тоглолтын 68 дахь минутад 25 орчим метрээс алсын цохилтоор хийсэн билээ. 

2010 оны ДАШТ-ий үер
алдаршиж 13 тоглолтын 11-ийг зөв тааж байсан Германы усан хүрээлэнгийн алдартай
үзмэрч Паул наймаалжийг санаж байна уу. Хөөрхий тэр угийн богинохон насалдаг
амьтадын төрөл тул тэгээд тун удалгүй хорвоогоос явж олон хүний санааг амрааж
билээ. Тэр цагаас хойш амьтан ашиглаж таах гэсэн оролдлого их моод болсон .
Одоо ДАШТ эрчээ авч байгаатай холбогдоод улс болгон л шахуу өөрийн гэсэн үзмэрч
амьтантай болчихоод байна. Польшийн амьтны хүрээлэнгийн заан, Дубай хотын
Шахин  нэртэй тэмээ, Италийн Пабло нэртэй
оцон шувуу, Сычуаний Панда,  Бразилийн
Том толгой хочит яст мэлхий гээд өчнөөн олон үзмэрчид байна, цаана чинь. Тоглох
гэж байгаа хоёр улсын тугны доор хоол тавиад алийг нь амьтан сонгох нь вэ
гэдгийг камерт бичээд youtube-д тавиад хоёр гурав таачихад л од болж байгаа юм
шүү дээ. Манайд атга өвсний төлөө нэг иймэрхүү хэмжээний  таавар таачихаар сарлаг ч юм уу, ухна ч юм уу
байгаа болов уу.