Category: энтертаймент-ертөнц

Categories
мэдээ энтертаймент-ертөнц

Өмнөд Солонгос мобайл иргэний үнэмлэхтэй болно DNN.mn

Ирэх оны хоёрдугаар хагасаас эхлэн мобайл иргэний үнэмлэх нэвтрүүлэхээр төлөвлөснийг Өмнөд Солонгосын дотоод хэргийн яам өнөөдөр мэдээлжээ. Ухаалаг гар утсанд хадгалагдах энэ үнэмлэх нь одоогийн пластик үнэмлэхтэй ижил хуулийн статустай болох юм байна.

Нийгмийн хөгжлийн хандлага бүхэлдээ “хэтэвчгүй” болох чиглэлд хувьсан өөрчлөгдөж буй тул мобайл иргэний үнэмлэх нэвтрүүлэх болсноо дотоод хэргийн яам тайлбарлажээ. Хуулийн холбогдох өөрчлөлтүүдийг парламентаар батлуулсны дараа ирэх оны дундаас эхлэн иргэд мобайл үнэмлэхээ авч эхлэх юм аж. Ингэхдээ пластик, мобайл иргэний үнэмлэхүүд зэрэг хүчин төгөлдөр хэрэглэгдэх бөгөөд пластик үнэмлэхийг дахин хэвлүүлэх бүрд мобайл нь хүчингүй болж байхаар зохицуулжээ.

Одоогоор Өмнөд Солонгост жолооны үнэмлэхийг пластик болон мобайл хувилбараар зэрэг ашигладаг юм байна.

Г.АМАРСАНАА

Categories
мэдээ нийгэм энтертаймент-ертөнц

“Айзам 2” хамтлаг баасан гаригт тоглолтоо хийнэ DNN.mn

26 жилийн хугацаанд завсарлаад байсан “Айзам 2” хамтлаг энэ Баасан гарагт тоглолтоо хийхээр болжээ.

Тодруулбал, тус хамтлагийн “Зүрх сэтгэлийн минь дуунууд” нэртэй тоглолт ганцхан удаа буюу дөрөвдүгээр сарын 7-ны өдөр UB palace-н концертын их танхимд болох аж.

Хит дуунуудаа сэргээж дуулна

Айзам хамтлагийн дэргэдээс үүссэн “Айзам 2” хамтлаг нь анх 1990 онд байгуулагдаж 1997 он хүртэл идэвхтэй уран бүтээлээ хийж байгаад завсарлажээ. Одоо зохиох гэж буй тоглолтоороо шинэ уран бүтээлээс гадна тэр үед дуулж байсан дуунуудаа сэргээж дуулна гэдгийг хамтлагийн ахлагч С.Гантөр хэлсэн юм.

Хамтлаг хамгийн сүүлд 1997 онд тоглолтоо хийсэн бөгөөд түүнээс хойш 26 жилийн дараа ахин тоглох гэж байгаа нь энэ аж.

Тоглолтод зочноор дуучин Б.Сарантуяа, Ж.Алтанцэцэг, Э.Минжинсор, Л.Энхмандах, С.Сэрчмаа болон Титэм, Салхи, Лумино зэрэг хамтлагууд оролцоно. Түүнчлэн өөрсдийн дуунуудаас гадна Айзам хамтлагийн зүрх сэтгэлд хоногшсон дуунуудаас дуулж танилцуулна гэдгийг тоглолтын продюсер дуучин Л.Энхмандах хэлсэн юм.

“Айзам 2” хамтлагийн дуунууд нь 1990-1997 оны үеийн залуучуудын дунд хит болж байсан бөгөөд тэдгээр дуунууд буюу Мөрөөдөл, Чиний харцанд, Хос алтанзул, Бороо, Дурсамж зэрэг дуунуудаа дуулна. Хамтлагийн хамгийн хит болсон дуун дээр гардаг “Зүрх сэтгэлийн минь мөрөөдөл болсон” гэх үгнээс улбаалж тоглолтын нэрээ өгсөн гэдгийг хамтлагийнхан онцолж байлаа.

Тоглолтын найруулагчаар найруулагч, продюсер Р.Мөнхсайхан ажиллаж байгаа юм байна.

Тоглолтын тасалбар ticket.mn дээр зарагдаж байгаа аж.

Categories
мэдээ онцлох-нийтлэл соёл-урлаг туслах-ангилал энтертаймент-ертөнц

Ё.Дамчаабадгар: Монголд бүжиг дэглээч, бүжгийн шүүмжлэгчид маш олон байх хэрэгтэй DNN.mn

Соёл урлагийн их сургуулийн Бүжгийн урлагийн сургуулийн орчин үеийн бүжгийн багш, “DDanceLab” бүжгийн компанийн үүсгэн байгуулагч, ЦЕГ-ын “Сүлд” чуулгын бүжиг дэглээч, Монгол Улсын соёлын тэргүүний ажилтан Ё.Дамчаабадгартай ярилцлаа.

-Оны шилдэг бүтээл, уран бүтээлчийг шалгаруулдаг “Мөнгөн мод-2022” наадмын шилдэг бүжиг дэглээчээр шалгарсан танд баяр хүргэе. Тухайн үеийн сэтгэгдлээсээ хуваалцахгүй юу?

-Маш их баярлалаа. “Мөнгөн мод-2022” наадмын шилдэг бүжиг дэглээчээр шалгарсандаа туйлын их баяртай байна. Тухайн үеийн сэтгэгдэл гэвэл “Мөнгөн мод 2022” наадмын ёслолын үйл ажиллагааны өмнө манай СУИС-ийн бүжгийн урлагийн сургуулийн инновацийн бүтээл “Босоо цагаан гурвалжин” цуврал бүжгэн жүжгийн гурав дахь цуврал тоглогдож байсан. Тус бүжгэн жүжгийн гол дүрд бүжиглэж байсан болохоор тоглолтоо дуусгаад л “Мөнгөн мод” наадмын тайз руу ирсэн. Тэр үед тоглолтын тайзнаас шагналын тайз руу гүйж яваа мэдрэмж маш гоё байсан. Нэг юм руу яарсан, догдолсон тийм мэдрэмж төрж байсан. Өөрийгөө шагнал авна гэж бодоогүй, энэ арга хэмжээнд оролцох нь л том үйл хэрэг байсан болохоор яарч очсон. Монгол Улсын гавьяат жүжигчин бүжиг дэглээч Д.Энхгэрэл багшаасаа энэхүү цомоо гардан авсандаа маш их баяртай байгаа.

-Сүүлийн үед ямар уран бүтээл дээр голчлон ажиллаж байна вэ?

-Сүүлийн үед уран бүтээлдээ голчлон контемпорари этник чиглэлийн бүжгийн урсгалыг нэвтрүүлэхээр зорьж байна. Энэхүү бүжиг нь барууны буюу контемпорари урсгалыг ардын хэв шинжтэй хослуулснаар контемпорари этник шинэ бүжгийн урсгалыг нэвтрүүлэх зорилготойгоор ажиллаж байна. Мэдээж контемпорари чиглэлийн бүжгийн бүтээлийг хийхээс гадна нэмээд контемпорари этник чиглэлийн бүтээлүүдийг хийж байгаа. Контемпорари этник чиглэлийг бий болгож, энэхүү урсгалыг хөгжүүлэх болсон шалтгаан нь ардын урлагаа дэлхийн тавцанд гаргахын тулд дан ганц ардын урлагаар нь байлгах боломжгүй болчихсон. Барууны соёлыг хослуулж, шинэчилж, хөгжүүлснээрээ илүү сонирхолтой болно. Жишээлбэл, манай “The Hu” хамтлаг байна. Зөвхөн этник хэлбэрээр байсан бол энэ хэмжээний томоохон амжилт гаргахгүй байсан. Рок буюу барууны стайлыг хослуулж Хүннү рок урсгалыг гаргаж ирсэнтэй адил бий биелгээгээ тэр чигээр нь гаргах боломжгүй учраас контемпорари бүжгийн урсгалтай хослуулж контемпорари этник бүжгийн урсгалыг бий болгосноор дэлхийд бий биелгээгээ таниулах боломжтой гэж үзэж байгаа юм.

-Анх бүжгийн урлагийг хэрхэн сонгох болсон бэ. Бүжгийн урлагаар хэр хугацаанд хичээллэж байна вэ?

-Хамгийн анх 13 настайдаа бүжгийн гараагаа эхэлсэн. Миний мэргэжлийн бүжигчин болох гарааг минь Баянхонгор аймгийн Хөгжимт драмын театрын бүжгийн багш, уран сайхны удирдаач Монгол Улсын гавьяат жүжигчин Ц.Алтанцэцэг багш маань тавьж өгсөн. Багшийнхаа ач, дэм, тусаар өдий зэрэгтэй явж байна. Би Баянхонгор аймгийн Баянцагаан сумынх. Хөдөө орон нутагт өссөн учраас тэнд бүжгийн хөгжил төдийлөн сайн биш, сумын соёлын төвийн клубийн бүжиг л гэж байсан. Манай аймгийн Засаг дарга, сургуулийн дуу хөгжмийн багш нар нийлж Улаанбаатар хотод анхны удаа “Мөнхөд дурсагдах сургууль” нэртэй тоглолт хийхээр болсон юм. Энэхүү тоглолтод оролцох хүүхдүүдийг Ц.Алтанцэцэг багш маань сонгож бүжигчнээр зааж сургаж авсны дунд азаар би сонгогдож бүжигтэй амьдралаа холбосон доо. Түүнээс хойш 16 жил бүжгээр амьсгалж, бүжгээрээ амьдарсан байна.

-Олон улсын тэмцээн уралдаанд улсаа төлөөлөн оролцохоор явахдаа хэр хугацаанд бэлтгэл хийдэг вэ. Энгийн үед ч мөн бэлтгэл хийдэг байх, тийм үү?

-Олон улсын уралдаан тэмцээнд оролцохдоо хамгийн багадаа жилийн хугацаанд бэлтгэл хийдэг. Бэлтгэл буюу биеийн бэлтгэл хийхээсээ өмнө сэтгэл зүйн бэлтгэл хийх ёстой. Тухайн оролцох гэж буй тэмцээнээ, ямар бүжгээр хэрхэн оролцох зэргээ бүгдийг маш сайн судалдаг. Энгийн үед ч бэлтгэл хийдэг. Нэг л өдөр бэлтгэлээ хийхгүй өнгөрүүлбэл энэ бие яг л хүний бие шиг болчихдог. Тиймээс үргэлж, тогтмол цаг хугацаанд бэлтгэл хийх ёстой. Бүжиглээгүй байгаа үедээ ч өөрийнхөө сэтгэлзүйг бэлдэж байх хэрэгтэй. Олон улсын уралдаан тэмцээнд хамгийн багадаа 8-10 шүүгч байдаг учраас техник, ая, бүжгийн дэглэлт гээд тус тусад нь хариуцсан шүүгч нар байдаг. Тэмцээний үеэр энэ хүмүүсийн надаас харах өө, алдаа нь маш их болж таарч байгаа юм. Тэгэхээр ямар нэгэн алдаа гаргахгүйн тулд өдөр бүр бэлтгэл хийж, өөрийгөө бэлтгэх ёстой. Монгол бүжигчдийн хамгийн их гаргадаг зүйл нь зөвхөн бүжиг болон техник дээрээ маш их бэлтгэл хийж, сэтгэл зүйгээ бэлтгэдэггүй. Хэчнээн сайн мундаг бүжигчин байсан ч сэтгэл зүй нь бэлтгэгдээгүй байвал тухайн тэмцээнээс хасагдах тохиолдол маш их байдаг. Тухайн бүжигчний сэтгэл зүй бэлэн биш учраас тайзан дээр гарч шүүгчдийн өмнө сандарч алдаа гаргах магадлал их өндөр юм.

-Бүжиг дэглэхэд юу хамгийн чухал байдаг юм бол. Бүжиг дэглэхдээ юуг анхаардаг вэ?

-Бүжиг дэглэхэд анхаарах зүйл гэвэл бүжгийн төрөл жанр болон яг ямар илэрхийлэмжтэй бүжиг гэдгээс хамааран янз бүр байж болно. Тухайлбал, бий биелгээтэй бүжиг дэглэнэ гэж бодвол ёс заншил уламжлал, биелгээнүүд хоорондын ялгаа, намба төрхүүдийг нь маш сайн анхаарах хэрэгтэй. Түүнчлэн зохиомж бүжиг, цэцэгний тухай бүжиг дэглэх гэж буй бол тэр цэцгийг судалж хэрхэн хөдөлж, хэрхэн ургадаг, бий болдог талаар судалгаа хийсэн байх шаардлагатай. Контемпорари чиглэлийн бүжиг дэглэх бол хөдөлгөөн гэхээс илүү мэдрэмж дагнадаг, үзэж буй хүмүүсийн мэдрэмжээр хөдөлгөөн урлах зэргээс шалтгаалан бүжиг дэглэхэд олон төрлийн арга бий. Манай Монголын хувьд бие биелгээ, тайзны монгол бүжиг, этник, контемпорари этник гэж ардын бүжиг тал руу дөрвөн урсгал, чиглэл хөгжсөн байдаг. Энэ хоорондын ялгаа болон хөгжлийг хооронд нь холихгүйгээр анхаарч бүжиг дэглэвэл илүү тохиромжтой гэж боддог.

-Бүжиглэж буй бүжгээ үзэгчдийн сэтгэлд хүргэж, илэрхийлэхэд юу хамгийн чухал байдаг вэ?

-Мэдээж хамгийн чухал зүйл бол дотоод мэдрэмж байдаг. Бүжгээ маш сайн ойлгож үзэгчдэд ойлгуулахын тулд хичээж бүжиглэх хэрэгтэй. Урлагийнхан бол буу бариагүй дайчид гэдэг үг байдаг. Соёл урлагийн хүмүүс өнөөгийн Монголын тусгаар тогтнол болоод өв соёлыг тээж авч яваа хүмүүс. Яагаад гэвэл энэ өв уламжлал, соёл, монгол ондоошил үгүй бол аль нэг улс, гүрний эрхшээлд орно. Бусдаас ялгарах онцлог байгаа учраас Монгол Монголоороо байгаа. Бий биелгээ, монгол бүжиг бүжиглэж байгаа хүмүүс тухайн мөн чанарыг нь гаргаж бүжиглэх хэрэгтэй. Хоёрдугаарт, мөн чанар гээд хуучинсаг байдлаар байлгаад байх юм бол манай монгол бүжгийг дуурайлгаад илүү баяжуулж, техник нэмээд манайх гээд гаргахыг хэн ч үгүйсгэхгүй. Тэгэхээр өв уламжлал, хадгалаад хайрлаад байгаа юмаа хааяадаа маш их зүйлээр өөрчилж, тордож, хөгжүүлэхгүй, хэтэрхий уламжлалаараа байлгаад байхаар алдах эрсдэл их болоод байна гэсэн үг. Тиймээс Монголд бүжиг дэглээч, бүжгийн шүүмжлэгчид маш олон байх хэрэгтэй. Уламжлал гол мөн чанарыг алдагдуулахгүйгээр өөр өөрсдийн хэв маягаар хөрвүүлдэг бүжиг дэглээч, шүүмжлэгчид маш их байх хэрэгтэй болж байгаа юм. Бий биелгээ тэр чигээрээ ахуй соёл шүү дээ. Тэгэхээр өдөр тутмын бидний хийдэг зан үйлийг бүжиг болгочихсон. Бид хайрлаж гамнахаасаа гадна хөгжүүлж дараагийн түвшин рүү аваачсан хүмүүсийг үгүйсгэхгүй байх учиртай.

-Бүжиг дэглээчийн хувьд бүжгийн урлагт хайртай сонирхолтой, хичээллэхээр зорьж байгаа хүүхэд, залууст хандаж юуг зөвлөх вэ?

-Ардын урлаг, бий биелгээ нь маш олон хүмүүс, залуучуудын хувьд хөдөөний урлаг, хөдөө байдаг хүмүүс л бүжиглэдэг гэдэг бодолтой болчихсон байсан ч сүүлийн үед залуус бий биелгээ бидний ондоошил гэдгийг мэдэрч эхэлж байгаа. Монгол гэж цээжээ дэлдэхээс гадна, үйл хэргээрээ бас бий биелгээ буюу ардын өв соёлоо багахан ч гэсэн суралцаад эхэлбэл Монгол Улс, тусгаар тогтнолынхоо төлөө хийж байгаа маш том үйл хэрэг юм шүү. Л.Өлзийтөгс зохиолчийн номоос “…баян ч бай, ядуу ч бай өөрийн гэсэн хэл, соёл, урлагтай байна гэдэг хэчнээн сайхан юм бэ” гэх мөрийг уншиж байсан. Хилийн дээс гараад харь оронд очиход бидэнд ардын урлаг, өв соёл, Монгол гэх ондоошил байдаг. Тиймээс бүжгийн урлагаар хичээллэж байгаа хүүхдүүд ардын урлаг, өв соёлыг маш сайн суралцаж, хичээллээсэй, нэмээд түүнийгээ хөгжүүлж дэлхийн хэмжээнд гаргаж өрсөлдөх ур чадварт суралцаасай гэж хүсч байна. Манайхан ардын урлагийг хөгжүүлж өөр урсгалтай хослуулах гэхээр “Энэ зүйл чинь буруу, өв соёлоо устгаад байна” гэдэг. Гэтэл энэ нь өв соёлоо устгах биш маш зөв зүйл юм. Мэдээж өв соёлоор нь тээгээд аваад явж байгаа хүмүүс бий ч түүнийг хөгжүүлэх зоригтой хүмүүс олон болох хэрэгтэй гэдгийг хүсье. Түүнчлэн сүүлийн үед бүжгээр хичээллэж буй зарим хүүхдийг харахад уралдаан, тэмцээн, медалийн төлөө бүжгээр хичээллэдэг болсон. Хэрвээ ийм зорилготойгоор бүжгээр хичээллэх гэж байвал дэмий. Бүжиг бол маш том соёл, хүмүүжил олгодог зүйл. Тиймээс эцэг эхчүүдэд хандаж хэлэхэд хүүхдээ бүжгээр хичээллүүлэх гэж буй бол зорилгоо маш зөв тодорхойлох хэрэгтэй. Уралдаанд оролцуулах гэж хичээллүүлэх үү, ардын өв соёл, Монгол гэх бахархам зүйлийг бий болгох гэж байгаа юу гэдгээ тодорхойлж байж урлагаар хичээллээсэй гэж боддог. Урлаг нь хүнийг нинжин, уян зөөлөн сэтгэлтэй, хүмүүжилтэй болгодог байтал тэмцээнд түрүүлэхийн төлөө ямар ч ёс зүйгүй, хүмүүжилгүй үйлдэл гаргах хэмжээний болгож буй маш олон хүмүүс байна. Хүүхдэд яг юу зааж буйгаа, хүүхдээ юу сураасай гэж хичээллүүлж байгаагаа судалж, тодорхойлж байж бүжиг, урлагт суралцуулаасай гэж хүсмээр байна.

-Цаашдын уран бүтээлийн төлөвлөгөөнөөсөө хуваалцахгүй юу?

-Монгол контемпорари бүжгийн урсгалыг дэлхийд гаргахыг зорьж байна. Түүнчлэн монгол хүн учраас бий биелгээ гэдэг өв соёлыг монголчууддаа болон дэлхийд таниулж, цаашдаа энэ зүйлийн төлөө би юу хийж болох вэ гэдэгт тархиа гашилгах төлөвлөгөөтэй байна. Дан ганцхан бий биелгээ биш бүжгийн салбараа яаж хөгжүүлэх, ёс зүйн хэм хэмжээ нь алдагдсан, хүмүүжилгүй хүмүүс яагаад олшироод байгаа вэ гэдэгт хувь хүнийхээ үүднээс их санаа зовдог болсон. Тэгэхээр үүнийг залруулахын төлөө залуучуудын оролцоо юу байж болох вэ гэдэгт анхаарах төлөвлөгөөтэй байна. Олон улсын уралдаан тэмцээнд мөн оролцоно. Олон улсын уралдаан тэмцээнд оролцох нь монгол бүжиг, бүжгийн хөгжил, өв соёлыг харуулж байдаг. Тийм болохоор монгол соёл, урлагийн төлөө цаашид хичээж ажиллах болно. Манай “DDanceLab” бүжгийн компани маань тун удахгүй БНСУ-ын бүжгийн компаниудтай хамтран тоглолт зохион байгуулах, Монголдоо уран бүтээлчдийг урьж авчрах зэрэг олон ажлын төлөвлөгөөнүүд гарсан байгаа.

Цаашид энэ чиглэлээр хийх ажиллах ажил их бий. Түүнчлэн “Дэлхий тойрсон биелгээ” гээд бүжгийн контент хийдэг. Одоогийн байдлаар гурав, дөрвөн улсад контентын зураг авалт хийгдсэн байгаа. Дэлхийн улс үндэстнүүдийн хамгийн их жуулчид очих дуртай, хамгийн үзэсгэлэнтэй газруудад очиж бий биелгээгээ бүжиглэж олон нийтийн цахим хуудсаар түгээдэг контентоо үргэлжлүүлэх төлөвлөгөөтэй байгаа.

Categories
мэдээ нийгэм онцлох-нийтлэл туслах-ангилал энтертаймент-ертөнц

Финландчуудын аз жаргалын нууц DNN.mn

2023 оны “Дэлхийн аз жаргалын тайлан”-гаар Финланд дэлхийн хамгийн аз жаргалтай орноор зургаа дахь удаагаа шалгарсан. Харин манай улс 137 орноос 61 дүгээрт буюу Тайландын хойно, Киргизстаны урд жагссан байна.

Финланд улс яагаад “Дэлхийн хамгийн аз жаргалтай орон”-оор удаа дараа шалгараад байна вэ. Нууц нь их энгийн юм. Аз жаргалтай байгаад нь дөрвөн том хүчин зүйл нөлөөлдөг аж. Нэгдүгээрт, уг үндэстэн нь өөрөө тайван дөлгөөн хүмүүс санж. Хүнтэй өрсөлдөж, уралдахаас илүү хамтран ажиллаж, нэгэндээ туслах, өгөөмөр хандахыг нийгмийн бүхий л шатандаа хичээцгээдэг. Иргэд нь төрөө дээдэлж, төр нь ард түмнээ амгалан, аз жаргалтай амьдрах тал дээр нь бүх анхаарлаа хандуулна. Бизнес эрхлэгчдийг төр засгийн зүгээс ихэд дэмжих бөгөөд тэр хэрээр баялаг бүтээгчид нь эх орныхоо төлөө том бүтээн байгуулалт өрнүүлж, хөрөнгө оруулалт хийдэг юм байна.

Хоёрдугаар нууц нь, чанартай хүртээмжтэй насан туршийн боловсролын системтэй. Финландын багш нар өндөр цалин авах бөгөөд сурагчдын дүнгээр өрсөлдүүлэхгүй, түвшин тогтоох шалгалт ч авдаггүй. Амьдралын ухаан, эх орондоо хэрэгтэй зөв хүн болох тухай бага ангиас нь л сургаж хөгжүүлдэг. Гуравдугаарт, Финландын дундаж давхарга нийгмийнхээ 70 орчим хувийг эзлэх агаад хүн бүрд тэгш боломжийг олгодог. Эрүүл мэнд, боловсрол, бизнес эрхлэх зэрэгт адил тэгш боломж бүрдүүлж өгдөг. Жишээ нь, хүүхдүүдийг гоц авьяастай болон хөгжлийн бэрхшээлтэй гэж ялгахгүй, бүгдийг л онцгой гэж авч үздэг юм байна.

Дөрөв дэх нууц нь тус улсын иргэд баталгаагүй мэдээ мэдээлэл, сошиал шуугиан, дуулианд хэзээ ч ач холбогдол өгдөггүй, тоож хардаггүй юм байна. Өөрөөр хэлбэл сошиалд манайхан шиг “живээгүй”. Зөвхөн мэргэжлийн редакцитай сонин, телевизийн мэдээллийг л үнэн гэж бат итгэдэг. Фэйсбүүк, сошиалаар дуулиантай мэдээ цацагдлаа гэхэд “Ийм мэдээнд битгий итгэ. Орой телевизийн мэдээ үз. Эсвэл маргааш өглөөний шинэ сонин унш” гэж нэгэндээ зөвлөдөг тархи, оюуны өндөр дархлаатай ухаалаг ард түмэн юм байна.

Энэ дөрвөн нууцаас сүүлчийнхийг нь онцолж өөрийн орны жишээн дээр харвал монголчуудын аз жаргалгүй, Монгол Улсыг аз жаргалгүй болгож буй нэг хүчин зүйл бол сошиалын хэт их хэрэглээ, сошиалын баталгаагүй мэдээ мэдээлэлд итгэдэг масстай байгаа нь юм даа. Уншдаггүй, утсанд донтсон улс гэхэд энэ жагсаалтын 61 дүгээрт бичигдсэн нь яамай даа.

Categories
мэдээ цаг-үе энтертаймент-ертөнц

Инээдмийн баярын тухай сонирхолтой баримтууд DNN.mn


Өнөөдөр олон улсын инээдмийн баярын өдөр. Зарим оронд тэнэгүүдийн баяр ч гэдэг. Жил бүрийн дөрөвдүгээр сарын 1-нийг “Инээдмийн баяр – Тэнэгүүдийн өдөр (April Fool’s Day, День Смеха – День Дурака)” хэмээн нэрлэж нэгнийгээ шоглон, бяцхан мэхэлж хөгжилддөг уламжлал дэлхий дахинд тогтжээ.

Энэ өдөр гэр бүлийн хүрээнд болон хөрш гээд бүгд л нэгнээ хууран мэхэлж, эвгүй байдалд оруулах хөгжөөнт тоглоом бөгөөд үүний дараа “Дөрөвдүгээр сарын нэгэн шүү” хэмээн нөгөө хүнээ хэлж тайвшруулдаг.

ДӨРӨВДҮГЭЭР САРЫН 1-НИЙ ЭНЭ ӨДРИЙГ УЛС ОРОН БҮРТ ХЭРХЭН ТЭМДЭГЛЭДЭГ ТУХАЙ СОНИРХОЛТОЙ БАРИМТЫГ ХҮРГЭЖ БАЙНА.

Францчууд шинэ оныг угтах баярыг хойшлуулсантай холбоотой хэмээн үзэж шинэ оны баяр болгон тэмдэглэдэг.

Харин Европын ихэнх оронд “Тэнэгүүдийн өдөр” гэдэг. Энэ нь бие биеэ хуурч мэхлэх ба мэхлэгдсэн нэг нь тэнэгийн тоонд орно гэж үздэг.

Америк болон Их Британи XVIII зуунаас “хуурдаг өдөр” хэмээн тэмдэглэж иржээ. Эртний Ромд энэ өдөр Инээдмийн бурхныг залж байсан түүх бий.

Ромын алдартай 10 гладиаторХарин Германчууд “хамгийн азгүй” өдөр хэмээн тэмдэглэдэг.

Учир нь ард түмний алдарт их хүү Иуда Маккавей нас баржээ. Гэсэн хэдий ч баярын өдрийг нь билгэдэж азгүй, инээдгүй өдөр хэмээн тэмдэглэн өнгөрүүлдэг болжээ.


1994 онд Америкийн “National Public Radio” чихэн дээрээ “Pepsi” гэсэн шивээс хийлгэсэн хүн бүхий л амьдралынхаа турш тус компанийн бүтээгдэхүүнийг 10 хувийн хөнгөлөлттэй авах эрхийн бичгээр шагнана гэж мэдээлжээ. Гэтэл бүтэн хэдэн өдрийн турш шивээсийг хийлгэсэн залуус утас цохисон байна.

Мөн 1957 онд “BBC” телевиз Швейцарт гоймон их хэмжээгээр хурааж авсан тул түүнийгээ яахаа мэдэхгүй байгаа тухай бичсэн байна. Аж ахуй эрхэлдэг хүмүүс гоймонгийн үр бүтээж түүнийгээ цэцэглүүлж чадсан гэжээ. Гэтэн уншигч үзэгчид үүнд үнэмшин гоймон тарих тухай асуух гэж BBC-рүү тасралтгүй утастжээ. Хариуд нь тэд хээв нэг ”Гоймон дээрээ улаан лоолийн сүмс хийгээд сайн залбир” гэж зөвлөж байсан гэнэ.

Тэгвэл “Phoenix New Times” сонин 1999 онд орон гэргүй хүмүүст зориулсан сан байгуулж хоол хүнд хувцас хунараар хангах хандив цуглуулж байгаагаа хэлжээ. Мөн тэдгээр хүмүүсийг зэвсгээр хангахад туслаач гэсэн байна. Үүнийг уншсан хүмүүс дансаар маш их хэмжээний мөнгө шинжүүлжээ.

1986 онд Францын “Le Paridien” сонины Эйфелийн цамхгийг буулгаж Дислейндэд дахин барина харин цамхаг байсан газар 1992 оныг Олимпын тоглолтыг зохион байгуулах цэнгэлдэх хүрээлэн сүндэрлэнэ гэсэн мэдээ уншигчдыг их бухимдуулсан бол “Irish Times” сонины Лениний шарилыг худалдан авч Парис хотын Диснейлэндийн үзмэр болгоно гэсэн мэдээ бүр олон хүний дургүйцлийг хүргэжээ. Тэр үед засгийн газарт маш олон хүний гомдол санал ирж байжээ.

Бидний мэдэхээр 2015 онд Австралийн гутлын загвар зохион бүтээгч Миз Мүүц селфи хийдэг гутал худалдаанд гаргах болсноо мэдэгдсэн билээ. Сурталчилгааг нь хүртэл цацсанд олон хүн итгэн худалдан авахыг хүссэн байна. Мөн өнгөрсөн жил Японы Burger King-ийн хамт олон шарсан махны үнэртэй сүрчиг дөрөвдүгээр сарын 1-ий өдөр зарна гэсэн зар тарааж урт дараалал үүсгэжээ.

2014 онд Өмнөд Каролина мужийн Клемсон их сургуулийн эрдэмтэд бар болон үнээний эрлийз амьтан төрсөн тухай мэдээг тарааж байжээ.


Categories
мэдээ спорт энтертаймент-ертөнц

Мэргэжлийн сумогийн түрүү бөх Кирибаяма Б.Лхагвасүрэнгийн аав Я.Бямбачулуун: Хүүгийнхээ түрүүлэхийг хараад хөл газарт хүрэхгүй баярлалаа DNN.mn

Малчны гэрт төрсөн Б.Лхагвасүрэн хүү Япон улсын үндэсний спорт мэргэжлийн сумогийн дээд зиндаанд анхны түрүүгээ хүртсэн нь спортын ертөнц дэх онцлох үйл явдал байв. Б.Лхагвасүрэнгийн гэр бүлийнхэн өнөөдөр ч Дорнод аймгийн Сэргэлэн сумандаа малаа маллан амьдарч байна. Түүний аав Я.Бямбачулуунтай ярилцаж баярын сэтгэгдлийг нь хуваалцлаа.

–Таны хүү мэргэжлийн сумогийн дээд зиндаанд түрүүллээ. Баярын сэтгэгдлээ хуваалцахгүй юу?

-Их баяртай байна аа. Б.Лхагвасүрэн бол миний бага хүү. Хүүгийнхээ түрүүлсэн барилдааныг замд явж байгаад харж амжсангүй. Яг түрүүлдэг өдөр нь хотоос гараад Дорнод руу буцаж явсан юм. Гэртээ ирээд зурагт харахад миний хүү эзэн хааны цом тэврээд уйлаад зогсож байдаг юм даа. Хөл газарт хүрэхгүй баярласан. Хүүгийнхээ барилдааныг харах хүсэл байсан ч ардаа ажилтай учраас замд гарчихсан юм. Хүн бүр л над руу залгаж баяр хүргэж, хүүд маань чин сэтгэлээсээ амжилт хүсэж байна. Танихгүй хүмүүс хүртэл залгаж баяр хүргэх юм. Хүний сайн сайханд баярлаж, догдолдог нь монгол хүний гайхамшигтай гоё чанар юм даа. Олны сайхан ерөөлөөр миний хүү илүү сайн барилдаж энэ их спортын оргилд нь гарах байх аа.

-Б.Лхагвасүрэн маань багадаа ямар хүүхэд байв?

-Би өөрөө бөх үзэх их дуртай.Овооны наадмуудад хүүгээ дагуулаад л явна. Хүүхдүүдийг хооронд нь барилдуулахад Лхагвасүрэн маань түрүүлж, үзүүрлэдэг байсан юм. Хүү маань сайхан бөх болох нь дээ гэх горьдлого миний дотор яваад л байв. Нутгийн өвгөд ч “Хүү чинь бөх болох нь” гэж урамшуулна. Хүү маань өөрөө ч их дуртай. Ингээд дунд сургуулиа төгсөөд “Аварга” сургуульд элсэж гавьяат дасгалжуулагч Б.Адъяахүүгийн шавь болсон. Овооны наадам хэсч байсан бид хоёр хотод ирээд заалны барилдаанууд хайдаг боллоо. Нэгдүгээр курсийн хүүхэд ч яах вэ ганц нэг даваад унана. Харин зуны амралтаараа ирэхдээ төрөлх нутаг Сэргэлэн наадамд үзүүрлэж аавыгаа баярлуулсан нь санаанаас гардаггүй. Их амжилтын аяндаа ингэж л мордож дээ гэж боддог юм. Миний хүү үндэсний бөхийн сумын заан цолтой.

-Таны хүү Япон руу хэзээ, яаж явж байв?

-“Аварга” дээд сургуульд сурч байхдаа шалгаруулалтад орсон юм билээ. Хариу нь ч тэр доороо гарч тэнцсэн. Ер нь Япон явах шийдвэрээ миний хүү өөрөө бие дааж гаргасан. Миний хувьд дотроо үндэсний бөхөөрөө барилдаад үзвэл гэж бодож байсан ч хүүгийнхээ шийдвэрийг хүндэтгээд дэмжсэн. Жаахан хүү маань тэр том бүдүүн хүмүүстэй яаж барилдах юм бол доо гэж

эргэлзэж байсан ч тухайн үед нь хүүдээ хэлээгүй. Эргээд харахад миний хүү боломжоо олж хараад ийм шийдвэр гаргаж дээ.

-Анх очиход амар байгаагүй л байх. Гэр рүүгээ утсаар холбогддог байв уу. Юу ярьж байв?

-Миний хүү чинь ээж аавынхаа дэргэдээс холдож үзээгүй үедээ л зоригтой шийдвэр гаргаж Япон явсан. Сумо өөрөө хатуу дэг жаягтай спорт. Олон хүн оролдож үздэг ч амжилт гаргах нь цөөн. Голоос нь шантрах нь элбэг. Анх очоод хүүд маань амар байгаагүй л дээ. Аав, ээж рүүгээ залгаад л нөхцөл байдлаа зах зухаас нь хэлнэ. Би ч “Миний хүү зориод очсон юм чинь юуг ч тэвчинэ шүү” гэж захина. Миний хүү чинь ердийн л малчин айлын хүү. Морь мал дээр л дэрвэж өссөн. Хөдөөний бидний ажил ундарч л байдаг. Тэр бүрийн зах зухаас миний хүү хийдэг л байлаа. Ингэж өсөхдөө л тэвчээртэй болж

төлөвшсөн юм билээ. Ээж аав нь хүүгээ их хүлээнэ. Цай, сүүний дээжээ өргөөд л залбирдаг байлаа. Сүүлд гурван жилийн өмнө л жүрёо зиндаанд дэвшиж, чөлөөгөөр шагнуулаад гэртээ ирэхдээ уул шиг том болчихсон байж билээ. Тэгж их өссөнийг нь хараад сүрдээд ч байгаа юм шиг эвгүй мэдрэмж төрж байсан шүү. Гэлээ гээд ээж, аавдаа эрхэлдэг зан нь янзаараа л байсан даа, миний хүүгийн. Хүүгийнхээ сайн сайхан явахыг харахаас өөр аз жаргал гэж юу байх билээ. Нутаг орныхон маань гэрт ирж баяр хүргээд, манай хот айл хөл газарт гишгэх зайгүй л бужигналдаж байна.

-Одоо хүү тань мэргэжлийн сумогийн дээд зиндаанд түрүүлээд гэртээ ирэх нь. Лхагвасүрэн маань түрүүлээд хамгийн эхэнд л гэр бүлийнхэнтэйгээ баяраа хуваалцсан болов уу. Юу хэлж байна?

-Баярлаад олигтой юм ярьж чадахгүй байна лээ, хөөрхий минь. Аав, ээж нь хүүгийнхээ амжилтад баярлаж нулимс унагачих гээд л. Ярих гэж их юм болно. Ирэх зургадугаар сард эх орондоо ирэх сураг байна. Тэр нь юу болох нь уу. Сумо өөрөө хатуу дэг, жаягтай спорт. Чөлөө өгөх нь үү, яах нь уу. Хүүгээ санах л юм. Гэхдээ цаашид туулах хол зам байгаа. Наашаа, цаашаа явж бэлтгэлээ цалгардуулчих вий ч гэж бодох юм. Энэ их өрсөлдөөнтэй талбарт завсар зайгүй хөдөлмөрлөсөн хүн л амжилтад хүрнэ. Миний хүү аварга ах нарынхаа халааг авч дээд зиндаанд түрүүлсэнд их баярлаж байна. Шинэ хүүхэд очиход нь дэм болж байсан ах нарынхаа ачийг хариулж дээд зиндаанд түрүүллээ. Одоо цаашид илүү хариуцлагатай байж сайн барилдах байх. Хамгийн гол нь бэртэл гэмтлээс л хол байгаасай гэж залбирах юм. Сумо ч өөрөө хатуу ертөнц шүү дээ. Хүү минь амар биш зам туулж энэ хүрсэн.

-Таны хүүгээр олон хүн бахархаж байна. Ийм үед нь та юу захиж байна вэ?

-Тэвчээртэй, нуруутай байгаарай л гэж захилаа. Өөр юу хэлэх билээ. Миний хүү ч сэтгэлийн хаттай, тэвчээртэй хүн. Хүүдээ итгээд л хүлээж байна. Бидний гэр бүлийн баяр баясгаланг хуваалцсан та бүхэнд талархал илэрхийлж, ажлын амжилт хүсье.

Categories
мэдээ энтертаймент-ертөнц

МУГЖ Ө.Уянга Киргизийн дуурийн театрт урилгаар дуулна DNN.mn

Монгол Улсын Гавьяат жүжигчин, дуучин Ө.Уянга Киргизийн дуурийн театрт урилгаар дуулах гэж байгаагаа дуулгалаа. Тэрбээр тус улсын театрын тайзнаа дөрөвдүгээр сарын 1-нд Ж.Вердийн “Травиата” дуурийн Виолеттагийн дүрд дуулах болжээ.

Мөн дөрөвдүгээр сарын 4-нд “Монгол сонгодог Речитал” романсын тоглолтоо тоглох аж.

Categories
мэдээ нийгэм энтертаймент-ертөнц

Зураач Р.Гал-Од: Далд ухамсар ямар хариу үйлдэл үзүүлдгийг бүтээлүүдээрээ харуулахыг зорьсон байдаг DNN.mn

Зураач Р.Гал-Одын бие даасан үзэсгэлэн Инээдмийн баярын өдөр буюу дөрөвдүгээр сарын 1-нд нээгдэх нь. Түүнтэй ярилцлаа.

-Үзэсгэлэнгийнхээ талаар мэдээлэл өгөөч…?

-Би Дүрслэх урлагийн дээд сургуулийн Уран зургийн ангийг 2013 онд төгссөн. 2009 оноос сонирхлоороо шог зургийн чиглэлээр дагнаад 10 гаруй жил уран бүтээлээ туурвиад явж байна. 2012 онд анхны үзэсгэлэнгээ Парк дээр гаргаж байсан. Тухайн үеийн алдар нэртэй хүмүүсийн төрхийг зурсан шог зургийн үзэсгэлэн. Одоо бол хоёр дахь томхон хэмжээний бие даасан үзэсгэлэнгээ Хаан банкны галерейд дөрөвдүгээр сарын 1-нд нээхээр бэлтгэж байна.Шог зураг бол аж байдал, ахуй амьдрал, дотоод сэтгэлийг илэрхийлсэн гэх мэтээр уран зургийн бүхий л төрөл рүү орж чаддаг өвөрмөц онцгой төрөл. Түүгээрээ миний сонирхлыг маш их татсан. Үзэсгэлэнд шог зургийн бүхий л төрлөөр зурсан бүтээлүүд маань тавигдана.

-Та голчлон алдартай хүмүүсийг зурдаг. Захиалгаар зурдаг уу?

-Захиалга ирвэл хүлээж авдаг. Захиалгаар зурахыг хүмүүс халтуур хийлээ гэж ойлгох гээд байдаг. Үнэндээ үгүй юм. Нэг найзыгаа зуруулаад өөрт нь бэлэглэлээ гэж бодоход дотоод сэтгэлийн гоо сайхан, гэр бүлийн амьдралыг харуулсан сэдэвт зургууд нь тухайн хүндээ аз жаргал, таашаал, баяр баяслыг өгч байдаг болохоор урлагийн бүтээл юм даа.

-Танай багш нар гэвэл…?

-Монгол Улсын урлагийн гавьяат зүтгэлтэн, шог зураач С.Цогтбаяр миний багш. Багшийг маань мэдэхгүй хүн ховор байх. Урчуудын эвлэлийн хорооны нэрэмжит зураач О.Энхтайван багш маань байна. Намайг чиглүүлж, мэргэжлийн суурийг маань сайн тавьж өгсөн багш нартаа талархаж явдаг.

-Зураач хүний нэг өдөр яаж өнгөрдөг вэ. Хэр завтай байдаг вэ?

-Уран бүтээлч хүн байнгын эрэл хайгуул хийж байдаг. Дотогшоогоо их өнгийнө. Зарим өдөр зургаа ширтээд, илэрхийлэмжээ төгс гаргах талаар бодсоор байгаад өнгөрдөг. Эсвэл маш их үйлдэл хийж, үр бүтээлтэй өнгөрүүлдэг ч үе байна. Янз бүр. Бүхий л ажлаа амжуулна гээд хүмүүс яаж амьдардаг, тэгж л амьдарч байна.

-Цогтбаяр багш чинь “овоо доо” гэж үнэлсэн зургаасаа нэрлээч…?

-2014 онд маршал Х.Чойбалсан гуайн хөргийг зурахад багш маань их үнэлж магтаж байсан. Одоо гарах үзэсгэлэнд тавигдах гол бүтээлүүдийн нэг. Нийгмийн бухимдал стресс шог зургаар хамгийн сайн илэрдэг. Болохгүй байгаа бүхнийг л шог зургаар шүүмжилж болно. 2021 оны арваннэгдүгээр сард би доктор профессор Моломжамц ахын тэргүүлдэг Монголын шог зураачдын холбооны гишүүн болсон. Холбооны зүгээс Монголын шог зураачдын үзэсгэлэнг байнга гаргаж, нийтийн хүртээл болгож байдаг. Хөрөг шог зураг зурж эхэлсэн 2009 оноос хойш би судалгаа хийж эхэлсэн. Хүний нүүр царайны донж төрхөн дээр юуг олж авч, анзаарч чадсан юм гэхээр тухайн хүний төрх донж өөрийнх нь сөрөг сэтгэл хөдлөлтэй маш холбоотой байдаг. Тэр нь цаашаа сэтгэл судлал, хүний далд ухамсартай холбогдоно. Энэ нь шог зураг бүхий л зүйлтэй нарийн нягт холбоотой байдгийн илэрхийлэл. Үүнийг юугаар баталж харуулах вэ гэхээр Шотланд гаралтай Америкийн гүн ухаантан Гэрри Жон Бишофийн хувь хүний хөгжил, сэтгэл хөдлөл, философийн талаар хийсэн 30 гаруй жилийн судалгааны үр дүнгээр тайлбарладаг. Энэ хүн судалгааныхаа үндсэн дээр Урбом философийн урсгалыг хүртэл гаргаж ирсэн. Бишофийн хэлсэн ярьсан зүйлс, эшлэл дүгнэлтүүд нь надад төсөөлөгдсөн шог зургийн ойлголтуудыг 100 хувь баталж өгсөн. Одоогийн гарах үзэсгэлэн маань ч энэ үзэл дээр тулгуурлагдсан. Хүн төрөлхтөн бүгд адилхан. Хүн бүхий л амьдралынхаа турш 97 хувиа огт мэдэлгүй өнгөрөөдөг. Үүнийг нь далд ухамсар гэдэг. Хүн өсч торнин, ажиллаж амьдарч, үр хүүхдээ өсгөн нийгмийн амьдралд оролцоно. Өөрийнхөө хэлбэр дүрсийг мэднэ, юунд дуртай, дургүйгээ мэддэг. Энэ бүх амьдрал бол бидний мэдэх гуравхан хувь. Гурван хувиа л хүн мэддэг гэсэн үг.

Зүүн гар талаас эхний хүн нь зураач Р.Гал-Од

-Тийм бага уу?

-Тийм бага. Мэдэхгүй түвшин нь маш их. Энэ үлдсэн 97 хувийн далд ухамсар бидний бүх амьдралыг шийдэж байдаг. Хүн гэдэг амьтан бусад руу хараад “энэ ямар амьтан юм бол” гэж бодож судалдаг болохоос өөрийгөө хэзээ ч судалдаггүй. Харамсалтай нь, далд ухамсарын түвшинд бид юу ч бодож, ямар ч шийдвэр гаргадаггүй. Бидний сөрөг сэтгэл хөдлөл, таагүй эмоциуд уран сайхны хэтрүүлэг донжоор шог зурагт бууж байгаа нь бидний үл ухамсарлахуй буюу далд ухамсар л царайн дээр нь илэрч байна гэсэн үг. Үүгээрээ асар гүн гүнзгий ач холбогдолтой.

-Хүн хөрөг шог зургаа зурууллаа гэхэд өөрийнхөө далд байгаа мэдэхгүй зүйлийг зургаасаа мэдрэх боломжтой гэсэн үг үү?

-Маш зөв. Өөрийнхөө тухай, өөрийнхөө анзаарч хараагүй зүйлүүдээ л харна гэсэн үг. Та бодоод үз л дээ, хүн төрөлхтөн өөрийнхөө 100 хувийн дөнгөж гурван хувийг л мэдэж амьдарч байгаа. Харин таны мэдэхгүй тэр далд ухамсар шог зургаар таны царай төрхөнд илэрч байдаг. Эндээс харахад хүн өөрийгөө насан туршдаа хуурч амьдардаг юм байна. Үнэнийг нь хэлэхээр хэзээ ч хүлээн зөвшөөрдөггүй. “Үгүй, би тийм биш. Би өөрийгөө хэзээ ч хуурдаггүй. Би өөрийгөө мэддэг” гэдэг ч эсрэгээрээ байдаг.

-Яагаад хүн өөрийгөө хуурдаг гэж…

-Хүний өөрийгөө мэддэг гэх энэ гурван хувийн хүсэл эрмэлзэл, бодол мөрөөдөл нь далд ухамсрын хүсэл эрмэлзлийнхээ яг эсрэг нь байдаг. Түүнийг л хэлж байгаа юм. Хүн далд ухамсраа удирдаж чадаж байвал өөрийгөө жинхэнээр нь мэдэж удирдаж байна гэсэн үг.

-Хүний хөрөг шог зургийг зурахдаа хэт хэтрүүлбэл доромжилсон болох уу?

-Харин ч хэтрүүлэх ёстой. Доромжлол болохгүй. Доромжлол гэж хүмүүс хараад байдаг нь өөрийгөө хүлээн зөвшөөрөхгүй байна гэсэн үг. Тэр хүний зургийг хичнээн ч хэтрүүлсэн байсан хүлээн зөвшөөрч инээж байвал далд ухамсраа таньж мэдэж байгаа нэг хэлбэр. Өөрийгөө хуурч байгаа нэг жижигхэн хэлбэр бол шог зургаа хараад “би ийм биш” гэж уурлах.

-Гэхдээ та хөрөг шог зураг зурахдаа хүмүүсийг уурлатал нь хэтрүүлж зурдаггүй биз дээ?

-Уурлуулъя гэж бодож зурдаггүй. Үнэнийг л зурахыг хичээдэг.

-Танаар хөрөг шог зургаа зуруулсан хүмүүсийн хэдэн хувь нь уурладаг вэ?

-99,9 хувь нь уурлах маягтай байдаг.

-Тэгвэл хүнийг дургүйцүүлэн дургүйцүүлэн ингэж зурах хэрэг байна уу?

-Харин ч хэрэгтэй, шаардлагатай. Урлаг заавал хүнд таалагдаж таашаал өгч байх зүйл биш. Үнэнийг нь хэлж өгч байх ёстой. Урлагийн гоо сайхныг энэ өнцгөөс нь мэдрэх ёстой. Гоо зүй, гоо сайхан гэдэг өөрөө ямар асуудал юм. Тэр бол заавал гоё юм үзэж таашаал авахын нэр биш.

-Таны үзэсгэлэнг очиж үзээд хүмүүс юу мэдрэх вэ?

-Яг л миний саяын хэлснийг үзнэ. Далд ухамсар ямар хариу үйлдэлтэй байдаг вэ гэдгийг шог зургийн бүхий л бүтээлүүдээрээ харуулахыг зорьсон. Үзэсгэлэн маань 22 хоног үргэлжилнэ.

-Таны пэйж хуудасны эхэнд “Шог зургаас та бүхэн өөр хаанаас ч авч чадамгүй баяр баяслыг мэдрэх болно” гэж бичсэн байсан…?

-Мэдэрнэ. Хүн өөрийнхөө хөрөг шог зургийг хүлээн зөвшөөрөхгүй хэрнээ инээгээд байдаг. Хүний дотоод сэтгэлд хоёр өөр төрлийн туйлшрал зөрчил явагддаг. Гэхдээ үүнийгээ анзаарч мэддэггүй. Сонирхолтой байгаа биз.

О.Туяа


Categories
мэдээ цаг-үе энтертаймент-ертөнц

Номын баяр тавдугаар сарын 19-21-нд болно DNN.mn

Уламжлал болон зохион байгуулагддаг Номын баяр 2023 оны тавдугаар сарын 19-21-нд 33 дахь удаагаа Сүхбаатарын талбайд болно. 32 дахь удаагийн номын баяр “Илүү их уншъя” уриатайгаар есдүгээр сарын 16-18-ны өдрүүдэд болсон юм. Уг баярыг улс даяар зохион байгуулж, 150 гаруй аж ахуйн нэгж байгууллага, 250 орчим шилдэг хэвлэн нийтлэгч, зохиолч, яруу найрагч зэрэг уран бүтээлчид оролцож байсан. Мөн шинээр хэвлэсэн ном товхимлын үзэсгэлэнгээс гадна ховор нандин номуудыг олон нийтэд дэлгэсэн билээ.

Categories
мэдээ нийгэм энтертаймент-ертөнц

“Тамгагүй төр” жүжгийг арваннэгдүгээр сард Англид тоглоно DNN.mn

Оны шилдэг уран бүтээл, уран бүтээлч шалгаруулдаг “Мөнгөн мод” өчигдөр болж өндөрлөсөн. Эл наадмын оны шилдэг тайзны уран бүтээлээр “Херо” энтертайнментын ерөнхий найруулагч Б.Баатарын найруулсан Хөдөлмөрийн баатар, Ардын уран зохиолч Б.Лхагвасүрэнгийн “Тамгагүй төр” жүжиг тодорсон. Тус физикл драмын ерөнхий продюсер М.Есөнмөнх мөн оны шилдэг продюсероор шалгарсан юм.

М.Есөнмөнх “Тамгагүй төр” жүжгийг дахин шинээр тавьж, өөр техник, өнцгөөр бүтээсэн. Энэ нь шилдэг бүтээл болоход нөлөөлсөн гэж үзэж болно. Энэхүү бүтээлийг өнгөрсөн жил 117 удаа тоглож, 67 мянга гаруй үзэгч үзсэн. Түүнчлэн 2023 онд гадаадын тайзнаа тавихаар гэрээ хийсэн. Тодруулбал, ирэх арваннэгдүгээр сарын 13-наас Английн Лондон хотноо байрладаг “West end” театрт нийт 20 удаа тоглохоор болсон” гэв.

“Тамгагүй төр” жүжгийг гадаадад тоглохдоо “Монгол хаан” нэртэйгээр хүргэх бөгөөд англи хэлээр тоглохоор бэлтгэж буй аж.