БНСУ-ын нийслэл Сөүл хотноо наймдугаар сарын 20-26-нд зохион байгуулсан 51 дэх удаагийн Ази тивийн аварга шалгаруулах тэмцээнд оролцсон Монголын баг тамирчид дөрвөн алт, гурван мөнгө, таван хүрэл медаль хүртсэн байна.
Энэхүү амжилтын эзэд болон Монголын бодибилдинг фитнессийн холбооноос өнөөдөр Спортын төв ордны Хурлын танхимд мэдээлэл хийлээ. Энэ удаагийн тивийн АШТ-нд Азийн 26 орны 385 тамирчин 31 ангилалд өрсөлдөж шилгүүдээ тодруулжээ. Монгол улсын баг тамирчид нийт 12 медаль хүртэж, дөрвөн тамирчин шагналт байр эзэлсэн бөгөөд эмэгтэй баг мөнгөн медаль, цомын эзэн болсон байна. Дэлхийн хошой аварга Г.Угалзцэцэг энэ тэмцээнээс алтан медаль хүртсэнээр Ази тивийн хошой аварга болов. 2017 оны Ази тивийн АШТ-д Монгол Улсаас 23 тамирчин, гурван олон улсын зэрэглэлтэй шүүгч оролцсон юм.
Дашрамд сонирхуулахад, Монголын бодибилдинг фитнессийн 2017 оны Улсын аварга шалгаруулах тэмцээн ирэх есдүгээр сарын 15-16-нд болно. Эндээс шалгарсан 60 гаруй тамирчин 2017 оны 10 дугаар сарын 5-9-нд Улаанбаатар хотноо “УБ-паласе”-д болох Дэлхийн аварга шалгаруулах тэмцээнд оролцох эрхтэй болно. Манай улс энэ удаагийн ДАШТ-ийг зохион байгуулах эрхийг хоёр жилийн өмнө БНХАУ-тай өрсөлдөж Улаанбаатарт хийхээр болсон юм. БНХАУ нь бодибилдинг фитнессийн спортоор хичээллэгчдийн тоогоор хүн амд ноогдох хэмжээгээр бага буюу Монгол Улсын хувьд хүн амын тоонд хуваахад өндөр хувьтай гарсан учраас давуу эрх авч Монголд зохион байгуулахаар шийдвэрлэсэн байна.