“Рио де Жанерио-2016” зуны олимпийн наадмын эрхийн төлөөх буудлага спортын Дэлхийн цомын тэмцээн БНСУ-ын Чанвон хотноо өчигдөр эхэллээ. Энэхүү тэмцээнд 68 орны 571 буудагчид 10 дасгалд цэц мэргээ сорьж байна. Уг тэмцээнд манай улсаас гар болон урт буу дасгалд нийт 11 тамирчин оролцож байна. Үүнд эрэгтэйчүүдийн гар бууны дасгалд ОУХМ Э.Даваахүү, О.Төгөлдөр, урт бууны дасгалд ОУХМ Н.Баяраа, Х.Бямбабаатар, Б.Бишрэлт, эмэгтэйчүүдийн гар бууны дасгалд Хөдөлмөрийн баатар, Гавьяат тамирчин О.Гүндэгмаа, ОУХМ Ц.Мөнхзул, Т.Баярцэцэг, урт бууны дасгалд ОУХМ Ч.Нарантуяа, О.Янжинлхам, Г.Нандинцэцэг нар дэлхийн шилдгүүдтэй өрсөлдөж байгаа юм.
Тэмцээний эхний өдөр буюу өчигдөр 10 метрийн хийн урт бууны эрэгтэйчүүдийн дасгал болж, нийт 98 тамирчин өрсөлдсөнөөс Унгарын буудагч, дэлхийн аварга Петр Сиди түрүүлж, Хятадын буудагч, дэлхийн аваргын мөнгөн медальт Ян Хаоран, олимп, дэлхийн аварга Чү Кюүнан нар удаалжээ. Энэ дасгалд ОУХМ Б.Бишрэл 54-р, ОУХМ Х.Бямбабаатар 60-р, ОУХМ Н.Баяраа 75-р байрт тус тус орсон байна.
Энэхүү дэлхий цомын тэмцээнээр “Рио де Жанерио-2016” зуны олимпийн наадмын эрхийн оноо олгох юм. Тэмцээн энэ сарын 16-ны өдөр өндөрлөнө.